ژینگه‌ه پارێزیا بارزان بوویه ژێده‌رێ ژینگه‌ها كوردستانێ
بارزان، ره‌مه‌زان زه‌كه‌ریا:
پرسا ژینگه‌هێ ل ده‌ڤه‌را بارزان گرنگیه‌كا زۆر باش پێ هاتیه دان ژلایێ وه‌لاتیان و به‌رپرسێن ژینگه‌هێ و ئه‌و گه‌شتیارێن سه‌ره‌دانا ده‌ڤه‌را بارزان دكه‌ن، ژینگه پارێزیا بارزان پتر ژ چه‌رخه‌كێ هه‌یه و رۆژ ب رۆژێ گه‌شه دكه‌ت و ژینگه پارێزیا بارزان بۆیه ژێده‌رێ ژینگه‌ها كوردستانێ.
تاهر سالح، سه‌رۆكێ رێكخراوا گول و سروشت بۆ ئه‌ڤرۆ گۆت: پرسا ژینگه‌هێ ل ده‌ڤه‌را بارزان مێژوویه‌كا گه‌له‌ك زۆر هه‌یه بۆ چه‌ندین سالان به‌ری نوكه زڤریته‌ڤه و هه‌تا نوكه وه‌ك خۆمایه و وه‌لاتی وه‌سا هاتینه په‌روه‌رده‌كرن زیان گه‌هاندن ب ژینگه‌هێ كاره‌كێ خراب و دووره ژ بنه‌مایێن مرۆڤایه‌تیێ، له‌ورا ژی سال بۆ سالێ ژینگه‌ها بارزان یا گه‌شه دكه‌ت ل ده‌ڤه‌را بارزان كه‌س سه‌ر پێچیا رێنمایێن ژینگه‌هێ ناكه‌ت و بارزان نه ب تنێ ل كوردستانێ نمونه‌یا ژینگه پارێزیێی یه، به‌لكۆ ل ده‌ڤه‌رێ هه‌موویێ بارزان پێشه‌نگه ل پاراستنا ژینگه‌هێ.
شه‌وان بازرانی، سه‌رۆكێ رێكخراوا هه‌ناسه بۆ پاراستنا ژینگه‌هێ بۆ ئه‌ڤرۆ گۆت: ئه‌م ژینگه پارێزین، ژ به‌ر كو هه‌ست ب به‌رپرسیاریه‌تی دكه‌ین به‌رامبه‌ر ژینگه‌هێ، پێدڤیه هه‌موو كه‌سه‌ك ژینگه دوست و ژینگه پارێزبیت، ل هه‌موو بواره‌كێ ڤه ژینگه‌هێ به‌رده‌وام پێدڤی ب پاراستنێ هه‌یه وه‌ك رووه‌كێن سروشتی و دارو ئاژه‌لان، ژینگه پارێزیا بارزان ل سه‌ر ده‌مێ باب و باپیران بۆ مه مایه ڤه و دوژمنێن گه‌لێ كورد گه‌له‌ك بزاڤ كرینه بۆ تێكدانا ژینگه‌ها كوردستانێ ب گشتی و بارزان ب تایبه‌تی، به‌لێ دلسوزیا وه‌لاتیان رێنمایێن پاراستنا ژینگه‌هێ بووینه ئه‌گه‌ر ژینگه‌ه سه‌ر ژ نوو ساخ ببیته‌ڤه و پاراستنا ژینگه‌هێ ئه‌ركێ هه‌موو تاكه‌كی یه، نابیت كه‌س دژی ژینگه‌هێ بیت، به‌لكۆ پێدڤیه ئه‌م هه‌موو دوستێن ژینگه‌هێ بین.
حه‌سه‌ن دوله‌مه‌ری، به‌رپرسێ به‌ته‌لیونا ژینگه‌ها مێرگه‌سۆر بۆ ئه‌ڤرۆ گۆت: دروستبوونا كلتۆرێ ژینگه‌پارێزیا ل سه‌ر ده‌مێ شێخێن بارزان دروستبوویه و هه‌تا نوكه مایه‌ڤه و بۆیه كلتۆره‌كێ جوان، ل سه‌ر ده‌مێ شێخ عه‌بدولسه‌م بارزانی ژینگه‌هـ و ژینگه پارێزی ژینگه دوستی هه‌بووه هه‌تا گه‌هشتیه شێخ ئه‌حمه‌د بارزانی به‌رده‌وامه هه‌تا نوكه كۆ چه‌ند رێنمایی ده‌رچوونه بۆ پاراستنا ژینگه‌هێ.
گۆت ژی: پێگریا خه‌لكی وه‌كریه 70% ئه‌ركێ مه وه‌ك ژینگه سڤك كریه، ژبه‌ر پێگیریا وه‌لاتیان ب پاراستنا ژینگه‌هێ، هه‌ر كه‌سه‌ك سه‌ره‌دانا بارزان ژی بكه‌ت ب هه‌ر رێیه‌كا بیت هه‌ستێ ژینگه پارێزیێ و پاقژ راگرتنا ژینگه‌هێ بۆ دروست دبیت، ژ به‌ر كۆ ژینگه‌ها بارزان نموونه‌یه‌كا گه‌له‌ك جوانه.
ناڤبری ئاشكرا كر: كوشتنا هه‌موو جۆره ئاژه‌له‌كێ كیڤی ل ده‌ڤه‌را بارزان قه‌ده‌غه‌یه، هه‌ر كه‌سه‌كێ سه‌رپێچیێ بكه‌ت ل گور یاسایێ هێته سزادان، پاراستنا ژینگه‌هێ ئه‌ركێ مه‌یه و پێدڤیه راگه‌هاندن پتر رۆلێ خوه ببینیت پاراستنا ژینگه‌هێ هشیار كرنه‌ڤه‌یا خه‌لكی، پاراستنا ژینگه‌هێ ب تنێ نه‌برینا داران و كوشتنا ئاژه‌لان نینه، پیسكرنا ژینگه‌هێ مه‌ترسیه‌كا زۆر جدیه و پێدڤیه ئه‌م هه‌موو كار بكه‌ین بۆ پاراستنا ژینگه‌هێ.
