ژیێ وی (78) سالن و هێشتا دوكاندارە
شاكر ئەتروشی:
حەجی (عەبدوللا بێدوهی) دانعەمرەكێ خەلكێ دهۆكێ یە، ژیێ وی (78) سالن، رۆژانە ل دەمژمێر نەهی سپێدی ژ مالا خوە ل گوندێ بێسرێ دەردكەڤیت و ب تەكسیەكێ دهێتە نیڤا سەنتەرێ دهۆكێ و دوكانا خوە یا بچووك كو فرەهیا وێ مەترەكە و نیڤە و درێژاهیا وێ نێزیكی چار مەترانە ڤەدكەت و هەتا رۆژ ئاڤا دبیت ل بەر رزقێ خوە دراوەستین و ب گۆتنا وی گەلەك رۆژان چو تشتان نافرۆشیت و پارێ تەكسیێ ژ هێرڤە و وێڤە ل گەل خوارنا خوە یا نیڤرۆ ژ بەریكا خوە ددەت.
ناڤهاتی، د دیدارەكێ دا بۆ رۆژناما ئەڤرۆ دبێژیت: پشتی ئەز ب (300) دیناران خانەنشین بووبم من نەڤیا ئەز دمالدا روونم، لەورا ئەز هاتم من ئەڤ دوكانە كو دكەڤیتە تەنشت مزگەفتا رێكانیا ڤەكر، ل دەستپێكێ من بەرگیزێن كەڤن ژ خەلكەكی دكرین و ل ڤێرە فرۆتن، پاشان من بەرك و چانتك و سەماوەر و هنگڤین و سماق و هندەك بەرهەمێن دی یێن خۆمالی ئینان و ئەڤە (30) سالن ئەز رۆژێن خوە هەموویان ل ڤێ دوكانا بەرتەنگ دبۆرینم، هندەك رۆژان شول یێ باشە و تشتەك دگەهیتە من و هندەك رۆژان ئەز فلسەكی ژی شول ناكەم و پارێ هاتن و چوون و خوارنا نیڤرۆ ژ بەریكا خوە دئینمە دەر، لێ ئەز یێ كەیفخۆش ب كارێ خوە چنكو مرۆڤێن دانعەمر دهێنە دەف من و ئەز رازی نابم چو كەس بێی ڤەخوارنا چایەكێ یان قەهوەكێ ژ دەف من رابن.
