ژێر زەمین
خورشید تەوفیق باكۆزی
شەڤە و
تە و هزر و تەخمینان شەڕ بوو
ژێرزەمینێ تو دناڤ داڤێن
ئازارەكا كویردا د پێچایی
ژێرزەمین سەرباركێ هزرا تە بوو
هەتا سپێدێ تو نە رازایی
چاڤێن تە ب ژڤانێ ڤە وەستیان و
هیڤی دهەناسەیا گەرما تەدا
مانە ئاسێ و
د گەهێن تەدا مینا جەمەدێ قەرسین
هاها دێ ئێن ..!
ئەورەشەكێن ژكویرها شەڤێ و
ژئاگڕێ دۆزەخێ و
ژكینا بیابانێ چێبووین
ژ وژدانەكا مری و ڕەش بووین
هاها دێ ئێن ..!
ئەو ئاخینكا تە ژدلەكێ پڕ شەوات و
ژهەناسەكا كویر هەلكێشایی
هێدی هێدی
تو لسەر ملێ خۆ دزڤڕی و
تەهەمی هەڤال هەمبێزدكرن
نەددا و نەدستاند
تەدگۆت .. ژڤانێ من چو نەمایە و
هاها دێ ئێن ..!
ئەو دوهێكێن سەرتێشتا تە
ددلەكێ گەرمدا كەلاندین
هەروەكو وان ژی دزانی
پاتكاخۆ دانەتە و بێ خاتر چوون .
خۆ دئاخینكا تە نەگەهاند
یێ بژڤانی و هاها دێ ئێن ..!
دناڤ گێلەشۆكا هزراندا
جار دهەرێفی و جار دنژنی
دلێ تە هەروەكو زێمارەكا
هویر دهنجنی
شوانیۆ .. زیندانیۆ
هەڤالێ من هۆ كەكێ
جەبار شوانی ..
هێشتا تو یێ ل ژیێ گولێ و
خۆرتەكێ تەڕ و جوانی ..
سنێلەیی و
هێژ بەركەپیێ تەیێ نازك
ڕەش نەبوویە ..
هێژ ستێرا تە دئاسمانی دا
یا دخەودایە و گەش نەبوویە
نە حكم ژ تە دگریتن
نەژی كنفكێ سێدارێ
گەردەنا تە دهەلمیسیتن
شوانیۆ ..
تنێ مەرەقا تە ئەو بوو
تو رۆژەكێ ببینی
هەكو سپێدێ زویكا دهەلێت
هێشتا تیرۆژكێن وێ دگەڕم
ژخەریبیا خۆ دگەردەنا كەلێ وەردكەن ..
رویكێ زناران ماچی دكەن .
كەزی و بسكێن بیتانۆكا
دبهارەكا نوی دا شەدكەن
پەیاما ئازدیێ دگەهینن
هەناسەكا دی هەلكێشا و
گوت هەڤالنۆ ..
من باوەرە
ئەز وێ سپێدەهیێ نابینم
یا ل بەر بەرۆژكێن
گەرمێن ئازادیا وێ دروینم
ڕەشەك هاتن مینا هۆڤان
ب كەرب و كین و د غەزەب گرتی
تو برییە وێ ژێر زەمینا مالك وێران
یاكۆ هەردەم تژی زێمار تژی دۆمان
ژنشكەكێڤە هەڤالا دیت
ل بەردەرگەهی
تو یێ دگوینیكەكی پێچایی
دەرازینكا سۆرە ژخوینێ …!
من ژنوی زانی
ئاگرێ نەورۆزا كەركووكێ
یێ ژخوینا جانێ تە هەلكری و
ئەڤ ئالایێ
ل كەلا كەركووكێ بلند بووی
یێ بلند بووی
ژكەڤنە ژانێن وێ برینێ ..
وێ برینێ ..
