ژ ئەنجامێ تەقەیا توركیا وەلاتیەك ل دەڤەرا ئامێدیێ شەهید بـوو
ژ ئەنجامێ تەقەیا لەشكرێ توركیا ل گوندێ هرۆرێ یێ سەر ب ناوچەدارییا كانیماسێ ڤە، وەلاتیەكێ سڤیل دوهی 4/12/2024 شەهید بوو.
ئێك ژ كەسوكارێن وی بۆ رۆژناما ئەڤرۆدیار كر، بەری نیڤرۆیا دوهی وەلاتیەكێ گوندێ قومریێ بناڤێ (سەباح عەبدولستار) ژ لایێ لەشكرێ توركیا ڤە ل ئاقارێ گوندێ هرۆرێ یێ سەر ب ناوچەدارییا كانیماسێ ڤە هاتیە ئارمانجگرتن و شەهید بوویە و گۆت: «پشتی گەلەك بزاڤان خەلكێ دەڤەرێ جەنازێ وی ل جهێ لێ هاتیە شەهید كرن ڤەگوهاستە ناڤ كەسوكارێن وی، پاشی هاتە ڤەشارتن».
كەسوكارێن وی دیار كر، وی ب مەرەما گەریانێ و ئینانا گیایی ل گەل دو هەڤالێن خوە، قەستا ئاقارێ گوندێ هرۆرێ كربوو، لێ ب مخانی ڤە ژ لایێ لەشكرێ توركیا ڤە هاتە شەهید كرن.
(سەباح عەبدولستار) ئاكنجیێ كۆمەلگەها بریفكا بوو، ژییێ وی 45 سال بوون و خێزاندارە.
دهێتە زانین، هەتا نوكە پتری 50 وەلاتیێن سنوورێ دەڤەردارییا ئامێدیێ ژ ئەنجامێ شەڕێ پەكەكێ و توركیا و بوردۆمانێن فرۆكەیان شەهید و بریندار بووینە، ئەڤ سالە ئەڤە سێیەم وەلاتیە شەهید دبیت.
