ژ ئەگەرێ شەڕی گـوندەكێ دیتـر ل دەڤــەرا بــەرواری بالا هـاتە چۆلكرن
زنار تۆڤی:
ژ ئەگەرێ شەڕێ پەكەكێ و سۆپایێ توركیا گوندێ میسكا ل دەڤەرا بەرواری بالا هاتینە چۆلكرن و ژ ئەگەرێ تۆپبارانكرنێ ئاقارێ وی گوندی ژی ب تەمامی هاتییە سۆتن و زیانێن مەزن یێن ماددی گەهشتینە خەلكێ گوندی.
ئەدیب مەجید، مۆختارێ گوندێ میسكا ل دەڤەرا بەرواری بالا بۆ رۆژناما ئەڤرۆ دیار كر، ژ ئەگەرێ شەڕێ د ناڤبەرا پەكەكێ و سۆپایێ توركیا دا، گوندێ میسكا هاتە بەردان و خەلكێ گوندی نەچاربوون گوندێ خۆ چۆل بكەن، چونكی تۆپخانێن سۆپایێ توركیا چەندین گوللەتۆپ ل ناڤا گوندی داینە و چار خانی ب تەمامی هەڕفاندینە و وێران كرینە، د هەمان دەم دا موسلمان و كریستییان هەردو ل گوندێ میسكا دژین و بەری گوند بهێتە بەردان 11 مال ل سەر گوندی دژییان، بەلێ پشتی هاتییە بۆمبەبارانكرن و تۆپبارانكرن زیان گەهشتییە مال و مولكێ گوندییان، گوند هاتە چۆلكرن و ژ ئەنجامێ وێ بوردۆمانكرنێ دێرا گوندێ میسكا ژی هاتییە هەڕفاندن و پرانییا ئاقارێ گوندی ژی هاتییە سۆتن.
ناڤهاتی گۆت: «هندەك ژ وان مالان تەرشوكەوال ژی هەبوو، كارێ چاندنێ ژی دكر، بەلێ پشتی بوردۆمانێ گوند ب تەمامی هاتییە چۆلكرن و ژ نەچاری ئەو مالێن بەری نوكە ل گوندی هاتینە دهۆكێ، دیسا نوكە خەلكێ گوندی نەشێن بچنە گوندی و ب ڤی رەنگی زیانەكا مەزن گەهشتییە خەلكێ گوندی».
