ژ ئەگەرێ پەقینا درۆنەكێ دو پێشمەرگە ل دێرەلۆكێ بریندار بوون
ئامێدیێ، مەحمود نهێلی:
دوهی 28/4/2025 دو درۆن ب خالەكا پێشمەرگەی ڤە، ل نێزیك گوندێ بلاڤە كەفتن و دو پێشمەرگە بریندار بوون و بۆ نەخۆشخانەیا ئامێدیێ هاتنە هنارتن.
كەسەكێ نێزیكی روودانێ بۆ رۆژناما ئەڤرۆ دیار كر، دو درۆن ئاراستەی خالەكا پێشمەرگەی ل گرێ داڤا بەرامبەر گوندێ بلاڤە ل سنوورێ ناوچەدارییا دێرەلۆكێ هاتنە كرن، یا ئێكێ ل دەمژمێر سێ و دەهـ خۆلەك بوویە و دو پێشمەرگەهـ بریندار بوون، یا دویێ ژی هاتە ئاڕاستەكرن، لێ نەگەهشتە خالا پێشمەرگەی و هاتە پەقاندن.
دكتور مەسعود بوتی، هاریكارێ رێڤەبەرێ نەخۆشخانا ئامێدیێ بۆ ئەڤرۆ دیار كر، ئەو دو پێشمەرگەیێن برینداربووین بناڤێ (سەردار و شهاب)ن، ئێك خەلكێ دهۆكێ یە و یێ دی ژی خەلكێ دەڤەردارییا ئاكرێ یە و گۆت: «برینێن هەردو پێشمەرگەیان د سڤكن، ئێك ژ وانا بۆ مال هاتە رەوانەكرن، یێ دی ژی بۆ هەوارهاتنا دهۆكێ هاتە هنارتن، داكو ساجمەیا د تەنشتا وی دا بیننە دەر».
ل دووڤ زانیاریان، ئەو خالا پێشمەرگەی بەری دو رۆژان ل وێ دەڤەرێ هاتیە دانان.
