ژ ئەگەرێ تۆپبارانا توركیا زیان گەهشتیە ژینگەها دەڤەرا ئامێدیێ
ئامێدیێ، مەحمود نهێلی:
بۆ ماوێ دو رۆژایە ل دووڤ ئێك لەشكرێ توركیا ب بەردەوامی تۆپبارانا دەڤەرێن نهێلێ و بەرێگارێ دكەت، ئەڤە ژی بوویە ئەگەرێ سۆتنا ئاقار و رەز و بیستانێن وەلاتیان و زیانێن مەزن ژی گەهشتینە ژینگەها دەڤەرێ.
ئاكنجیەكێ گوندێ بەرچی بۆ رۆژناما ئەڤرۆ دیاركر، دەمێ دو رۆژایە لەشكرێ توركیا تۆپبارانێن خوە ل سەر دەڤەرا وانا دژوارتر لێكرینە و گۆت: «دوهی 14/6/2025 گەلیێ مێوین ل گوندێ بلاڤە یێ گرێدایی دەڤەرا نهێلێ و گوندێ مژێ و گرگاش و سپیندارێ یێن دەڤەرا بەرێ گارێ ب دژواری ژ لایێ توركیا ڤە هاتینە تۆپبارانكرن، ژ ئەنجامێ ڤێ تۆپبارانێ ئاگر بەربوویە ئاقارێ گوندێن ناڤهاتی و هەتا نوكە ژی نەهاتیە كۆنترۆلكرن».
دهێتە زانین، زێدەباری پرۆسەیا ئاشتیێ و بڕیارا چەكدانانا پەكەكێ، لێ هێژ بەردەوام شەڕ و ئالۆزی ل دەڤەرا ئامێدیێ رووددەن، ب تایبەتی ژی ل گوندەوارێن سنۆرێ ناوچەدارییا دێرەلۆكێ، ئەڤێ یەكێ ژی نەرحەتی و بێ هیڤی بوونەك ل نك خەلكێ وێ دەڤەرێ دروستكریە.
