ژ به‌ر كوشتنا زارۆیان داخوازا سزادانا ئیرانێ دهێته كرن
ئه‌ڤرۆ:
رێكخستنا لێبۆرینا نێڤده‌وله‌تی راگه‌هاند كو هه‌تا نها ٢٨ زارۆ ل ئیرانێ ب ده‌ستێ هێزێن ئێمناهیێ هاتینه كوشتن و هژماره‌ك ژ ئه‌ندامێن په‌رله‌مانێ ئۆرۆپا ژی دیار كرن كو ژ به‌ر كوشتنا زارۆیان و بكارئینانا توندوتیژیێ ل هه‌مبه‌ر خه‌لكی دڤێت ده‌ست ب سزادانا ئیرانێ بهێته‌كرن.
رێكخستنا لێبۆرینا نێڤده‌وله‌تی راگه‌هاند كو ل گۆر ئامارێن ل به‌ر ده‌ستێ وان ژ رۆژا ده‌ستپێكرنا خوه‌نیشادانێن ڤێ دووماهیێ هه‌تا نها ٢٨ زارۆ ب ده‌ستێ هێزێن ئێمناهیێ یێن ئیرانێ هاتینه كوشتن و گه‌له‌ك زارۆ ژی بریندارن و هه‌روه‌سا پتر ژ دوسه‌د زارۆ ژی هاتینه ده‌سته‌سه‌ر كرن و توندوتیژی ل هه‌مبه‌ر زارۆیان دهێته بكارئینان و ئه‌و یه‌ك ژی ب چو ره‌نگه‌كێ ناهێته قه‌بوول كرن.
هه‌مان رێكخستنێ ئه‌و یه‌ك ژی دیار كریه كو ئیرانێ هێلا ئینتێرنێتێ ژی بڕیه دا كه‌س نه‌زانیت كا ل وی وه‌لاتی چ روو دده‌ت ئه‌و یه‌ك ژی دهێته رامانا بنپێكرنا مافێن مرۆڤی و دڤێت د ئاستێ نێڤدوه‌له‌تی دا ده‌ست ب سزادانا ئیرانێ بهێته كرن.
ل ئالیێ دی هژماره‌ك ژ ئه‌ندامێن په‌رله‌مانێ ئۆرۆپا دیار كرن كو یا نها ل ئیرانێ روو دده‌ت ب چو ره‌نگه‌كێ ناهێته قه‌بوولكرن، كوشتنا زارۆیان ب ده‌ستێ هێزێن ئێمناهیێ یێن ئیرانێ تاوانه‌ك مه‌زنه و دڤێت وه‌لاتێن ئێكه‌تیا ئۆرۆپا ده‌ست ب سزادانا ئیرانێ بكه‌ن.
جۆ بایدن سه‌رۆكێ ئه‌مریكا ژی راگه‌هاند كو ئه‌و وه‌كو ئه‌مریكا پشته‌ڤانیێ ل خوه‌نیشادانێن نها ل ئیرانێ دكه‌ن و ره‌وشا نها ژی نیشا دده‌ت كو ئیران نه‌شێت وه‌كو جارێن بۆری خه‌لكی سه‌ركوت بكه‌ت، خوه‌نیشادان ل هه‌موو ده‌ڤه‌رێن ئیرانێ به‌لاڤ بووینه و دڤێت هێزێن ئیرانێ ده‌ست ژ كوشتنا خه‌لكی به‌رده‌ن، چونكی خه‌لكێ ئیرانێ داخوازا مافێن خوه دكه‌ن، وان دڤێت ئازاد بژین، رژێما نها رێ ل ئازادیان دگریت و ژ به‌ر هندێ ژی خوه‌نیشادانێن ل ئیرانێ رۆژ ب رۆژێ به‌رفره‌هتر دبن و ده‌ستهه‌لاتا ئیرانێ ژی نه‌شێت ڤێجارێ ب ساناهی خه‌لكی بێده‌نگ بكه‌ت.
ل ئالیێ دی خوه‌نیشادانێن ل ئیرانێ و رۆژهه‌لاتێ كوردستانێ به‌رده‌وام دكه‌ن و ل گۆر ئاماره‌كا رێكخستنا مافێن مرۆڤی یا رۆژهه‌لاتێ كوردستانێ هه‌تا نها ٢٣٨ كه‌س هاتینه كوشتن و پتر ژ ٥ هزار كه‌سان ژی بریندار بووینه و رێژه‌یا دروست یا كه‌سێن كو هاتینه ده‌سته‌سه‌ركرن ژی ناهێته زانین، هێزێن ئیرانێ ب هه‌موو ره‌نگه‌كێ بزاڤا سه‌ركوتكرنا خوه‌نیشادانان دكه‌ن لێ نها ل هه‌ر چار ئالیێن ئیرانی وه‌لاتی ل دژی ده‌ستهه‌لاتێ ده‌ست ب خوه‌نیشادانان كرینه.
چاڤدێرێن سیاسی ژی دیار دكه‌ن كو پشته‌ڤانیا وه‌لاتێن جیهانێ و ب تایبه‌تی ژی خوه‌نیشادانێن وه‌لاتیێن ئیرانێ ل ئه‌مریكا و ئۆرۆپا وه‌سا كریه كو خه‌لك پتر د رژد بوون و ژ به‌ر هندێ ژی خوه‌نیشادان هه‌تا نها به‌رده‌وام دكه‌ن و ئێدی خه‌لك ژ هێزێن ئێمناهیێ ناترسن.
