ژ به‌ر ڤى ئه‌گه‌رى ئێدى خه‌لك چيمه‌نتۆيا خۆمالى ناكرن
ئەڤرۆ نيوز:
رێڤەبەرا گەشەپێدانا پێشەسازی ل پارێزگەھا دھۆک ئاشکراکر کو ئەڤە ژ سالا 2015 وەرە چیمەنتوو ژ کارگەھا تاسلوجە یا سلێمانیێ بۆ ھەر دو پارێزگەھێن ھەولێر و دھۆک نەھاتیە و ئەگەر ژی بۆ بلندبوونا بھایێ چیمەنتویێ ڤەگەراند.
خانم نازدار عەبدالقادر حسێن، رێڤەبەرا گەشەپێدانا پێشەسازی ل پارێزگەھا دھۆک بۆرۆژناما ئەڤرۆ گۆت: ماوێ سێ سالانە چیمەنتوو ژ کارگەھا تاسلوجە بۆ دھۆک نەھاتیە و ئەڤە چونکو چیمەنتوو ل کارگەھێ یا گرانە و ھەتا دگەھیتە پارێزگەھا دھۆک گەلەک گران لسەر وەلاتیان راوستیت و دیسا ھەولێرێ ژی ب ھەمان شێوە ماوێ سێ سالانە چیمەنتوو ژ کارگەھا تاسلوجە نەوەرگرتیە.
نازدارێ، ئاشکراکر ژی کو تەنا چیمەنتوویێ کارگەھا تاسلوجە تەنی ب 60 ھزار دیناران دەتە بەلندەری، ھەتا دگەھیتە پارێزگەھا دھۆکێ تەن دکەھیتە 76 ھزار دیناران، بەرامبەر چیمەنتوویا تورکی ل بازارێ دھۆکێ ئەرزانترە ژ یا کوردستانێ و کارگەھا سلێمانیێ لەوما پتر خواست ل سەر چیمەتوویا تورکی ھەیە ژ یا حوکمەتا ھەرێما کوردستانێ.
نازدار عەبدالقادر ئەو ژی گۆت: بەری سالا 2015 رۆژانە پێنچ ھزار تەنێن چیمەنتووویێ ژ کارگەھا تاسلوجە سلێمانیێ گەھشتنە پارێزگەھا دھۆکێ و دھاتنە بەلاڤەکرن ل سەر ھەموو قەزایێن پارێزگەھێ، لێ نوکە کەسەک خوە تۆمارناکەت بۆ وەرگرتنا چیمەنتوویێ.
رێڤەبەرا گەشەپێدانا پیشەسازی ئەو ژی گۆت: بۆ خەلکێ قەزایێن پارێزگەھێ وەک زاخۆ و ئاکرێ و ئامێدی گەلەک ئاریشە دروست بوون دا چیمەنتوو ھێتە سێمێلێ و دڤێت خەلکی بخو بربا قەزایێن خوە و ئەڤێ چەندێ ژی بارگرانی بۆ وەلاتیان دروست کر و تەن پتر گران دبوو.
خانم نازدار، چیمەنتوویا کوردستانێ کوالێتیا وێ گەلەک یا باشە چونکە ھەتا سالا بوری ژی ل بن کونترۆلا کومپانیەکا فەرنسی بوو و خەلکی گەلەک حەزێ دکر و قەیرانێ کارتێکرن ل سەر دکر و چیمەنتوویا وەلاتێن بیانی ژی کارتێکرن ل سەر وەلاتیان کر.
رێڤەبەرا گەشەپێدانا پیشەسازی ئەو ژی دیارکر کو پێشنیار داینە وەزارەتا داریی یا حوکمەتا ھەرێما کوردستانێ کو کارگەھا تاسلوجە تەنێ چیمەنتوویێ بکەتە 40 ھزار دینار و 16 بۆ ڤەگوھاستنێ ھەتا گەھشتبا پارێزگەھا دھۆک دا بیتە 56 ھزار دینار و ئەڤە ژی دێ پتر خەلکێ کوردستانێ مفایی ژێ وەرگریت، لێ وەزارەتا دارایی رازی نەبوو گۆت بھایێ کێمە، ئەڤە پێشنیارا ھەرسێ پارێزگەھێن ھەرێما کوردستانێ بوو بۆ وەزارەتا دارایی .
