ژ بوو گه‌هشتنا ئارمانجێ بتنێ رێيه‌كێ بكاربینه
ئه‌ڤرۆ نیوز ، نه‌وزاد هلۆرى:
ئارمانج ئه‌و رێكه یا كو ژیانا مرۆڤى یا ئاینده لسه‌ر دهێته ئاڤه‌دانكرن ، و به‌لێ هه‌ر كه‌سه‌كێ رێكه‌كا تایبه‌ت هه‌یه هه‌تا كو دگه‌هیته وێ ئارمانجێ ، ، به‌لێ د جڤاكێ مه دا هنده‌ك كه‌س كومه‌كا ئارمانج و رێیان پێكڤه دگرن كو ئه‌ڤ یه‌ك ژى شاشیه‌كا به‌رچاڤه ژ بوو نه گه‌هشتنا وێ ئارمانجێ.
شڤان قه‌دشى وه‌لاتیه‌كه دیاركر كو بو ب ده‌ستڤه ئینانا ئارمانجان رێكه‌كا روون و ئاشكرا پێدڤێت و گوت : ( گه‌له‌ك جاران مرۆڤ دبینیت كو كه‌سه‌كێ دڤێت بگه‌هیته تشته‌كێ دهه‌مانده‌م دا هنده‌ك تشتێن دن ژى دگه‌ل دبه‌تن هه‌ر بوو نموونه كه‌سه‌كێ دڤێت بگه‌هیته ئارمانجا خوه ب رێكا كاره‌كێ وه‌كو خواندن و د هه‌مان ده‌م دا دى َدگه‌ل ڤێ یه‌كێ ژى كاره‌كێ دارتاشى یان هه‌ر كاره‌كى َدن كه‌تن و د ئه‌نجام دا چوو ژ وان نابه‌تن سه‌رى ، ب راستى ئه‌ڤه تشته‌كێ شاشه ژ به‌ركو دبیت ب ره‌نگێ پێتڤى سه‌ركه‌فتنێ نه‌ئینیت)
دیاركر ژى دڤێت كه‌سه‌كێ دژیانێدا هنده‌ك رێك هه‌بن بو ب ده‌ستڤه ئینانا ئارمانجان ژ به‌ركو مروڤێن بێ ئارمانج وه‌كو مرۆڤێن دینن چونكى بتنێ دینان چوو ئارمانج نینه و لسه‌ر ئارمانجێن كه‌سانێن دن برێڤه دچن.
یاسین محه‌مه‌د ڤه‌كوله‌ره‌كێ جڤاكى یه بڤى ره‌نگى پێناسا ئارمانجێ بو ئه‌ڤرۆ نیوز كر و گۆت : ( ئارمانج ئه‌وه كو مرۆڤى نه‌خشه‌كێ رێك و پێك و دانایى هه‌بیت به‌رى ده‌سپێكرنا كاره‌كێ داكو ب وى كارى بكاریت ژیانا خوه لسه‌ر گه‌رنتی و ببیته كه‌سه‌كێ به‌رهه‌مدار چ بخو یان بۆ جڤاكێ ، و تشتێ مرۆڤى پالده‌تن بو ب ده‌ستڤه ئینانا ئارمانجان دوو تشتن ئه‌و ژى تشتێن كه‌سایه‌تى وه‌كو ناڤ و ده‌نگى ، و یا دوویێ بده‌ستڤه ئینانا پله‌یانه وه‌كو كاركرن ل جهه‌كێ بو به‌رژه‌وه‌ندیا گشتى كو خه‌لكى پتر چاڤ ل ڤێ یه‌كێ یه ، و ئه‌و ژى ژ به‌ر وێ یه كو وان هنده‌ك ئارمانج ده‌ستخوڤه ئینانه وى ژى دڤێت ئه‌و ژى بگه‌هیتێ ، به‌لێ وى پێچێنابیت وان ئارمانجان ب ده‌ستخوڤه بینیت ژ به‌ركو رێكه‌كا شاشه واته دڤێت هه‌ر كه‌سه‌كێ رێ:ه‌ك هه‌بیت بو بده‌ستڤه ئینانا ئارمانجان ، و سه‌ربوران ژ وان كه‌سان وه‌ربگریت یێن كو به‌رى خوه مفا ژ ئارمانجێن خوه وه‌رگرتین )
هێشتا گوت : ( هه‌موو كه‌س دشێت وى تشتى ب ده‌ستڤه بینیت یێ وى بخو نه‌خشه كرى وه‌كو ئارمانج، به‌لێ دڤێت مرۆڤى رێكێن تایبه‌ت ژى هه‌بن بو گه‌هشتنا وان ئارمانجان ژ به‌ركو نها جیهان د چه‌رخه‌كێ پێشكه‌فتى و بله‌زدا د ژیت و نابیت گورانكاریێن ژیانێ وه‌ل مروڤى بكه‌ن كو ده‌ست ژ ئارمانجێ، خوه به‌رده‌تن )
دێژین عه‌بدولخالق كو ئه‌و ژى كابانیه‌كا مالێ یه دیاكر تشه‌كێ شاشه مرۆڤ كومه‌كا ئارمانجان پێكڤه بده‌ته به‌رسینگێ خوه و گوت : ( ره‌نگه هنده‌ك مرۆڤ هه‌بن كو نه‌خشه‌كێ بو ژیان و ئارمانجێن خو بدانن ، به‌لێ د هه‌مان ده‌م دا هنده‌ك مرۆڤێن دن ژى هه‌نه ب ره‌نگه‌كێ پێدڤى ئارمانجێن خو برێڤه نابه‌ن ژ به‌ركو شاش تێدگه‌هن و ئه‌ز ڤێ دزڤرینم بو نه‌بوونا پروگرامێن پێدڤى د پروسا په‌روه‌ردێ و فێركردنێ دا ل قوتابخانێن مه یان نه‌بوونا شاره‌زایێ ژلایێ دایباباب ، هه‌ر بوو نموونه كچه‌ك خودان ئارمانجه كو خواندنه و به‌رى بگه‌هیته ئارمانجا خوه دێ شوو كه‌تن ، و ب شووكرنێ دێ ده‌ست ب ئارمانجا خوه به‌رده‌تن كو ئه‌ڤ یه‌ك ژى دهێت نیاسین ب ئارمانجێن بێ به‌رهه‌م )
یاسین محه‌مه‌د ڤه‌كوله‌رێ جڤاكى ددرێژاهیا ئاخفتنێن خودا دیاركر ژى كو دوو تشت دروسته مرۆڤ حه‌سودیێ بو ببه‌ت كو بگه‌هیتێ و كار بكه‌ت بو وێ ئارمانجێ ئه‌و ژى ئه‌گه‌ر ئێك خودان زانین بیت یێ دى خودان سه‌روه‌ت و سامان بیت و بو به‌رژه‌وه‌ندیا گشتى و جڤاكى بكاربینیت و گوت : ( تشتێ دبیته ئه‌گه‌را هندێ كو مرۆڤ نه‌گه‌هیته ئارمانجێن خو ئه‌وه دبیت رێكا وى یا شاش بیت یان مرۆڤه‌كه كومه‌كا ئارمانجان پێكڤه هه‌نه و نه‌شێت وان ئارمانجان هه‌موویان پێكڤه ببه‌ت ، و دیسا ئه‌م د جڤاكه‌كێ دا دژین نه‌دهاریكارن كو مرۆڤ بگه‌هیته ئارمانجا خو بو نموونه ئێكێ حه‌زا هه‌یى ببیته هونه‌رمه‌ند كه‌سێن ده‌وروبه‌رێن وى هه‌موو دێ بێژنێ ئه‌و نه‌شولا ته‌یه و تو نه هه‌ژى هندێى ببیه هونه‌رمه‌ند )
ل دوماهیێ ڤه‌كوله‌رێ جڤاكى گوت : ( گه‌هشتنا ئارمانجێ پرۆژه‌كێ ستراتیجى یه و هه‌روه‌كو شرۆشه‌كێ یه و كه‌سێن كو دگه‌هنه وان ئارمانجان ئه‌ون یێن كو بتنێ ئێك رێك گرتى و هه‌موو ده‌مێ خو بكارئینیت بو گه‌هشتنا وێ ئارمانجێ و ژ شكه‌ستنا ئارمانجا وى نیشانكرى دوو دل نابیت و چاڤ ل وان كه‌سان دكه‌ت یێن كو دبه‌رژوه‌ندیا جڤاكى دا بیت ، چونكى كه‌سێن كار دكه‌ن بو ب ده‌ستڤه ئینانا به‌رژه‌وه‌ندێن تایبه‌ت ئارمانجێن وان گه‌له‌ك ددرێژنینه )
