ژ بۆ ئاشتیێ بەرهەڤین ل گەل هەموو وەلاتێن دەڤەرێ کار بکەین
جێگرێ سەرۆک کۆمارێ ئیرانێ راگەهاند وەلاتێ وی ل دووڤ چو شەڕان نینە و ئیرانێ دڤێت شەڕێ نها ل غەزە ب دووماهی بهێت، پێدڤیا رۆژهەلاتا ناڤین ب ئاشتیێ هەیە و ئیران بەرهەڤە ژ بۆ ئاشتیێ و ئارامیێ ل گەل هەموو وەلاتێن دەڤەرێ کار بکەت.
محەمەد جەواد زەریف جێگرێ سەرۆک کۆمارێ ئیرانێ د داخۆیانیەکێ دا بۆ دەزگەهێن راگەهاندنێ ل دۆر ئێرشێن ڤێ دووماهیێ یێن ئسرائیلێ ل غەزە و باشوورێ لوبنانێ ئاخڤی و دیار کر، ب شەڕی چو پرسەک ناهێتە چارەسەرکرن، شەڕێ نها زیانێن خوە یێن گەلەک مەزن بۆ دەڤەرێ هەیە، وەکو ئیران مە نەڤێت شەڕێ نها بەردەوام بیت پێدڤیا دەڤەرا مە ب ئارامی و ئاشتیێ هەیە و گۆت: (ئەم بەرهەڤین ل گەل هەموو وەلاتێن دەڤەرێ کار بکەین دا رەوشا نها یا ئالۆز ب دووماهی بهێت، ئەم ژ بۆ ئاشتیێ و ئارامیێ کار دکەین، دڤێت ئەمریکا و وەلاتێن رۆژئاڤایی ژی فشارێن خوە یێن ل سەر ئسرائیلێ زێدەتر لێ بکەن دا ئسرائیل یا نەچار بیت شەڕێ نها ب دووماهی بینیت، مخابن ژ بەر ئێرشێن ڤێ دووماهیێ یێن ئسرائیلێ ل سەر باشوورێ لوبنانێ گەلەک وەلاتیێن سڤیل بووینە قوربانی و ئەو یەک تاوانەکا مەزنە و دڤێت رێگری ل ئسرائیلێ بهێتە کرن).
جێگرێ سەرۆک کۆمارێ ئیرانێ ئەو یەک ژی دیار کر، مە ژ بۆ وەلاتێ خوە و هەموو وەلاتێن جیهانێ ئارامی و ئاشتیێ دڤێت، جیهان ب شەڕی پێش ناکەڤیت، شەڕ ئاستەنگیێن گەلەک مەزن ل هەمبەر پێشڤەچوونا جڤاکێ مرۆڤاتیێ دروست کریە، چو وەلاتەک ب شەڕی ناگەهیتە وێ ئارمانجا کو کار بۆ دکەت، ژ بەر ڤێ یەکێ ژی وەکو ئیران مە دڤێت ل گەل هەموو وەلاتێن دەڤەرێ پێکڤە کار بۆ راگرتنا شەڕێ نها و ئاشتیێ بکەین و گۆت: (بەری نها ئەمریکا و وەلاتێن دی یێن جیهانێ داخواز ژ مە کرن کو ل هەمبەر ئسرائیلێ چو نەکەین دا ئاگربەست بهێتە راگەهاندن و شەڕ ب دووماهی بهێت، لێ مخابن هەتا نها ژی ئاگربەست نەهاتیە راگەهاندن و ڤێ دووماهیێ ئسرائیلێ دەست ب ئێرشێن دژوار ل دژی خەلکێ سڤیل یێ لوبنانێ ژی کریە).
محەمەد جەواد زەریف د دووماهیا ئاخڤتنا خوە دا ئەو یەک ژی دیار کر، وەکو ئیران ئەو دێ ل هەمبەر هەر ئێرشەکێ خوە پارێزن، هەر ئێرشەک ل سەر بەرژەوەندیێن ئیرانێ هەبیت ئیران دێ یا پێدڤی کەت، لێ د هەمان دەمی دا ئارمانجا سەرەکی یا ئیرانێ ئەوە دا رۆژهەلاتا ناڤین بەر ب قۆناغەکا نوو ڤە بچیت، قۆناغا ئاشتی و ئارامیێ، ژ بەر ڤێ یەکێ ژی دڤێت ئەمریکا و وەلاتێن دی یێن رۆژئاڤایی ژی سۆزێن کو بەری نها بۆ راگرتنا شەڕی داینە بجه بینن.
