ژ بۆ قووناغا ئاشتیێ دڤێت هەموو هێزێن سیاسی هاریکار بن
پەیڤدارا دەم پارتیێ دیار کر، نها قووناغا ئاشتیێ مژارا سەرەکی یا تورکیا یە، ژ بۆ پێشڤەبرنا قووناغا ئاشتیێ ژی دڤێت هەموو هێزێن سیاسی یێن تورکیا هاریکار بن، مخابن هندەک هێز وەسا دبینن تنێ دەم پارتی بەرپرسیارە ژ پێشڤەبرنا قووناغا ئاشتیێ، ئەو یەک شاشیەک مەزنە و دڤێت هەموو هێزێن سیاسی یێن تورکیا هاریکار بن دا ئەم بشێن پێکڤە قووناغا ئاشتیێ بەر ب پێشڤە ببەین.
ئایشەگۆل دۆغان ئەو یەک ژی دیار کر، مەترسی ل سەر قووناغا ئاشتیێ هەنە، چونکی هندەک هێز ناخوازن رەوشا تورکیا ئارام بیت، وان دڤێت هەردەم ل تورکیا شەڕ و ئالۆزی هەبن و ژ بەر ڤێ یەکێ ژی ئاستەنگان دروست دکەن، وەکو دەم پارتی ئەم دبێژین دڤێت هەموو هێزێن سیاسی و سازیێن جڤاکی سڤیل یا پێدڤی بۆ پێشڤەبرنا قووناغا ئاشتیێ بکەن، چونکی سەرکەفتنا قووناغا ئاشتیێ دێ بیتە ئەگەر رەوشا ژیانا وەلاتیان ل تورکیا باشتر بیت.
