ژ بۆ پێشڤەبرنا قۆناغا ئاشتیێ ل تورکیا چو نەهاتیە کرن
هاکان ئۆکچال دبلۆماتکارێ بەرێ یێ تورکیا و مامۆستایێ زانکۆیێ د داخویانیەکێ دا بۆ مالپەرێ T24 دیار کر، کو قۆناغا ئاشتیێ ل سەر داخوازا دەولەت باخچەلی سەرۆکێ پارتا بزاڤا نەتەوەپەرست دەستپێکر و ب بانگەوازیا ئۆجەلانی ژ ئیمرالیێ ژی گەهشتە ئاستەکێ بلند، مخابن نها قۆناغا ئاشتیێ خەتمیە و جارەکا دی هیڤیێن بۆ ئاشتیێ ل تورکیا گەلەک لاواز بووینە و گۆت: (وەلاتیێن تورکیا ب گشتی و ب تایبەتی ژی کورد جارەکا دی دلگرانن، چونکی هەتا نها ب کریاری چو پێنگاڤ نەهاتینە ئاڤێتن و داخویانیێن ئەردۆغانی و بەرپرسێن دی یێن تورکیا ل دۆر ئاشتیێ ژی وەسا نیشا ددەن کو دەولەتا تورکیا نەڤێت چو پێنگاڤەکێ بهاڤێژیت).
ناڤهاتی ئەو یەک ژی دیار کر، رۆژانە بەرپرسێن تورکیا داخواز ژ پەکەکێ دکەن کۆنگرێ خوە ساز بکەن و ب فەرمی خوە هلوەشینن و چەکێن خوە ژی رادەست بکەن، لێ رۆژانە تورکیا ئێرشی پەکەکێ دکەت و سەرکردەیێن پەکەکێ یێن ل قەندیلی ژی دبێژن هەتا ئێرشێن تورکیا بەردەوام بن ئەو نەشێن کۆنگرەی ساز بکەن و دبێژن دڤێت ئۆجەلان بریارا سازکرنا کۆنگرەیی و هلوەشاندنا پەکەکێ بدەت، لێ دیارە بەرپرسێن تورکیا ژی بەرهەڤ نینن ئاسانکاریان بۆ ڤێ یەکێ بکەن دا ئۆجەلان بشێت ب رەنگەکێ ژ رەنگان سەرپەرشتیا کۆنگرەی بکەت، چونکی سەرکردەیێن پەکەکێ ناخوازن بێی ئۆجەلانی کۆنگرەیێ هلوەشاندنا پەکەکێ ساز بکەن و هەتا نها دەولەتا تورکیا ژی ب رەنگەکێ ئەرێنی بەرسڤا پەکەکێ نەدایە و گۆت: (بەری چەند رۆژان وەزیرێ داد یێ تورکیا ژی ب داخویانیێن خوە پتر رەوش ئالۆز کر دەمێ گۆتی ئەو ل گەل دەم پارتی چو دانوستاندنان ناکەن، هەکە دانوستاندن نەبن وی دەمی پا دێ چاوا پرسەکا مەزن وەکو پرسا کوردی هێتە چارەسەر کرن و چاوا دێ پەکەکە دەست ژ چەکی بەردەت، بێگومان ئەو یەک ژی نیشا ددەت قۆناغا ئاشتیێ د رەوشا نها دا خەتیمە).
دبلۆماتکارێ بەرێ یێ تورکیا و مامۆستایێ زانکۆیێ ئەو یەک ژی دیار کر، گەلەک کەس دبێژن ئۆجەلانی داخواز ژ پەکەکێ کریە بێی مەرج خوە هلوەشینیت، رەنگە ب فەرمی وەسا بیت لێ رەوش گەلەک جوداترە و بەرپرسێن تورکیا گەلەک جاران سەرەدانا ئیمرالیێ کرینە و ل گەل ئۆجەلانی دانوستاندن کرینە، ئانکۆ قۆناغا ئاشتیێ هەما وەسا ب داخویانیەکا دەولەت باخچەلی دەستپێ نەکریە، ل هەمبەر هلوەشاندنا پەکەکێ دڤێت دەولەتا تورکیا د بیاڤێن قانوونی و سیاسی دا هندەک پێنگاڤان بهاڤێژیت، لێ هەتا نها ئەو یەک ژی نەهاتیە کرن و گۆت: (پێدڤیە دەولەتا تورکیا رێ بۆ ئۆجەلانی خوەش بکەت دا سەرپەرشتیا کۆنگرەیێ هلوەشاندنا پەکەکێ بکەت و ل هەمبەر دا دڤێت دەولەتا تورکیا ژی هندەک پێنگاڤێن دلخوەشکەر بهاڤێژیت، هەتا ئەو یەک نەهێتە کرن کەس نەشێت بەحسێ پێشڤەچوونا قۆناغا ئاشتیێ و تورکیایەک بێ تیرۆر بکەت).
