ژ بۆ چـارەسەرکرنا پرسـا کوردی کارەکێ مەزن دهێتە کـرن
ب، سه‌رجان:
ئێک ژ دامەزرێنەرێن ئاکپارتیێ و شیرەتکارێ بەرێ یێ ئەردۆغانی دیار کر، نها قۆناغەکا نوو و دیرۆکی ل تورکیا دەستپێکریە، گەلەک کەس دبێژن هێشتا دیار نینە کا دێ ئەنجامێ قۆناغا نها چ بن، ئەو یەک گرنگ نینە بەلکو یا گرنگ ئەوە یا نها دهێتە کرن گەلەک دیرۆکی یە، چونکی نها زەمینەکا گەلەک باش و گونجای بۆ ئاشتیێ و چارەسەرکرنا پرسا کوردی ل تورکیا هاتیە پێش و گۆت: (بەری نها ژی قۆناغەکا ئاشتیێ ل تورکیا دەستپێکربوو وی دەمی من وەکو شیرەتکارێ ئەردۆغانی بۆ چارەسەرکرنا پرسا کوردی ل تورکیا کار دکر، لێ مخابن وی دەمی گەلەک هێزێن سیاسی ل تورکیا ل دژی ئاشتیێ و چارەسەرکرنا پرسا کوردی بوون، پارتا بزاڤا نەتەوەپەرست وی دەمی دگۆت کارێ نها ئاکپارتی دکەت خیانەتە، لێ نها پارتا بزاڤا نەتەوەپەرست سەرکێشیا قۆناغا ئاشتیێ دکەت، ئەو یەک ژی گەلەک گرنگە).
محەمەد ئیحسان ئارسلان ئەو یەک ژی دیار کر، تشتێ ئەز دزانم هەتا نها کارەکێ گەلەک مەزن هاتیە کرن، ڤێجارێ هەموو هێزێن سیاسی پشتەڤانیێ ل ئاشتیێ و چارەسەرکرنا پرسا کوردی ل تورکیا دکەن، پارتێن ئۆپۆزسیۆنێ ژی دبێژن دڤێت پرسا کوردی ل پەرلەمانێ تورکیا بهێتە چارەسەرکرن، نها د ناڤ هێزێن سیاسی و هەتا د ناڤ جڤاکێ تورکیا دا کەس ل دژی ئاشتیێ و چارەسەرکرنا پرسا کوردی نینە، ئەو یەک ب سەرێ خوە سەرکەفتنەکا گەلەک مەزنە بۆ تورکیا و گۆت: (دەولەتا تورکیا گەهشتە ڤێ باوەریێ کو نەشێت ب شەڕی کوردان ژناڤ ببەت یان ژی وەکو دبێژن تیرۆرێ ژناڤ ببەت، ل ئالیێ دی پەکەکە ژی گەهشتیە ڤێ باوەریێ کو ب شەڕی نەشێت مافێن کوردان بدەستڤە بینیت، ئانکۆ هەر دو ئالی ژی نها گەهشتینە ڤێ باوەریێ دڤێت ب رێیا دانوستاندنان و ئاشتیێ پرسێن هەی چارەسەر بکەن، ئەو یەک ژ بۆ تورکیا و کوردان گەلەک گرنگە و جهێ دلخوەشیێ یە، چونکی ژ بەر شەڕێ چەندین سالێن بۆری زیانێن گەلەک مەزن گەهشتنە تورکیا و براستی ژی دەم یێ هاتی شەڕێ نها ل تورکیا بهێتە راگرتن و ئەو یەک جهێ دلخوەشیێ یە).
شیرەتکارێ بەرێ یێ ئەردۆغانی ئەو یەک ژی دیار کر، نها ل سووریێ قۆناغەکا نوو دەستپێکریە و دڤێت تورکیا خواندنەکا راست بۆ رەوشا سووریێ بکەت، دڤێت تورکیا خوە نێزیکی کوردێن سووریێ بکەت، پێدڤیە تورکیا پەیوەندیێن خوە ل گەل کوردێن سووریێ باش بکەت، هەکە هەرێمەکا کوردی ل سووریێ بهێتە ئاڤاکرن ژی دڤێت تورکیا وێ یەکێ وەکو مەترسی بۆ خوە نەبینیت، بەلکو تورکیا دشێت ب رێیا باشکرنا پەیوەندیێن ل گەل کوردان پێگەهێ خوە ل سووریێ گەلەک بهێزتر بکەت.
ناڤهاتی د دووماهیا ئاخڤتنا خوە دا ئەو یەک ژی نەڤەشارت کو گوهۆڕینێن نها ل سووریێ دێ کاریگەریا خوە یا گەلەک مەزن ل سەر پاشەرۆژا کوردان ل تورکیا ژی کەت، ژ بەر ڤێ یەکێ گرنگە تورکیا خواندنەکا راست بۆ رەوشا سووریێ بکەت، دوژمناتیا کوردێن سووریێ دێ زیانەکا خوە یا گەلەک مەزن بۆ تورکیا هەبیت.
