ژ بێهنا رەحمەتی
نڤیسین: كۆلێت خوری
وەرگێران: عزەت یوسف
هەڤالێ وی ژێ پرسی: تە چەوا هەڤژینا خۆ نیاسی؟
ب دلساخی بەرسڤا وی دا: ب رێكا سەی.
هەڤالێ وی ب مەندەهۆشی لێڤەگەراند: ب رێكا سەی؟
د بەرسڤدا گۆتی: بەلێ، ل ئێڤاریەكا بهاری، پازدە سال بەریا نها، ئەز و سەیێ خۆ د گەڕیاین، دەما كچەكا جوان نێزیكی من بووی و دەست ب پشتا سەی دا ئینای و بری و مەندەهۆشیا خۆ بۆ دەربڕی، هەتا پێشنیار كر ژی كو ژ من بكڕیت، بلا ب هەر بهایەكی بیت، لێ من داخوازا لێبۆرینێ ژێكر و من گۆتێ: ئەز گەلەك یێ پێڤە گرێدایمە و نەشێم دەست ژێ بەردەم.
مە هژمارێن تەلەفونێن ئێكتر وەرگرتن و هەردەم تەلەفونا من دكر داكو ژ سلامەتیا سەی پشتراست بیت.
پاشی، ژ بۆ حێبەتیا من، داخواز ژ من كر، كو ئەم پشكدار بین د سەی دا ب پێكئینانا هەڤژینیێ! ئەڤە ژی راستی قەومی و بەری مرنا سەی دو زارۆك مە هەبوون.
پاش مرنا سەی و ئێشانا ڤەقەتیان و خەما ژ دەستدانا وی مە دیتی، من گۆتێ تە هەمی ئازادی هەیە ژ من جودابی پشتی ئەو پەیوەندییا بنەڕەتی و سەرەكییا دناڤبەرا مە دا نەمای.
لێ هەڤالێ من، وێ ئەز شاش كرم ب گۆتنا خۆ: نەخێر، مەحالە ژ تە جودا ببم، بێهنا رەحمەتی ژ تە دهێت!!
