ژ بەر ئاریشەیێن ئەردی خەلكێ گوندێ تاژیكا خرڤەبوونەكا نەرازیبوونێ ئەنجام دا
ئامێدیێ، مەحمود نهێلی:
ژ بەر كێشەیێن زەڤی و ئەردان و چارەسەرنەكرنا وانا، هەژمارەكا خەلكێ گوندێ تاژیكا یێ سەر ب ناوچەدارییا سەرسنكێ ڤە خرڤەبوونەكا نەرازیبوونی ئەنجام دا و رێكا سەرەكی یا د ناڤبەرا ئامێدیێ بۆ دهۆكێ بۆ دەمەكی گرتن و داخواز ژ جهێن پەیوەندیدار كرن، ئاریشەیێن وان بهێنە چارەسەركرن.
ئێك ژ وەلاتیێن رێك گرتی بۆ رۆژناما ئەڤرۆ دیار كر، كو ئەوان كێشە ل سەر ئەردی و ئاڤاكرنێ هەنە و بتایبەتی ژی ئاڤاكرنا خانیان دناڤ ئەردێ خوەدا و مێژەیە چاڤەرێ نە كو ئەف كێشەیە بهێنە ئێكلاكرن لێ تا نوكە چارەسەر نەبوویە و گۆت: ژ بەر وێ یەكی ژی مە فەردیت ئەم رێكێ بگرین بۆ وێ یەكێ حكۆمەت ل دووڤ داخازییا مە بهێت و ئەڤان ئاریشەیێن مە چارەسەر بكەت و هەروەسا مە چەندین داخازیێن دی هەنە و مە پێدڤی پتر ب گرنگی دانێ هەیە و پێدڤیە رێك بهێتە دان وەلاتی بۆ خوە خانیان ئاڤا بكەن بتایبەتی ژی ل ناڤ گوندی.
ناڤهاتی ئاشكرا كر، پشتی دەمەكێ كێم وان جارەكا رێك ڤەكریە ڤە و نەهێلای گەلەك ئاستەنگی بكەڤنە د رێكا هاتن و چونێ دا و هیڤی ژی خواستن ئاریشەیێن وان ب ئێك جاری بهێنە چارەسەركرن و رێك ب وان بهێتە دان جارەكا دی دەست ب ئاڤاكرنا خانیان بهێتە كرن.
