ژ بەر خەباتا عەبدولـلا گەلناسكی21 ئەندامێن خێزانا وی هاتنە زیندانكرن و ئەشكەنجەدان
سالار محەمەد دۆسكی:
1 – 3
عەقید، رەشید عەلی مووسا خەلكێ گوندێ گەلناسكێ سەر ب ناحیا مانگێشكێ ڤە، ژبنە مالەكا كورد پەروەر ل سالا 1966ێ ژ دایك بوویە، كو دبیتە برازیێ پێشمەرگەیێ هەر دو شۆڕەشێن ئیلۆن و گولانێ عەبدوللا گەلناسكی، ئاشكرا دكەت كو هەشت مام ل گەل بابێ وی چەندین ئەندامێن خێزانێ كو دبنە 21 ئەندام كەفتینە بن ئەشكەنجەدان و زیندانێن رژێما بەعس و هەمی گڤاشتن هاتینەكرن، كو مامێ وی خوە رادەست بكەت، زێدەباری چەندین ئەندام لبن ئەشكەنجەدانێ شەهید بووینە.
عەقید، رەشید عەلی مووسا گەلناسكی، د دیدارەكێ دا ل گەل رۆژنامەیا ئەڤرۆ گۆت: پێخەمەت دوزا مللەتێ كورد و پارتی دیمەكراتی كوردستان، (٢١) كەس ژ خێزان و بنە مالا مە ل سەر دەمێ رژێما بەعس هاتینە زیندانكرن و حوكم كرن، (٨) مامێن من بناڤێن (عەبدولا ، سەعید ، ئەبابكر ، عومەر، یەعقوب ، عەباس ، محەمەدتاهر و زبێر) ودگەل بابێ من (عەلی) كو دبیتە برایێ ئەوان یێ مەزن وخێزانێن ئەوان هەمی بدەستێن ئەمنا بەعسیان ڤە هاتینە گرتن وحوكوم كرن وئەگەرێ ئەوان گرتن و زیندانكرن و نەخۆشیان هەمیان ئەو بوو چونكە مامێ من پێشمەرگەیێ دێرین یێ شۆرەشا ئیلۆنێ و گولانێ (عەبدولا گەلناسكی) ل سالا (١٩٦١) گەهشتیە رێزێن شۆڕەشا كوردی و هەمی كەس و كارێن خویێن دویر و نێزك پێخەمەت رێبازا كوردینیێ و بتایبەت رێبازا پارتی و بارزانیێ نەمر هێلابوون، ئەڤجا د ئەنجامێن خەباتا وی یا لەشكری یا (٥٩) سالی دا هەمی ئەندامێن بنەمالاوی یێن مەزن و بچوویك كەتنە دبن زولما بەعسیان دا و گەلەك سەر ئەڤراز وسەر نشیڤی دیتن و هەر ژدەسپێكا شۆڕەشا مەزنا ئیلۆنێ یا (١٩٦١) و هەتا سەرهلدانا پیرۆز یاسالا (١٩٩١) وهەمی كەس كارێن وی ژ زیندانێن بەعسیان قورتال نەبوون، ودئەنجامدا زیان ڤێ كە فتیێن هەرە مەزن یێن ڤێ خۆگۆری كرنێ ژ ئەندام و خێزان و كەس وكارێن مالا مە بووینە، و د ئەگەرێ ڤێ خۆگۆری كرنێ دا (٢) برایێن من بناڤێن (مێرخان عەلی مووسا) و (وجهوەر عەلی مووسا) شەهید بووینە و دایك باب و (٢) برایێن من بناڤێن (عەلی مووسا عمر) و (سافیا عەبدوللا نەبی) و برایێن من بناڤێن (ئەحمەد عەلی مووسا) و (مووسا عەلی مووسا) زیندانیێن سیاسی نە.
ناڤبری هێشتا گۆت: من دڤێت بێژم بۆ و ژدانا ڤێ رژێما بەعسا گوڕ ب گوڕا ئیراقێ ، گونەها ئەڤان هەمی كەسان چیە كو هەمی پێكڤە بهێنە گرتن و حكوم كرن، وهندەك ب ئشكەنجەدانێ بهێنە شەهیدكرن و بتنێ ژ بەركو كەسەك ژ بنەمالێ هەمیێ گەهشتبیتە شۆڕەشێ ، بەلێ وەسا یا دیارە ژبەر رۆلێ قەهرەمانەكێ وەكی (مام عەبدوللا) ی و چەندین قەرەمانێن وەكی وی وەل ئەوان كریە كوهەردەم ترسنۆك بن و هەردەم ژچالاكیێن ئەوان بترسن وهزار و ئێك هزران بو بكەن لەورا هەر چ هزرا خراب و رەفتارا نەرەوا و دویر ژهەمی رەوشتەكی ب هاریكاریا دویڤەلانكێن خۆیێن ئەمنێ ئەو زلم و ستەم لسەر ئەڤێ بنەمالێ سەپاند بەلێ ئەڤرۆ بسەر بلندی ڤە دێ بێژم ئێكی بتنێ ژی ژئەڤێ بنەمالێ جارەكێ خۆ لبەر زولما ئەوان لانەدان و سەرێ خۆ بۆ نەچەماند سەرەرای وێ زولم تەعداریا مەزن و بێ رەحمانە ئەوا ئەوان دگەل هەمی ئەندامێن بنەمالێ كرین، ئەڤجا هندی من ل بیرە و من چاڤێن خۆ لڤێ دونیایێ ڤەكرین، و من ئەڤ رویدانە ژكەس و كارێن خۆ گوهلێ بووین و من ل دەف خۆ هەلگرتین من فەر دیت ژ بۆ رۆژەكا وەكی ئەڤرۆ بینمە بەرچاڤكرن ژ بۆ هندەكان یێن كو هەتا نوكە رۆلێ ئەڤی قەهرەمانی و ئەندامێن بنەمالا مام (عەبدوللا) ی نەزانیە و بۆ نفشێ نوی یێ بنەمالا مە داكو گەنجێن مە باش بزانن كانێ دایك و باب و كەس و كارێن ئەوان چەند رەنج و نەخۆشی و دەردەسەری دیتینە هەتا گەهشتینە ئەڤێ قۆناغا ئەڤرۆ ئەم هەمی ب ئازادی تێدا دژین، هەروەسا داكو هندەك كەس بزانن كانێ حەز ژێكرن و بەرخودان و خۆگۆری كرن ژبۆ ئاخ و گەل و وەلاتی چەند یا فەر و یا بزەحمەتە هەتا مرۆڤ دگەهیتە ئارمانجا خۆ.
هێشتا گۆت: هەر ژ دەستپێكا شۆڕەشێ ژیانا بنەمالا مە هەمی ب گرتن و ئەشكەنجە دان وحوكوم كرنێ ڤە چۆن ، بەلێ چ جاران ئەم بۆ ڤێ كوردینیێ و پارتایەتیێ پەشێمان نەبووینە، ژ بەركو هەر دكەڤندا و هەتا نوكە پارتی بوون دناخێ بنەمالا مەدا یاشین بووی و گەشە یا كری و هەتا نوكە ژی كاچەوا لدەمێ رژێمێ كەس ژگەنج و كەس و كارێن مە نەگەهشتبوونە دیڤەلانكێن بەعسیان و ئەڤرۆكە ژی ئێك ژ گەنج و كەسوكارێن بنەمالا مە نە گەهشتینە چ لایەنێن دی ژ بلی پارتی و ئەم ژدل و جان و ب باوەری و شانازیێ پێ دبەین، و بەلگە لسەر راستیا گۆتنا من ئەڤ رویدان و خۆگۆری كرن و بەرخودانێ یە یا هەمی ئەندامێن بنەمالا مە ئەنجام دای و بتایبەت زیندانكرنا هەر (٨) مامێن من و زیندانكرنا خێزانێن ئەوان و شەهیدبوونا هەردو برایێن من تێرا ئەوێ شاهدیێ نە كو ئەز بێژم وبەحس لێ بكەم،
دەمێ شۆڕەشا ئیلۆنێ دەستپێكری مامێ من (عەبدولا گەلناسكی) ل ژیێ (١٦) سالیێ دگەل بەرێز (سادق ئەحمەد گەلناسكی) گەهشتینە رێزێن پارتی دیموكراتی كوردستان ب سەرۆكاتیا بابێ نەتەوێ كورد (مەلا موستەفا بارزانی) و خەباتا شۆڕەش گێڕی و چەكداریێ هەلبژارت دژی حوكومەتا بەعس و كەتنە مەیدانا خەبات و بەرخۆدانێ دا و رۆژ بۆ رۆژێ خەباتا چەكداری دژی حوكمەتا ئیراقێ گەشتر و مەزنتر لێ دهات، و پێشمەرگەی چەپەرێن بەرخۆدانێ ل سەرانسەری كوردستانێ بهێز و موكوم كرن و دەمێ سەرقۆلێن پێشمەرگەی لسەر دەڤەرێ بەلاڤ دكرن چالاكیێن مامێ من (عەبدوللا گەلناسكی) دگەل مام (سادق گەلناسكی) پتریا جاران دكەفتنە دەڤەرا بەهدینان، ژبەر كو شەهرەزاریەكا باش لسەر خالێن دوژمنی ل دەڤەرێ هەبوو.
لەورا هەر ژدەستپێكا شەڕێ چەكداریێ چالاكیێن ئەوان كەتنە دسنورێ بادینان دا و بتایبەت كەتنە دسنۆرێ (لقێ ئێك) یا تێكۆشەر ، بەلێ ب مخابنی ڤە دێ بێژم هەر لسەرێ شۆڕەشا كوردی یا ئەوی سەر دەمی و هاتا نوكە نەحەزێن كوردینێ و پارتی و بارزانی دزۆر بوون، لەوڕا گەلەك كەس هەبوون خۆ كربوونە دیڤەلانكێن ئەمنا بەعس و بۆ ئەوان كارێ سیخوریێ دژی مللەتێ خۆ دكر ژبۆ پارەی و بەرژەوندیێن خۆ یێن تایبەت و (موخبری) ل كەس و كارێن خۆیێن نێزیك دكرن، ژبەر كو ژ خەلكێ دەڤەرێ بوون و هەمیا ئێك و دو دناسین و ئەگەر ئەو سیخور ژكەسانێن نێزیكی مە نەبان مادا عەرەبەكێ خەلكێ مووسل و بەغدا، یان یێ باشورێ ئیراقێ دا چ ژ كەسوكارێن پێشمەرگەیەكێ مە زانیت ئەگەر ئەو نەبان، لەورا ئەوان بەردەوام سیخورێن خۆ دناڤ خەلكێ مەدا بەلاڤ دكرن.
