ژ بەر قەرەبالغا بازارێ ئەینیێ خێزانان خانیێن خوە ل وێرێ دفروشن

ئه‌ڤرۆ نيوز:

راستە دبێژنێ مەیدانکا ئەینیان، بەلێ پشتی ھاتیە ڤەگوھاستن بۆ تاخێ زرکا، ل رۆژانێن پێنچشەمبی ھەر ژ سپێدێ و ھەتا درەنگی شەڤ یا ڤەکریە و ھژمارەکا زۆر یا خەلکێ دھۆکێ قەستا ڤێ مەیدانکێ دکەن و ئەڤە ژی بوویە ئەگەر کو جادەیێن تاخێ زرکا ھەموو ببنە پارکێن ترۆمبێلان و ژ بەر ھندێ ژی ئاکنجیێن تاخی قەستا پارێزگەھا دھۆکێ دکەن و ژێ دخوازن مەیدانک ل زرکا نەمینیت. بۆ دەمێ زێدەتر ژ سالەکێ یە، بازارێ ئەینیێ ژ تاخێ نزارکێ بۆ تاخێ زرکا ھاتیە ڤەگوھاستن و ڤەگوھاستنا ڤی بازاری خواست ل سەر کرینێ کێم کریە و ژ لایەکێ دیتر بوویە ئەگەر دوو وەلاتی ل تاخێ زرکا ژ وێ قەرەبالغیا بازاری دا دروست بیت خانیێن خوە ب فروشن.

حەجی شەفیق، ئاکنجیەکێ تاخێ زرکایە ل نێزیک مەیدانکا ئەینیان بۆ ئەڤرۆ دیار کر، بەری چەند رۆژەکان مە ھەموو خێزانێن نێزیک مەیدانکا ئەینیان سەرەدانەک برە پارێزگەھا دھۆکێ و مە چاڤ ب پارێزگارێ دھۆکێ ب وەکالەت کەفتیە و مە ھەموویان ژێ خواستیە مەیدانکا ئەینیان بھێتە ڤەگوھاستن ژ تاخێ زرکا و ب چو رەنگان ل وێرێ نەمینیت، چونکو زیانێن مەزن ب تاخێ مە کەفتینە و مە چو حال ب خوە نینە و ل ھەموو رۆژێن پێنچشەمبی و ئەینی بەردەرگەھێن مە پری ترۆمبێلن و ئەم نەشێین خوە ژ مالێن خوە دەرکەڤین، لەوما ئەم ل سەر داخوازیا خوە دێ د بەردەوام بین ھەتا کو مەیدانک ل تاخێ زرکا نەمینیت و ژ ناڤ مالان بھێتە ڤەگوھاستن.

وەلاتیەک ب ناڤێ عادل میکائیل عەلی کو ئاکنجیێ تاخێ زرکایە و ژ نەخوشیا بازارێ ئەینیێ دنالیت بو ئەڤرۆ دیارکر: مە ب چ رەنگەکێ خوەشی نینە ھەر ل رۆژا پێنج شەمبی ژ نیڤرۆ ھەتا دبیتە شەڤ ب درەنگی ڤە ل دەمژمێر(3:00) قەرەبالغیەکا مەزن ل ئەڤی بازارێ ئەینیێ ل زرکا بەلاڤ و دروست دبیت و زێدەباری وی دەنگێ بلندێ بازاری ژلایەکێ دیتر ڤە ھەمو جادە و کولانێن مە تژی ترۆمبێل دبن و ھاتن و چون ئالوز دبیت و ترۆمبێلێن مە ل ناڤ حەوشێن مە ئاسێ دبن زوربەیا جارا ھندەک رویدانێن نەچاڤەرێکری دروست دبن مینا نەخوشیەک د مالێ دا مرۆڤ پێتڤی نەخوشخانێ دبیت لێ ئەم کەڤینە ئاریشان چونکە ئەڤ ھەمو ترۆمبێلە د رێکا مە دا راوەستیانە.

ناڤبری گوت ژی: ل ھەردو رۆژێن پێنج شەمب و ئەینیێ رۆژێن بھێنڤەدانا خەلکی نە، لێ ئەم وەک ئاکنجیێن تاخێ زرکا ل ئەڤان ھەردوو رۆژان ژ قەرەبالغیا بازارێ ئەینیێ دنالین و ھەر ژ بەر ئەڤێ ئاریشێ من خانیێ خوە دانایە بەر ب فرۆتنێ و ھەر دەمێ کەسەک ھەبیت خانیێ من ب کریت دێ ژ زرکا بارکەم و بلا ئێدی جھێ خانیێ من ژی بو بازارێ ئەینیێ بیت و وەکو دیار ئەڤ ئەردێ بازارێ ئەینیێ د نەخشەی دا باخچەنە لێ ھەمو تشت بویە بازرگانی و ھندەک کەسان دەستێ خوە دانایە سەر و ب پارە دایەف مە .

عەلی حسێن سیتو، فرۆشیارەکێ بازارێ ئەینیێ یە ژی ل دور بابەتی بۆ ئەڤرۆ بەحس کر و گۆت: ل تاخێ نزارکێ کارێ مە گەلەک باشتر بو چونکە ل سەرانسەر خەلکێ بەرۆشکێ و تاخێ پێشەسازیێ ھەمو خەلکی قەستا مە دکر دەما ئەم ل نزارکێ و گەلەک شەڤان من ب بھایێ (1) ملیون دینار پارە کار کریە، لێ ل ئەڤی بازاری گەلەک شەڤان ئەز ب تنێ (50) ھزار دیناران ژی کار ناکەم و گوت ژی: راستە قەرەبالغیا بازارێ ئەینێ نەخوەشی بو ئاکنجیێن ئەڤی تاخی دروستکریە لێ ئەڤە شاشیا باژێرڤانیێ یە و ئەم دخازین جارەکا دی جھێ مە بو تاخێ نزارکێَ بھێتە ڤەگوھاستن.
شەوکەت سالح یونس فرۆشیارەکێ دیتر ل بازارێ ئەینیێ بو ئەڤرۆ گۆت: گەلەک فرۆشیارێن مە ل بازارێ ئەینیێ ل نزارکێ بەرزە بن ئانکو ب ساناھی جھێن مە نابینن و بازارێ ئەینیێ ل نزارکێ گەلەک ب تامتر بو چونکە ئەو ئە ردە یێ بێ بەرامبەر بو نھا ل زرکا ئەم بو ھەر ھەیڤەکێ پتر (16) ھزار دیناران دەینە باژێرڤانیێ و ئەڤ چەندە بویە جھێ دلگرانیا مە.
ژلایەکێ دیتر ڤە وەلاتیەکێ ئاکنجیێ زرکا کو خانیێ خوە ژ بەر قەرەبالغیا بازارێ ئەینیێ خانیێ خوە فروتیە بو ئەڤرۆ دا دیارکرن: من خانیەک ل تاخێ زرکا ب نیڤا دلێ خوە بو خێزانا خو دروستکر و ھەمو کەل و پەلێن من بو خانیێ خوە ب کار ئینای من تایبەت ل وەلاتێ تورکیا ڤەگوھاستن و خانیێ من ب (33) دەفتەرێن دولاری ل سەر من راوەستیا، لێ دەما ئەز ئاکنجی بویمە تاخێ زرکا بەختێ مە ب وی رەنگی بو بازارێ ئەینیێ ژ نزارکێ بو تەنشتا مالا من ھاتە ڤەگوھاستن و براستی مە چو خوشی ل زرکا نە دیتن
حازم عزەت خالد ئەو ئاکنجیە ئەوێ ل زرکا خانیێ خوە ژ قەرەبالغیا بازارێ ئەینیێ فروتی بۆ ئەڤرۆ نەڤەشارت ژی: گوت ژی: پتریا فروشیارێن بازارێ ئەینیێ ژ بەردەرەش و وان دەڤەران دھێن و ب مایک و دیجا گازی دکەن وەرنە ڤێرە و لایەکێ دیتر ب دیجێ گازی دکەن وەرنە ڤێرە و ئەڤ دەنگێ وان ھەتا دەمژمێر(3:00) شەڤ د بەردەوام بو و ژبلی وێ چەندێ ھەمو دەمان ھژمارەکا زێدە یا ترۆمبێلان ل کولان و جادێن مە دا د راوەستیان و ئەڤ چەندە زێدە بو جھێ دلتەنگی و بێزاریا خێزانا من.
ناڤبری نەڤەشارت ژی: ژبەر وێ قەرەبالغیا بازارێ ئەینیێ ل تاخێ زرکا دروست دبیت ئەز نەچار بووم خانیێ خوە ب فرۆشم و ھەر چەندە د فرۆتنا خانیێ خوە دا زیانەکا مەزن گەھشتە من چونکە ئەز د فرۆتنێ دا خوسارەت بوم خانیێ من ل سەر من ب (33) دەفتەرێن دولاری د راوەستیا و من ب (26) دەفتەران فروت لێ ئەز یێ نەچار بوم چونکە خێزانا من و زاروکێن من ژ وی دەنگێ بلند، ژ وێ قەرەبالغیا بازارێ ئەینێ دلتەنگ و بێزار بو لەورا ھەر چەندە ئەز ل وی تاخی نەمامە لێ ھیڤیە جھێن پەیوەندیدار چارەسەریەکێ بو ئاکنجی و خەلکێ دیتر یێ تاخێ زرکا ب بینیت .
لدور ھەمان بابەت باژێرڤانیا دھۆکێ ھاتە سەر خەت و ب رێیا ئەڤرۆ گۆت: مە ئەو پارکە بۆ خزمەتکرنێ ڤەگوھاستیە نەک بازرگانیکرنێ.
ئیسماعیل موستەفا پەیڤدارێ رێڤەبەریا باژێرڤانیا دھۆکێ بۆ ئەڤرۆ گۆت: بەری سالەکێ مە بازارێ ئەینیێ ژ تاخێ نزارکێ بو زرکا ھاتە ڤەگوھاستن و ئەگەرێ سەرەکی یێ ڤەگوھاستنێ بتنێ خزمەتکرنا خەلکێ مە بو چونکە ل نزارکێ ھەمو رۆژێن پێنج شەمب و ئەینی ئەو جووت سایدێ سەرەکی یێ نزارکێ د ھاتە ڤەگوھاستن و چ مەرەمێن بازرگانی مە پێ نەبونە و گوت: دھێتە گوتن کو ئەو جھە باخچەکێ گشتی یە لێ چو راستی بو وی بابەتی نینن و ئەردێ باژێرڤانیێ یە و مە پێشکێشی کەسەکێ کریە و ئەوی کەسی ب وان فروشیاران ب کرێ دایە و ل وی جھێ بازار نوکە لێ چەندین خزمەتگوزاری ھەنە مینا ئەردەکێ قێر کری و پاقژ و چەند خزمەتێن تەوالێت و مزگەفت ل وی جھی ھەنە لەورا مە ئەو بازارە ڤەگوھاستیە و بەرۆڤاژی ل نزارکی ئەو فروشیارە ل ناڤ ھەریێ و تۆزێ د ئاسێ دبون و پشتی ئەو دچونە مالێن خو مە ب تەنا گلێش و بەرمایکە د ھاڤێتن و راکرن.
پەیڤدارێ باژێرڤانیا دھۆکێ ئەو چەندە ژی دیار کر: ل پشت گورەپانا بازارێ ئەینیێ مە جھەکێ گەلەک ڤالا ھەیە و د پلانا مە دا یە ئەوی جھی وەک پارکا راوەستاندنا ترۆمبێلان دروست بکەین و ب ئەڤێ چەندێ دێ خزمەتەکا دیتر پێشکێشی خەلکی بیت و بدلخوشی ڤە ھێزێن پولیسان ژی بو رێکخستنا ترۆمبێلان ل وی جھی دگەل خەلکی د ھاریکارن
ئیسماعیل موستەفا پەیڤدارێ رێڤەبەریا باژێرڤانیا دھۆکێ نەڤەشارت ژی: چەند جاران خەلکێ تاخێ زرکا گازندە گەھاندیە مە کو ل وی تاخی گەلەک د بیتە قەرەبالغی لێ ل ھەمو وەلاتان ب ڤی رەنگی یە دڤێت خزمەتا خەلکی بھێتە کرن و بازارێ ئەینیێ جھێ ھەژارانە و مە د ڤیا جھەکێ باش بو خەلکێ خو دروست بکەین و مە چجار نەڤیایە بازرگانیێ ب خەلکی بکەین و بەرۆڤاژی بتنێ ئارمانجا مە خزمەتکرنە لەورا ئەردێ باژێرڤانیێ ب ڤی رەنگی یە دویر نینە دەمەکێ دیتر بازارێ ئەینیێ بو بەرژەوەندیا گشتی بو جھەکێ دیتر بھێتە ڤەگوھاستن وەک بەری نھا ئەو بازارە ل چەندین جھان ھاتیە ڤەگوھاستن.

کۆمێنتا تە