ژ بەر هێرشێن سەر وەستگەهێن ئەتۆمی یێن ئیرانێ سێ پارێزگەهێن ئیراقێ د مەترسیێ دانە
روانگەها ئیراقا كەسك ئاشكراكر، ژ ئەگەرێ هێرشێن ل سەر وەستگەهێن ئەتۆمی یێن كۆمارا ئیسلامییا ئیرانێ، هەرسێ پارێزگەهێن ئیراقی بەسرە، میسان و زیقار دێ پترییا زیانان بەركەڤیت.
روانگەها ئیراقا كەسك ل سەر زارێ بسپۆرێ كیمیایی، ئەیوب حەسەن راگەهاند» هەتا نوكە ل ئیراقێ هیچ بەلاڤبوونەكا تیشكا ئەتۆمی نەهاتیە تۆماركرن، ب تایبەتی ل پارێزگەهێن باشوور و سنوورێ ئیراقێ و ئیرانێ».
گوت ژی» هەكە هێرشێن ل سەر وەستگەهێن ئەتۆمی یێن ئیرانی بەردەوام بن، ب تایبەتی وەستگەهێن ( نەتەنز و فۆردۆ) بۆ پیتاندنا یۆرانیۆمێ كو تیشكدەرە، وەستگەها (بوشەهر) بۆ بەرهەمئینانا وەزیا كارەبی كو مادەیێن یۆرانیۆم و سیزیۆم و سترۆنتیۆم تێدانە، دێ هەرسێ پارێزگەهێن بەسرە، میسان وزیقار زوورترین زیان بەركەڤیت».
وی بسپۆرێ كیمیایی ئاماژە ب وێ چەندێ ژی كر» وەستگەها (نەتەنز) مەزنترین جهێ پیتاندنا یۆرانیۆمێیە و ژ دو دەزگەهێن بن ئەردی پێكهاتییە. ئاستێ پیتاندنا یۆرانیۆمێ تێدا 5% دەربازكرییە، ئەو وەستگەهە 400 كیلۆمەتران ژ سنوورێ ئیراقێ و 650 كیلۆمەتران ژ بەغدایێ دوورە، ئانكو د ئەگەرێ تەقینەكا تمامدا دێ مەترسیێ بۆ ئەسمانێ ئیراقێ دروست كەت، هەڤدەم وەستگەها (بوشەهر) ژی كو بۆ بەرهەمئینانا كارەبێ ل ئیرانێ دهێتە بكارئینان 450 كیلۆمەتران ژ بەسرە و 500 كیلۆمەتران ژ باژێرێ عیمارە سەنتەرێ پارێزگەها میسان و 700 كیلۆمەتران ژ بەغدایێ دوورە».
ناڤبری دوپاتكر ژی» وەستگەها (فۆردۆ) یا ئەتۆمی یا ئیرانی ل دەڤەرەكا ب هێز یا چیایییە و یۆرانیۆم تا ئاستێ 60% تێدا هاتییە پیتاندن، ئەڤ وەستگەهە هێشتا یا دوورە ژ هێرشێن ئەسمانی، دووریا وێ ژی ژ بەغدایێ 550 كیلۆمەترن و ب رێكا ئەسمانی ژی 450 بۆ 500 كیلۆمەتران ژ باژێرێن كەربەلا و نەجەف یا دوورە».
وی بسپۆرێ كیمیایی رۆهنكر ژی» لەزاتییا هەوای 30 بۆ 50 كیلۆمەترای د ساتەكێدا، لەوما پشتی پەقینا وەستگەهان ئەورێ تیشكدەر پشتی 9 ساتان دێ گەهیتە پارێزگەها بەسرە و پشتی 10 ساتان دێ گەهیتە پارێزگەها میسان و پشتی 14 ساتان ژی دێ گەهیتە بەغدایی».
باس ل وێ چەندێ ژی كر» ل ئەگەرێ ژناڤبرنا وەستگەهێن ئەتۆمی یێن ئیرانی هەر چالاكییەكا ئەورێ تیشكدەر كو بەر ب ئیراقێ ڤە بهێت، دێ كاریگەرییا ناڤین ل سەر زەڤیێن چاندنێ هەبیت و پاشی هێدی هێدی دێ كاریگەری گەهیتە سەر ژێدەرێن ئاڤی یێن بەركەفتیێن ڤێ تیشكێ، بەلێ دێ كاریگەرییا راستەوخوە ل سەر مرۆڤی یا كێم بیت».
