ژ بەر چەندین ئەگەران ئەردۆغان نابیتە سەرۆک کۆمارێ تورکیا
ئەڤرۆ
سەرۆکێ ناڤەندا ڤەکۆلینان یا ORC ئەنجامێ ڤەکۆلینا خۆ یا مەها چار بۆ رایا گشتی دیار کر و راگەهاند، ژ بەر مەرال ئاکشەنەرێ نها رێژەکا بەرچاڤ ژ دەنگدەرێن نەتەوەپەرست ژی بریار داینە دەنگێ خوە بدەنە کلچدار ئوغلۆی.
محەمەد پۆستەکی سەرۆکێ ناڤەندا ڤەکۆلینان یا ب ناڤێ ORC راگەهاند، ئەنجامێ ڤەکۆلینێن وان ل ٨١ باژێرێن مەزن یێن تورکیا نیشا ددەن ئێدی سەردەمێ دەستهەلاتداریا ئەردۆغانی ل تورکیا بەر ب دووماهیێ ڤە دچیت، دێ قۆناغەکا نوو ل تورکیا دەستپێکەت، چونکی خەلک ئێدی ژ ئەردۆغانی و ئاکپارتیێ توورە نە و گۆت: (مەرال ئاکشەنەرێ شیایە رۆلەکا کاریگەر بگێریت و نها دەنگێ نەتەوەپەرستان بۆ ئەردۆغانی گەلەک کێم بووینە، چونکی نها ١٥% ژ دەنگدەرێن تورکیا دەنگێ خوە ددەنە پارتیا مەرال ئاکشەنەرێ کو ئەو ژی هەڤپەیمانە ل گەل کلچدار ئوغلۆیی، ئەو یەک ژی بوویە ئەگەرێ هندێ دەنگێ ئەردۆغانی گەلەک کێم ببیت، هەکە ئەم رێژەکا بەرچاڤ ژ دەنگدەرێن هەدەپێ ژی لێ زێدە کەین بێگومان دێ دیار بیت ئەردۆغان سەرکەفتی نابیت و دێ کەمال کچدار ئوغلۆ شێت د گەرا ئێکێ یا هەلبژارتنان دا سەرکەڤیت).
ناڤهاتی ئەو یەک ژی دیار کر، نها هەدەپێ ب فەرمی راگەهاند دێ پشتەڤانیێ ل کەمال کچدار ئوغلۆی کەن، ئەز باوەرم ئەو یەک دێ کاریگەریەکا خوە یا مەزن کەت، چونکی هەدەپێ ژی پتر ژ ١٠% دەنگان دێ بدەستڤە ئینیت و هەکە دەنگدەرێن هەدەپێ ژی دەنگێن خۆ بدەنە کەمال کچدار ئوغلۆی بێگومان وی دەمی ئەردۆغان دێ تووشی شکەستنێ بیت، چونکی د چو هەلبژارتنێن بیست سالێن بۆری دا وەکو نها ئۆپۆزسیۆنەکا وەسا بهێز ل دژی ئەردۆغانی و ئاکپارتیێ نەبوو، بۆ جارا ئێکێ یە بەربژارەک بهێز دەرکەفتیە و خەلک ژی پشتەڤانیێ لێ دکەن و گۆت: (ژ بەر هندێ ژی ئەنجامێ ڤەکۆلینان نیشا ددەن، سەردەمێ دەستهەلاتداریا ئەردۆغانی بەر ب دووماهیێ ڤە دچیت، ڤێجا ئەز دبێژم دێ قۆناغەکا نوو ل تورکیا دەستپێکەت، دڤێت هەمی هێز و ئالیێن سیاسی ل تورکیا خوە بۆ هەر گوهۆڕینەکێ بەرهەڤ بکەن).
ل ئالیێ دی گەلەک کۆمپانیێن راپرسیان ژی ئەنجامێن راپرسیێن خوە یێن مەها چار راگەهاندن و ل گۆر ئەنجامێ راپرسیان دیار دبیت ڤێجارێ ئەردۆغان نابیتە سەرۆک کۆمارێ تورکیا، چونکی خەلک ئەردۆغانی وەکو کەسێ ئێکێ یێ بەرپرس ژ رەوشا خراب یا ئابووری دبینن و هەروەسا وەلاتیێن تورکیا وەسا دبینن د چەند سالێن دووماهیێ دا ئەردۆغانی رێ ل هەمبەر ئازادیا راگەهاندنێ گرتیە و تورکیا ژ دیموکراسیێ و مافێن مرۆڤی دوور کەفتیە، ژ بەر هندێ ژی دڤێت سەردەمەک نوو دەستپێ بکەت، ژ بەر ڤان هەموو ئەگەران ژی نها شانسێ ئەردۆغانی گەلەک کێم بوویە و زەحمەتە جارەکا دی ببیتە سەرۆک کۆمارێ تورکیا.
