ژ ترسا بۆردومانێ چەمێن چوار گوندێن دەڤەرا نهێلێ ماینە بێ ئاڤ
ژ ئەنجامێ شەرێ بەردەوامێ دناڤبەرا گەریلایێن پەكەكێ و لەشكرێ توركیا دا و بوردۆمانكرنا دەڤەرێ ژلایێ فرۆكەیێن توركیا ڤە، جویا ئاڤێ یا چوار گوندێن دەڤەرا نهێلێ ل سنوورێ ناوچەداریا دێرەلۆك ل دەڤەرادریا ئامێدیێ خراب بوویە و جوتیار نەشێن چاك بكەنەڤە، ئەڤ یەكە بوویە ئەگەرێ هندێ پشكەكا چەمێن گوندێن سەرگەلێ و بەرچی و بلاڤە و گوهەرز بێ ئاڤ بمینن.
ئەحمەد گوهەرزی هەلبژێرێ گوندێ گوهەرزێ بۆ رۆژناما ئەڤرۆ دیار كر، ئەو د وێ باوەریێ دانە ئەڤ سالە چەمێن وان ناهێتە كرن كو دبنە نێزیكی 100 زەڤیان و گۆت: ژ بەر كو جویا چەمێ وان یا ئاڤدانێ كەفتە بەر بوردۆمانێ و بەشەك ژێ خراب بوویە و ژ ناڤچویە ئاڤ ب چ رەنگەكی ناگەهیتە چەمی.
ناڤهاتی دیاركر، ئەڤ سالە چەمێ گوندێ وان دا بیتە برنج و كونجی، لێ ژ بەر بێ ئاڤیێ دێ هەموو مینیتە بەیار ئەڤێ یەكی ژی كارتێكرنەكا مەزن كریە ل سەر ئابۆرێ وان، ژ بەر كو هەم دێ رێژا بێكاریێ زێدە كەت، هەم ژی دێ دەرامەتێ وان كێم كەت.
و گۆت: هەكە ب ڤی رەنگی بیت و ئاڤ نەگەهیتە چەمێ وان، ئەڤە ژبلی چەمێن وان ناهێتە شووین كرن، ئەو داروبارێ دناڤ دا ژی وەك دارێن گیزا و مژمژا و مێوێن تری و خوخ و سێڤا دێ د تێهنا دا هشك بن و ژناڤچن.
هەلبژێرێ گوندی خویا ژی كر، ئەو یێ ب ژڤانێ رێك ب وان بهێتە دان ئەو ژی بچن جویا ئاڤێ دروست بكەنە ڤە و ئاڤێ بینن، لێ ژ بەر كو هەردەم ل وێ دەڤەرێ شەر هەیە ئەو نەشێن بچن و هیڤی ژی خوەستن ئەڤ شەرە ب داوی بهێت بۆ وێ یەكێ ئەو ژی بشێن ل گوندێن خوە و ل سەر دەرامەتێ خوە چاندنێ بكەن و ژیانا خوە دەرباز بكەن.
جوتیارەكی دی یێ وێ دەڤەرێ دیاركر، نوكە ئاریشا وان یا سەرەكی ئاڤە و ئاڤ ناگەهیتە ناڤ چەمێن وانا و گۆت: نوكە پیچەكا ئاڤێ دهێتە ناڤ چەمی بەلێ ئەوا دهێت گەلەكا كێمە و چێدبیت هشك ببیت، ژ بەر كو یا ل بەر كانیایە و كانی تا پایزێ نامینن و هشك دبن.
دیار كر، جویا چەمێ گوندێ وان ل نێزیك گوندێ سەرگەلێ دهێت و ئاڤا چەمێن چوار گوندا یێ ل سەر وێ جویێ و نوكە بنگەهێن سەربازی یێن توركیا یێ ل هنداڤی سەرۆكانیا وێ جوویێ و هەموو دەمەكی شەرە و گۆت: ژ بەر وی شەری و ئالوزیا وێ دەڤەرێ ئەو نەشێن بچن ئاڤا چەمی بینن و چەمێن خوە ل بەر ئاڤ بدەن.
ناڤهاتی دیار ژی كر، نوكە رەوشا خەلكێ وان گوندان گەلەك یا ئالۆزە و ئەو یێن دورپێچكرینە ژ هەموو لایەكێ ڤە و تاكو دچنە چەمی ژی دەستێ وان یێ ل سەر دلێ وان كو چ توپ ڤێ نەكەڤن.
و داخاز كر، ئاریشا وان یا ئاڤدانێن چەمێن وان بهێنە چارەسەركرن و رێك ب وان بهێتە دان بچنە ناڤ چەمێن خوە و دەرامەتێ خوە بۆ وێ یەكێ زەحمەتا وان یا هند سالە ل بەر ئاڤێ دا نەچیت و داروبارێن وان ژی هشك نەبن.
