ژ خـوەسـەریێن هـندسـتانێ.. خـەملا بووكـێ
هندستان وەلاتێ جوداهیانە، ژ كەڤنترین هزر و رەفتار و پۆشاكان لێ دهێنە دیتن هەتا كو دگەهیتە نووترین هزر و رەفتار و بەرهەمان، ئێك ژ تشتێن بالكێش ئەوە، كچێ و ژنێ یان بووكێ، خەملێن جودا هەنە، ئانكو ئەو خەمل و جوانكاریێن ژنكێ مافێ لبەر كرنێ هەیە، كچكێ نینە، یان ب كێمانی نەبوو.
ل نك مە ژی، ل دەمێ خوە هندەك جوداهی هەبوون، بەر ب نەمانێ نە، وەكی دەرسۆكا سپی و یا رەش، رەنگێن جلكان..هتد. ل هندستانێ 16 جوداهی دناڤبەرا خەملا كچێ و ژنێ و بووكێ هەنە و هێشتا هەتا رادەیەك مەزن، پێگیرن.
ل هندستانێ، بووكێ و ژنێ مافێ ئەڤان خەملان هەیە:
1. سندۆر: ئەو نیشانا رەنگێ سۆرە زاڤا د سەرێ ئەنیا بووكێ ددەت و دبیتە جەڤەنگێ هەڤگرتن و هەڤژینیێ.
2. كێشەپەشەرەچەنە: ل هندستانێ، ب گشتی سێ كەزیان بۆ گەنگا (ئاهۆرایا پاكی و لێنەگرتنێ) و یەموونا (ئاهۆرایا ژیانێ) و سەرەسڤاتیێ (ئاهۆرایا زانین و ئاخفتن و هونەران) دڤەهینن، یان بۆ سێتكێ ئاهۆرایێن هندۆكان؛ براهما و ڤیشنۆ و شیڤای. هەروەسا شاشەكا گولان یان یا زێڕان دكەنە سەری.
3. مانگ تیكە: ئەڤە تیتا ئەنیێ یە. ژ سەری ب سەر ئەنیێ دا بەرددەن، دبێژنێ (ئەجنە چەكرە- چەرخا برویان؛ یان سێیەم چاڤ) كو گوایە هزرێ و هۆشی كۆنترۆل دكەت.
4. بیندی: ئەو نیشانە یا دناڤبەرا برویان دكەن. ئەڤە نیشانا ئاهۆرا پەرڤاتیێ یە، و بۆ بەختەوەریێ لێ دكەن. نیشان رەوشا هەڤژینیێ دیار دكەت و رەنگ ئەڤینیێ و شوویێ.
5. كول یان كاجەل: ئەڤە كلێ چاڤانە، بووك بۆ جوانیێ ددانن، لێ هندستانی باوەر دكەن، كل بووكێ ژ چاڤان دپارێزت.
6. كارن پوول: گوهاركن، پتریا جاران گوهاركێن مەزنن و دهێنە هەلاویستن.
7. نات: خزێم. نیشانا وێرەكی و پیت و سۆزداریێ یە.
8. هار: گەردەنیە یان رستكا گولانە، بەرێ داڤەكا زێڕی بوو زەلامی دكرە ستۆیێ ژنێ، وەكو نیشان كو ب مێرە. وەكو ڕستك دبێژنێ مەنگەلە سووترە.
9. باجوبەند: ئەڤە هەمان بازبەندا مەیە. بۆ پاراستنا بووكێ ژ جانێن ئەهرەمەنی ل زەندی دشدینن.
10. چوودیان: بازنك، پارچەیەكە ژ خەملا بووكێ، هەكە چی كچك ژی دكەنە دەستێن خوە، لێ ژنك بەردەوام دكەنێ داكو ساخلەم و بەختسپی بن.
11. مێهێندی: ئەڤە بەری ڤەگوهاستنێ یە. وەكی خەنایا مەیە. هندی رەنگێ نەخشێن خەنایێ تاریتر بیت، هندستانی باوەر دكەن، دێ حەز ژێك كرن ژی بهێزتر بیت.
12. ئارسی: گوستیركا تلا بەرانیە. نهۆ بووك گەلەك گوستیركان دكەنە تلێن خوە، لێ یا تلا بەرانی مەزنترە.
13. كەمەربەند: كەمەربەند قایشا پشتێ یە، ژ زێڕی چێدكەن. ئەڤە نیشانا زاڕۆكێن پاشەڕۆژێ یە.
14. پایەل و بیچوو: ئەڤە خڕخال و گوستیركێن تلێن پێینە. گوستیرك د دووەم تلا پێی، نیشانا شووكرنێ یە.
15. ئیتەر: گولاڤا ئسمینانە بووك دڕەشینیت.
16. كراسێ بووكێ دوماهیك خەملا وێ یە، هندستانی حەز ژ رەنگێن قیچ دكەن، نەخاسمە سۆری و هناری و زەری بۆ بووكانیێ.
