ژ لايێ ده‌ستدرێژيا سكسى ڤه ئه‌ڤه ئارامترين و مه‌ترسيدارترين باژێرن ل جيهانێ
ئەڤرۆ نیوز، نەوزاد ھلوری:
ب گورەی ڤەکولینەکێ کو ژ لایێ دامەزراوەیا تومسون رویتەرز ھاتیە ئەنجامدان و پشت بەستن ل سه‌ر بۆچوونێن کەسانێن شارەزا و بسپۆرێن ژنان كريه و بەحس ل ھەموو روویەکێ ئارامیا باژێران بۆ ژنان ھاتیەکرن ب تایبەتی دەستدرێژیێن سکسی، باژێرێ قاھیرە ب مەترسیترین باژێر ل جیھانێ بۆ هاتيه ده‌ستنيشاكرن، د بەرامبەر دا لەندەن ئارامترینە.
ڤەکولینێ 19 باژێر ل جیھانێ وەکو ئارامترین و خراپترین باژێر ژ لایێ دەستدرێژیێن سکسی بۆ سەر ژنان دیارکرینە و ھەر ئێک ژ باژێرێن لەندەن ل بەریتانیا و توکیو و ل يابان و پاریس ل فەرنسا ل رێزا ئێکێ و دوویێ و سیێ دھێن بۆ ئارامترین باژێر بۆ ژنان، د بەرامبەر دا قاھیرە ل مسرێ خراپترین باژێرە ل جیھانێ ب تایبەتی ژ روویێ دەستدرێژیێن سکسی ڤه، د دووڤ دا ھندەک باژێرێن ھەر ئێک وەلاتێن پاکستان و فەلەستین و ھندستان و کونگویا دیموکراتی دھێن.
سه‌دیق خان سەرۆکێ باژێرڤانیا لەندەن ل بریتانیا دیارکر کو ژنێن لەندەن پێشەنگن ل ھەموو بوارێن ژیانێ دا ب تایبەتی دوارێن خزمەتگوزاریێن گشتی و ھونەر و کار و سیاسەتێ دا.
شارەزا دبێژن کو ل قاھیرە جوداھیەکا زور دناڤبەرا ژن و زەلامان دھێتەکرن و ھەردەم داب و نەریت لسەر پێشکەفتنا جڤاکێ قاھیرە یا زالە و رێگریێ ل پێشکەفتنا جڤاکی دکەن ، ھەتا خوە ژنێن قاھیرە دەلیڤەیێن کاری دەست ناکەڤن و دھێنە بێ بەھرکرن ژ دەلیڤەیێن کاری و چاڤدێریێن ساخلەمیێ و ھاریکاریێن دارایی و خواندنێ ، ئەڤ یەک ژی بوویە سەدەم کو دەستدرێژیێن سێکسی و تعلیق دناڤ وان دا ببیتە دیاردەیەکا رۆژانە و ب ئاشکرایی ھەست پێ دھێتەکرن.
چالاکڤانێن دوارێ ژنان ل قاھیرە ب رێیا تورێن جڤاکی کەمپینێن دژی دەستدرێژیێن سێکسی بو سەر ژنان دەستپێکرینە و ژنان ب رێژەیەکا بەرچاڤ پشکداری تێدا کریە و دخوازن بێدەنگ نەبن بەرامبەر وان دەست درێژیان و تا رادەیەکێ باش ژی شیایە دەنگێ ژنان بگەھینن ب تایبەتی لسەر ھەردوو تورێن جڤاکی فێسبوک و توێتەرێ ب رێیا ھاش تاگ.
شەھیرە ئەمین رۆژنامەڤانەکا ناسیار یا وەلاتێ مسرێ یە دبێژیت: (ھەر تشتەکێ ل قاھیرە پەیوەندی ب ژنانڤە ھەبیت ، یا دژوارە ، ھەتا خوە ژن ئەگەر بتنێ بچیتە رێیەکێ ، ئەگەرا وێ یەکێ ھەکە کو روو ب روویێ ھەموو وان تشتێن نەخواستی ببیت ئەڤێن کو لسەر ژنان دھێنەکرن).
ژ لایەکێ دنڤە ب مەرەما راگرتنا دەستدرێژیێن لسەر ژنان ، فەلەستینی لژێر ناڤ و نیشانێن خوشتڤیا تە نیمە بەرنگاریا دەستدرێژیێن سێکسی بو سەر ژنان دبن ب تایبەتی ل باژێرێ رامەلا ، و ھەڤدەم ل ھندستانێ ژی تیما بەرەڤانیکرنا بناڤێ رومیو ھاتیە راگەھاندن بو راگرتنا دەستدرێژی و تعلیقێن سێکسیێن لسەر ژنان و ئەڤ یەک ژی ل وێ یەکێ ھاتیە کو کەساتیەک بناڤێ رومیو زورترین دەستدرێژیێن سێکسی کرینە سەر ژنان و دوڤدا ئەڤ یەک وەکو دیاردە دناڤ جڤاکێ ھندستانێ بەلاڤبوویە و بویە مەترسی بو سەر ژنان.
پولیسێن ھندستانێ ل ویلایەتا برادیج تیمەکا تایبەت ب ناڤێ بەرنگاربوونا رومیو پێکئینایە و کارێ وان دووڤچوونە لسەر وان کەسانێن کو ب رومیو دھێنە نیاسین داکو دەستدرێژی لسەر ژنان نەھێتەکرن و ئەو تیم دبێژیت: (دماوەیێ دوو حەفتیان دا 15 زەلام ل بەردەرگەھێن قوتابخانە و پەیمانگەھێن تایبەت یێن کچان ھاتینەگرتن).
ل گورەی راپرسیێ کو دامەزراوەیا تومسون رویتەرز ئەنجامدایە، ھەر ئێک ژ باژێرێن کراچ ل پاکستانێ و کینشاسا ل کومارا کونگویا دیموکراتی، و نیودلھی ل ھندستانێ لدوڤ باژێرێن قاھیرە دھێن بو سەر دەستدرێژیێن لسەر ژنان ، ئەڤە زێدەباری ھەردوو باژێرێن دلھی و ساوپاولو ل بەرازیلێ کو ئەو ژی ب خراپترین باژێر بو سەر ژنان دھێن ب دەستدرێژیێن سێکسی بو سەر ژنان ب تایبەتی بو سەر وان کچێن د ژیێ 16 سالیی بو خوارێ نە.
حکومەتێن دلھی و پاکستانێ چەندان قانون بو بەرنگاریا وان کەسان داناینە و سزایێن گران ژی ل سەر ژنان داناینە، بەلێ ل گەل ڤێ یەکێ ژی نەشیاینە رێگریێ ل سەر دەستدرێژیێن ل سەر ژنان بکەن.