ژ مه‌كته‌با سه‌رۆك بۆ باره‌گایێ بارزانی
غیاس خالد زێباری
د ڤان رۆژان دا پارتی دیمۆكراتی كوردستان و سه‌رۆك بارزانی بریار دایه ناڤێ مه‌كته‌با جه‌نابێ سه‌رۆك بارزانی بهێته گوهۆرین بۆ باره‌گایێ بارزانی،
ڕه‌نگه ل به‌رچاڤ ب بریاره‌كا ساده و ساكار و نۆرمان بهێته دیتن، لێ ئه‌گه‌ر ب دووربینی ته‌ماشه‌ی ڤێ بریارێ بكه‌ین بخوینن، ئه‌ڤه بریاره‌كا زۆرا گرنگه بۆ ناڤخۆی پارتی و خه‌لكێ كوردستانێ. هه‌ر چه‌نده ب ناڤێ مه‌كته‌با سه‌رۆك ژی خزمه‌ته‌كا زۆرا خه‌لكێ كوردستانێ هاتیه كرن ژ هه‌ر روویه‌كیڤه، لێ ئه‌ز دبینم گوهۆرینا وێ بۆ باره‌گایی بارزانی، بریاره‌كا گرنگا پارتی دیمۆكراتی كوردستان و سه‌رۆك بارزانی یه بۆ باشتر زڤراندنا پارتی ب سیاسه‌تا ناڤخۆیی و چاوانیا سه‌ره‌ده‌ریكرنا پارتی دگه‌ل خه‌لكێ كوردستانێ بۆ پراكتیزه‌كرنا بنه‌مایێن فه‌لسه‌ر و رێبازا پیرۆزا بارزانیێ نه‌مر، چونكی ل سه‌ر ده‌مێ شۆره‌شێن بارزان یێن ئێكێ و دوویێ و ئیلۆنێ و گۆلانێ، باره‌گایێ بارزانی چادر و په‌ناگه‌هه‌كا مه‌زنا هه‌می خه‌لكێ كوردستانێ بوویه بێ جوداهیێن هزری و ئایینی و نه‌ته‌وی و مه‌زهه‌بی. هه‌رده‌م باره‌گایێ بارزانی بۆ هه‌ر خه‌لكه‌كی یێ ڤه‌كری بوویه بۆ گه‌هشتنا گله و گازنده و ئاریشه و داخوازیێن خه‌لكێ كوردستانێ و چاره‌سه‌ركرنا وان ب ره‌نگه‌كێ دادوه‌رانه، نه‌خاسمه بۆ چینا هه‌ژار و دلسۆز و وه‌فادارێن ڤێ رێبازا پیرۆز.
دیاره پارتی و سه‌رۆك بارزانی بریار دایه ب سیاسه‌تا خوه یا نافخۆیی بچیته‌ڤه، كو ده‌مه‌كه جه‌ماوه‌ر و دلسۆزێن پارتی ب نه‌بوونا هه‌لسه‌نگاندنه‌كا راست و دروست و وه‌ك پێدڤی نه‌چه‌سپاندنا بنه‌مایێن رێبازا بارزانی نه‌خاسمه ژلایێ دادوه‌ریێ ره‌خنێن به‌رده‌وام دگرن و دڤێت بن سیبه‌را باره‌گایی بارزانی دادوه‌رێ و دادوه‌ریا جڤاكی و هه‌لسه‌نگاندنه‌كا راست دروست بچه‌سپینیت و ده‌رگه‌هێ باره‌گای بارزانی ژی مینا سه‌رده‌مێ بارزانی نه‌مر بۆ خه‌لكێ كوردستانێ یێ ڤه‌كری بیت و ئاریشێن وان چاره‌سه‌ر بكه‌ت.
دڤێت ئه‌و ڤالاهیا د ناڤبه‌را پارتی و خه‌لكێ كوردستانێ ئه‌وا پشتی سه‌رهه‌لدانێ و بتایبه‌ت پشتی سالا 2003 دروست بووری دا نه‌مینیت و مینا سه‌رده‌مێ شۆره‌شێن به‌رێ یێن مه دیاركری ئه‌ڤ په‌یوه‌ندیه خورت ببن و هه‌می خه‌لكێ كوردستانێ پارتی و باره‌گایێ بارزانی ب مالا خوه و دادوه‌رترین دادگه‌ه هژمار بكه‌ن.
ژبۆی كادر و ئه‌ندام و جه‌ماوه‌رێ پارتی، ئه‌وێن هه‌تا نها وه‌كی پێدڤی ده‌نگێ وان نه‌دگه‌هشته مه‌كته‌با سه‌رۆك، ئه‌ڤه بریاره‌كا مژده به‌خشه كو داخوازی و گازندێن وان ل ده‌مێ خوه بگه‌هن و چاره‌سه‌ر ببن.
گرنگه پشتی ڤێ بریارێ پارتی دیمۆكراتی كوردستان و باره‌گای بارزانی، رێكارێن هه‌ژی و ب ساناهی دروست بكه‌ن كو ده‌نگ و داخوازی و ره‌خنه و پێشنیارێن خه‌لكێ دلسۆزێ كوردستانێ مینا سه‌رده‌مێ بارزانی نه‌مر بێ گیرۆبوون بگه‌هن و بهێنه به‌رسڤدان و ئاریشه ب دادوه‌رانه بهێنه چاره‌سه‌ركرن. نه‌خاسمه ل ڤی سه‌رده‌مێ ته‌كنه‌لۆژیا یا گه‌هاندنێ دێ شێن ب ساناهی و ل ده‌مه‌كێ كورت دا پێشوازیا داخوازی و پێشنیار و ره‌خنه‌یێن خه‌لكی كه‌ن و هێنه به‌رسڤدان.
ب ره‌نگه‌كێ گشتی ڤه‌كرنا باره‌گایێ بارزانی، ڤه‌كرنا ده‌رگه‌هه‌كێ به‌رفره‌هه بۆ گه‌شبینیتربوونا خه‌لكێ دلسۆز و كوردپه‌روه‌ر ب پارتی دیمۆكراتی كوردستان و پاشه‌رۆژا وێ و خرڤه‌بوونا پرانیا خه‌لكێ كوردستانێ بن سیبه‌را رێبازا پیرۆزا بارزانی نه‌مر، كو كورتترین رێیا راست و دروستا كوردایه‌تیێ یه و رێبازا ئاشتیێ و ئازادیێ و دادپه‌روه‌ریێ و وه‌كهه‌ڤیێ یه. چه‌ندین ساله كادر و خه‌لكێ دلسۆزێ پارتی چاڤه‌رێ بریاره‌كا ب ڤی ره‌نگی بۆ باشتر چه‌سپاندنا رێبازا بارزانی نه‌مر و هه‌لسه‌نگاندنه‌كا دادوه‌رانه.
