ژ مه‌لكی تا مالكی
كه‌یف و خوه‌شی و سه‌ركه‌فتن دگه‌له‌ك واران دا دئێنه ب ده‌ستخستن، لێ گه‌له‌ك جاران كه‌سێن بده‌ست دئێخن نزانن مفایی ژێ ببینن، جاران ژی ددن كه‌سێن به‌رامبه‌ر و ئه‌ڤ كه‌سه ل شوونا سوپاسیا وی بكه‌ن دكنه په‌ڕز و ستری و دبنێ پێ یێن وی را شین دكن. ملله‌تێ كورد ژ كه‌ڤناره ملله‌تانه و خودان دیرۆكه‌ك دوور و درێژه و هه‌می ژیێ خوه ب دانوستاندنا و خۆشخۆشكێن دوژمنان بگره ژ ده‌مێ ئوسمانی و سه‌فه‌ویان و هه‌تا دگه‌هیته بریتانی و ئه‌مریكیان ب دۆراندن بووراندیه. خوه‌یایه ئه‌و عێراقا بوویه جه و چێكه‌را دكتاتوران هه‌ر ژ ده‌ستپیكا دامه‌زراندنێ و ئینانا مه‌لكی ژ وه‌لاته‌كێ دی و هاتنا ئێك ل دووڤ ئێكێن عێراق برێڤه‌بری كه‌سه‌ك ژ وان نه‌شیای خوه و سیاسه‌ت و باله‌ده‌ستیا خوه ژ دكتاتوریه‌تێ و خوه‌سه‌پاندنێ ڤه‌ده‌ركت و یا جهێ حێبه‌تیێ و سه‌رسورمانێ ئه‌وه كو كه‌سه‌كی نه ژ وان و نه‌ژی ژ ڤان نكاری په‌ند و سه‌ربۆران ژێ وه‌ربگرن و تا نها هه‌مان ئه‌قلیه‌تا به‌رێ هاتی شه‌رمه‌زاركرن دئێته په‌یره‌وكرن. گومان نینه ئه‌و چه‌ندا كوردان ب درێژیا یازده سالان دانوستاندن بۆ دكرن بگره ژ دانا 17% یا بودجه‌یا عێراقێ و قه‌بوولكرنا پێشمه‌رگه‌ی وه‌كه پشكه‌ك ژ به‌ره‌ڤانیا عێراقێ ب پێدڤیێن وانڤه تا دگه‌هیته ڤرێكرنا په‌ترولا دلێ كوردستانێ د رێیا هه‌رێمێ را، ئه‌ڤروكه ب رێكه‌فتنه‌كێ یا جی ب جی دبت لێ ل ڤێره پرسه‌ك دئێته رۆژه‌ڤێ و یا كه‌فتیه ل سه‌ر زارێ هه‌می ته‌خان، ئه‌رێ گه‌ره‌نتیه‌ك هه‌یه جاردن ده‌مێ عێراق و حوكمه‌تا به‌غدا دكه‌ڤیته سه‌ر سكه‌یه‌كی ئارام وه‌كی به‌ری نوكه دێ داخوازیێن كوردان جی ب جی كت؟ ئه‌رێ سه‌ركردایه‌تیا كوردی چ جوره پلانه‌ك هه‌یه بۆ ڤه‌گه‌راندنا ناوچه كوردستانیێن ده‌رڤه‌ی ئیداره‌یا هه‌رێمێ بۆ باوه‌شا ده‌وله‌تا ئاینده‌یا كوردستانێ؟ گه‌ر به‌رسڤا گه‌ره‌نتیێ ژ لایێ به‌غدان ڤه‌بت بێگومان دێ به‌رسڤه‌كا پری كه‌نی بت ژبه‌ركو هه‌ر ژ ده‌مێ مه‌لكی و تاكو مالكی هیچ جاره‌كێ به‌غدا خودانا ئاخفتنا خوه نه‌بوویه و تنێ ده‌م دبه‌رژه‌وه‌ندیا خوه‌دا ده‌رباسكریه و مفا ژ ده‌می وه‌رگرتیه، جا فه‌ره سه‌ركردایه‌تیا كوردی باش هزرا ڤێ یه‌كێ بكت و كار ژبۆ سه‌قایه‌كێ سیاسی یێ (هه‌رێمی، نیڤ ده‌وله‌تی) و ژێرخانه‌كا ئابوری و ئابووره‌كا سه‌ربه‌خۆ بكت و وه‌كی جاران چاڤ ل پاریكێن به‌غدا نه‌بت، دیسان ب جددی و بێ گیروبوون كار ل سه‌ر جی ب جی كرنا مادده‌یێ 140 ل بن كونترولا پێشمه‌رگه‌ی بێته‌كرن ئه‌گینا ئه‌و چه‌ندا پێشمه‌رگه‌ی ب خوینا خوه كریه دیفاكتو ب ئێك لایانه و ب راپرسیه‌كێ داوی پێ بێته‌دان.