ژ پێنج پارکێن قەزا ئامێدیێ تنێ دو د درووستن
ئەڤرۆ نیوز، مەحمود نھێلی:
ھەر چەندە ژ لایێ گەشت و گوزاری ڤە باژێرێ ئامێدیێ ئێکە ژ دەڤەرێن ھەر خوەش لێ تا نوکە وەک پێدڤی گرنگی ب ئاڤاکرن و چێکرنا پارک و جھێن گەشتیاری نەھاتیە دان، ئەڤ یەکە ژی بوویە جھێ گازندا ھاولاتیان.
ئەندازیار ئەڤراز حەسەن سەرۆکێ باژێرڤانیا ئامێدیێ بۆ ئەڤرۆ نیوز دیارکر نوکە سێ پارکێن سنورێ باژێرڤانیا ئامێدیێ نەھاتینە چێکرن و نووژنکرن و گۆت: د نوکە دا ل سنورێ باژێرڤانیا ئامێدیێ پێنج پارکێن بھێنە ڤەدانێ ھەنە لێ ژ وانا بتنێ دو کار دکەن و ھاولاتی دشێن مفا ژێ وەرگرن و یێن دی ژکار کەفتینە.
ناڤھاتی دیارکر وان بزاڤ کرینە ژ بۆ نووژەنکرنا وان سێ پارکان لێ ژ بەر قەیرانا ئابوری و نەبوونا پارێ پێَدڤی ئەو نەشیانە ڤان پارکان نووژەن بکەن و گۆت: نوکە ئەو پارکە ل سیریانا ئامێدیێ و دێرەلۆک و سیلاڤێ یێ دھێتە نووژەنکرن، لێ کار تێدا ھێدی ب رێڤە دچیت ژ بەر کو تنێ ئەو پارە لێ دھێتە مەزاختن یێن ل سەر بوودجا باژێرڤانیێ و چ پارێن دیتر بۆ نووژەنکرنا وێ نەھاتینە دابینکرن.
ناڤھاتی ئاشکرا ژی کر، کو وان ل بەرە پارکەکی ل تاخێ مرێبکا ژی دروست کەن و جە ژی یێ ھاتیە تەرخانکرن لێ ئەو ژی ژ بەر قەیرانێ تا نوکە دەست پێ نەھاتیە کرن.
