ژ گەنجێ نوکە ڤە ئەڤینی ب تنێ بۆ تێکرنا حەزایە
ئەڤرۆ نیوز:
کچەک دیار دکەت کو بەری ژیانا ھەڤژینیێ دەزگرێ وێ گەلەک سۆز دابوونێ و پشتی پێکئینانا خێزانێ ئەو سۆز نەبرنە سەر و ڤەکۆلەرەکێ جڤاکی ژی ددەت زانین کو پتریا وان کەسێن نوکە ژیانا ھەڤژینیێ پێک دئینن چو ئاگەھی ژ وێ چەندێ نینە کو دێ ھەڤژینی بۆ ھەتا ھەتایێ بیتن و ھزر دکەن ب تنێ دەم بوراندنە و تێرکرنا حەزێن سێکسی و شەھواتا یە.
کچەک ب ناڤێ ھێلین یاسین ئەحمەد بۆ ئەڤرۆ دبێژیت: “من د ژیەکێ بچووک دا ژیانا ھەڤژینیێ ب حەزژێکرن و ڤیان پێکئینا و پشتی من ھەڤژینی پێک ئینایی، ئەز بەر ب ژیانەکا دی ب رێکەتم چونکو د ماوێ حەزژێکرنا مە دا ھەڤژینێ من کۆمەکا سۆزان بەرامبەری من دابوون، لێ پشتی کو مە خێزان پێک ئینایی پتریا ڤان سۆزان ھاتنە شکاندن ئەڤە ژی بۆ ئەگەرێ شکاندنا ھەستێن من و نەخۆشی د ناڤبەرا مە دا دروست بووینە”.
ڤەکولەرێ جڤاکی مەلا عیماد رێکانی بۆ ئەڤرۆ دبێژیت: “پێکئینانا ھەڤژینیێ دڤێت ل سەر بنەمایێ رەوشت و تێگەھشتنەکا دروست بیتن کو ھەردولا ب وی رەنگی ھزر بکەن”.
زێدەتر گۆت: “ھەڤژینی قووناغەکا نوویە و پێدڤی ب راستیێ و دلسوزیێ یە، پێدڤیە چو نھێنی د ناڤبەرا ھەڤژینان دا نەمینن”.
ڤەکۆلەرێ جڤاکی نەڤەشارت ژی کو پتریا وان کەسێن نوکە ژیانا ھەڤژینیێ پێک دئینن وان چو ئاگەھی ژ وێ چەندێ نینە کو دێ ھەڤژینێن ھەتا ھەتایێ بن و گۆت: “ھزر دکەن ب تنێ دەم بوراندنە و تێرکرنا حەزێن سکسی و شەھواتی نە”.
مەلا عیماد ئاماژە ب و وێ چەندێ ژی کر کو گەلەک کەس ھەنە خێزانێ و ھەڤژینیێ پێک دئینن ل سەر بنەمایێ بەرژەوەندیێن تاکە کەسی ژ لایێ زەنگینی و بەرفرەھبوونا مال و میراتی ڤە و ئەڤ چەندە ژ ی دھێتە ھژمارتن ژ بنەمایێن خەلەت د ژیانا ھەڤژینیێ دا. ھەردیسان دەرئەنجامێ ئەڤان بنەمایێن خەلەت ژێک جوودابوون و پەیدابوونا ئالوزیێ یە د ناڤبەرا ھەڤژینان دا”.
عائیشا عەلی بەرپرسا جڤاتا ئامێدیێ یا ئێکەتیا ئافرەتان مخابنیا خوە ئینا زمان کو پێکئینانا خێزانێ ڤی سەردەمی دا ھەموو ب شێوێ شەھواتی یە و دوورە ژ عەقلانی و ھزرکرنێ چونکو ھەکە پێکئینانا خێزانآ ل سەر بنەمایێ ڤیان و حەزژێکرنێ و راستگویی و رێزگرتنێ بیتن د ھەموو نەخۆشیان دا قوربانیێ بۆ ئێک ددەن”.
ھیڤی ژی خواست کو دەمێ ئەڤان گەنگەشان دکەن ل دۆر تێکنەگەھشتنا ھەر بابەتەکی دانوستاندنێن وان د دوور بن ژ زارۆیان چونکو کارتێکرنێن خراب ل رەوش و دەروونێ زارۆیان دبیت.
عائیشا عەلی گۆتژی: “د ڤی سەردەمی دا، گەنجێن مە ھەر کوڕ بیت یان کچ ھزر ل سەر بنەمایێن سەرکەفتی یێن پێکئینانا خێزانێ ناکەن، بەلکو د ماوێ حەزژێکرنا وان کوڕ و کچان دا چەندین سۆز ژ لایێ ھەردو رەگەزان ڤە دھێنە دان و پشتی پێکئینانا خێزانێ ئەڤ سۆزە نامینم و بەرزە دبن لەورا ئەو چەندە دبیتە ئەگەرێ سەرھلدانا ھەڤڕکیان و دروست بوونا ئارشیشێن خێزانی د ناڤبەرا وان ھەڤژینان دا.
بەرپرسا جڤاتا ئامێدیێ یا ئێکەتیا ئافرەتان دا زانین کو گەلەک بنەمایێن خەلەت ھەنە کو نوکە خێزان ل سەر دھێتە پێکئینان و ژیێ بچووک و نزمیا ئاستێ رەوشەنبیری و دانا کچێن بچووک ب زەلامێن دانعەمر کرنە نمونە و گۆت: “نەبونا گیانێ لێبۆرینێ و ڤەگوھاستنا نھێنیێن خزێانی بۆ دەرڤەیی خێزانی ژی دبنە ئەگەرێ پەیدابوونا نەخۆشیان د ناڤبەرا کچ و کوڕان دا و ژیانا وان یا ھەڤژینیێ بەر ب نەخۆشیان دبەن”.
