ژ 298 زه‌ڤیێن مینڕێژكری ل ئامێدیێ ب تنێ 78 هاتینه پاقژكرن
ئامێدیێ، مه‌حمود نهێلی:
به‌رپرسێ راگه‌هاندنێ ل رێڤه‌به‌ریا گشتی یا مین و ته‌قه‌مه‌نیان ل دهۆكێ بۆ رۆژناما ئه‌ڤرۆ دیار كر، نوكه ئه‌و كار ل سه‌ر ڕاكرنا مینان ل چه‌ندین جهێن ده‌ڤه‌را ئامێدیێ دكه‌ن، ژ وانا ژی: ل گرێ قایدیا ل ناوچه‌داریا دێره‌لۆكێ و نوكه ئه‌و زه‌ڤی 70% هاتیه پاقژكرن.
رێگر بێسفكی، به‌رپرسێ راگه‌هاندنێ ل رێڤه‌به‌ریا گشتی یا مین و ته‌قه‌مه‌نیان ل دهۆكێ دیار ژی كر، ئه‌ڤه ده‌مه‌كه ئه‌و كار ل سه‌ر ڤێ زه‌ڤیێ دكه‌ن و شیاینه رێژه‌كا زۆر یا مینان ژێ ب درئێخن و ژ ناڤ ببه‌ن و گۆت: “ئه‌و مین یێن سه‌رده‌مێ رژێما به‌عسا ئیراقێ بووینه و دو جۆر بوون، نوكه ئه‌و زه‌ڤی ب تنێ 30% مایه و یا دی هه‌موو هاتیه پاقژكرن و كار تێدا به‌رده‌وامه”.
ناڤهاتی ئاشكرا ژی كر، ل سنوورێ ده‌ڤه‌رداریا ئامێدیێ 298 زه‌ڤیێن مینڕێژكری هه‌نه، كو ل ده‌ڤ وان هاتینه تۆماركرن و چێدبیت هێشتا پتر ژی بن، لێ ده‌ڤ وان نه‌هاتینه تۆماركرن و گۆت: “ژ سه‌رجه‌مێ وان، ب تنێ 78 زه‌ڤی هاتینه پاقژكرن، ژ به‌ر ره‌وشا ئێمناهیێ یا وێ ده‌ڤه‌رێ ئه‌م نه‌شێین ب دروستاهی كارێ خوه ئه‌نجام بده‌ین”.
