ڤارێبوون ژ هزرەكا ژاندار
ژێگر نەجیب عەبدولرزاق
تو ئەی ئادەمییێ حەرامكری.. و ب ئاڤەكا گەنی هاتییە فرشككرن، ب هزرەكا گەمار خۆ ل ژۆر دبینی! پەرەنگێن ڕویێ تە خودیكا ئەفسانەكا بێ مانایە. ئەڤە دەمەكە گونەهـ ژۆردا دبارن و نڤشێ من و تە تەر دكەن. ئەز ئەزەكێ بالا بووم و تو حەزەكا نەپەنی، پێلە بلا جانێ مە ب ئارامی ب خەلوە بچیت، د ئەزەلدا من سۆزا خۆ یا ب خوینەكا سپی تافیلكری، شاگردێ عەشقا ژیانێ .. ڤیانێ مە و تو خوەشپەلا ئاگرێ دوزەخێ و تەڤنێ كەربێ رادچینی! دیتنا من و تە هەڤكێشەكا ئالوزە، هەبوونێ دكەتە گۆمانەكا دادڕیای. شەرەنیخا.. من.. تە.. وی.. د كوفرستانا خودێناسیێدا یا بوویە دادگەهەكا ئەزەلی. هەر تشت ب تە د حەركیت.. با نالڤیت.. ئەهریمەن و ئاهورامەزدا ژی ل پەی حەزێن تە هزردكەن .! ڕكماندنا تە خوەزا ژ كەرباندا تاوی كرییە و هەدار لێ نەمایە، ژ دهییەكا ب گۆمان هەتا ئەڤرو مەزادە ل سەر بێ بها كرنا رەنگان.. هەر تشت ڕەشە، كەنی و جوانی.. دێمێ حەرامكرییەكێ سەرخوەشە. لێ دیتنەكا خاڤە باهوزێن خلولەكرنا مێشكان نەشێن جوانیا ڕەنگان تێكبدەن. ئەو رەنگ ئاسویێن ژیانێنە. بەسە ئەنیشكان ل گۆزەكێن مە بدەن!!
