ڤانیا سالار: ئه‌كته‌ری بۆ كچان كاره‌كێ ب ساناهی نینه
ئه‌ڤرۆ، نه‌وزاد هلۆری:
ڤانیا سالار ئێك ژ ئه‌كته‌رێن سه‌ره‌كی د فلمێ ئه‌زموون دا كو وه‌كو كلیلا ڤه‌كرنا فلمه فیسته‌ڤالا دهۆك یا نێڤده‌وله‌تی هاته نیشادان دیاركر كو خه‌لكێ دهۆكێ پێشوازیه‌كا گه‌له‌ك جوان ل وان و فلمێ وان كر ئه‌ڤ چه‌نده ژی نیشانه كو فلمێ وان جهێ خوه گرت.
ڤانیایێ بۆ رۆژناما ئه‌ڤرۆ گۆت: “گه‌له‌ك ژمێژه من حه‌ز و ڤیان بۆ كارێ هونه‌ری و سینه‌مایێ هه‌بوویه، پشتی گه‌هشتیمه ژیه‌كێ گونجای من پشكداری د چه‌ندین كارێن هونه‌ری دا كریه ب تایبه‌تی فلمان، ده‌رهێنه‌رێ فلمێ ئه‌زموون كو ل رۆژا ئێكێ یا فلمه فیسته‌ڤالا دهۆك یا نێڤده‌وله‌تی هاتیه نیشاندان داخواز ژ من كر كو پشكداری د فلمێ وان دا بكه‌م، پشتی من سه‌حا كارێن وان كری و رولێ خوه دیتی و چه‌ند تێست ب من هاتینه‌كرن، مه بریار دا كو پشكداربین و سوپاس بۆ خودێ شیاین ب سه‌ركه‌ڤین و فلمه‌كێ جوان و رێك و پێك دروست بكه‌ین”.
ناڤهاتیێ خویا كر كو هه‌تا نوكه وێ چوو به‌رنامه و پلانێن دی نینن بۆ كارێن هونه‌ری، به‌لێ هه‌ر ده‌مێ فلم و دراما و كاره‌كێ دی یێ هونه‌ری وه‌كو فلمێ ئه‌زموون بهێته پێش بێ گومان دێ پشكداری تێدا كه‌ت، ژ به‌ر كو هونه‌ر رێیه‌كا گرنگا خزمه‌تكرنا ته‌خ و چینێن جودایه و گۆت: “ب لێبورین ڤه پشكداریا ئه‌كته‌رێن كچ د ناڤ كارێن هونه‌ری دا گه‌له‌كا لاوازه و كاره‌كێ ب ساناهی نینه، به‌لێ یا ل سه‌ر كچان پێدڤی یه كو خه‌ون و هیڤیێن خوه نه‌مرینن و به‌رده‌وامن بۆ گه‌هشتنا هیڤیێن خوه و هه‌موو ئاسته‌نگان ده‌رباز بكه‌ن، داكو بشێن خزمه‌تا جڤاكێ خوه بكه‌ن”.
فلمێ ئه‌زموون كو ژ ده‌رهێنانا شه‌وكه‌ت ئه‌مین كوركی یه و چه‌ند ئه‌كته‌رێن به‌رنیاس كار تێدا كریه وه‌كو (شوان عه‌توف، حسێن حه‌سه‌ن، ئاڤان جه‌مال و ڤانیا سالار… هتد) بتنێ وه‌كو نیشادان پشكداری فلمه فیسته‌ڤالا دهۆك ببوو و ناچیته د به‌ریكانا ب ده‌ستڤه‌ئینانا خه‌لاتان دا.
