ڤان ڤیتامینان بەردەوام ب کارنەئینە
بەرپەرێ ساخلەمیێ:
گەلەك كەس ژبۆ پاراستنا ساخلەمییا خۆ پەنایێ دبەنە بەر خوارنا ڤیتامینان و تەمامكەرێن خۆراكی، لێ هندەك جورێن ڤیتامین و كانزایان هەنە نابیت ب بەردەوامی بهێنە خوارن. لەوما نوژدار شیرەتێ دكەن كێمییا ڤیتامینان دناڤ لەشی دا ب ڕێكا خوارنا خوارنێن ساخلەم بهێتە قەرەبووكرن.
زیانێن ڤیتامینان:
– ڤیتامین C: بكارئینانا ڤیتامین سی ب بەردەوامی دبیتە ئەگەرێ دروستبوونا بەركێ گولچیسكێ و هەودانا گەهان زێدە دكەت. هەروەسا دبیتە ئەگەرێ زكچوونێ و هندەك جاران ژەهراویبوونا خۆراكی ژی ژێ پەیدادبیت.
– ڤیتامین A: بكارئینانا وی ب بەردەوامی دبیتە ئەگەرێ بلندكرنا دوهنی دناڤ خوینێ دا، هشكبوونا پیستی، سستبوون و ڕاوەستیانا مێلاكێ، گێژبوون، سەرئێشان، تێكچوونا دیتنێ و وەریانا پرچێ.
– ڤیتامین B6: بكارئینانا وی ب بەردەوامی دبیتە ئەگەرێ ژناڤچوونا دەماران.
– ڤیتامین E: بكارئینانا وی ب بەردەوامی دبیت ببیتە ئەگەرێ دروستبوونا پەنجەشێرا پڕۆستاتان و زێدەبوونا ئەگەرێ مرنا وان نەخۆشێن نەخۆشییێن خوینبەرێن دلی هەین.
– ڤیتامین D: بكارئینانا وی ب بەردەوامی دبیتە ئەگەرێ كۆمكرنا ڕێژەیەكا مەزن یا كالسیۆمی دناڤ لەشی دا و پاشان زیانێ دگەهینیتە ساخلەمییا مرۆڤی.
زیانێن زێدەخوارنا كانزایان:
– ئاسن: خوارنا ئاسنی ب ڕێژەیێن مەزن دبیتە ئەگەرێ كۆمبوونا وی دناڤ لەشی دا و دبیت بگەهیتە ئاستێ ژەهراویبوونێ. ئەڤە ژی دبیتە ئەگەرێ دروستبوونا پنیێن تاری ل سەر پیستی، ئێشانا زكی، وەرمتنا مێلاكێ.
– زینك: ب كارئینانا وی ب ڕێژەیێن مەزن دبیتە ئەگەرێ ژكاركەڤتنا كارێ سیستەمێ بەرگرییا لەشی، كێم خوینی و گوهوڕینا ئاستێ تەپكێن خوینێ یێن سور و سپی.
