ڤـەخواندنـا پـارتـی د پێشهات و بویـەران دا
بەهزاد بەهرام
رۆژهەلاتا ناڤین ب شێوەیەكێ گشتی، هەرێما كوردستانێ و ئیراقا فیدرال ب تایبەتی هەردەم گۆهۆرینێن نوی بخوەڤە دگرن، بەر ب گۆرانكاریان دكەڤن، ئەڤەژی دزڤریتەڤە بۆ وان وەلاتێن زلهێز و ب هێز ل سەر ئاستێ جیهانێ كو د هەمی واران دا بەرژەوەندی د وێ ناڤچەیا مەبەستدار دا هەیە ئەڤە ژلایەكی ڤە، ژلایەكێ دی ڤە كا چاوا نەخشەسازیەكا نوی بۆ وێ ناڤچەیا ناڤبری هاتیە دارێشتن كو وەكی خوە بهێتە جێ بەجێكرن. ئەڤجا پارتی دیموكراتی كوردستان ب درێژاهیا مێژوویێ شیایە ب دروستی و ژیواری وان هەمی پێشهات و بۆیەران هەست پێ بكەت، ڤەخوینیت و شرۆڤە بكەت، دووربینانە تەماشەی دكەت و ل گەل دژیت، هەلسەنگاندنەكا تیژ و كویر بۆ دكەت و ئەنجام و دەرئەنجامان دئێخیتە بەرچاڤ، دانوستاندنێ ل سەر دكەت، چ ل سەر ئاستێ رۆژهەلاتا ناڤین بن، یان ژی ل سەر ئاستێ ئیراقا فیدرال و هەرێما كورستانێ بن، هەروەسا خالەكا گرنگ و گەوهەری هەیە د ڤەخواندنا پارتی دا دپێشهات و بۆیەران دا هەژی ئاماژەپێكرنێ یە، ئەو ژی ب هیچ رەنگەكی پارتی ب چاڤەكێ حزباتیا بەرتەنگ، یان بەرژەوەندیا حزبی د وان گوهۆرین و پێشهاتان دا وەرنەگرتی یە، بەلكو ب گیانەكێ كوردپەروەرانە و نیشتیمانپەروەری سەرەدەری ل گەل وان پێشهاتان دا كریە، ئەڤەژی دزڤریتەڤە بۆ وان پرەنسیپ و پەیرە و بنەمایێن بابێ روحیێ مللەتێ كورد (مستەفا بارزانی) بۆ پارتی داناین و كو ب ریبازا بارزانی دهێنە ناڤكرن، پارتی ل سەر دچیت و پراكتیزە دكەت. رۆل و سەنگا پارتی د ڤەخواندنا وان پێشهات و بۆیەران دا دیاربیت، هێزا خوە ژ تاك ب تاكێ كورد وەردگریت و هەر ژ بۆی گەلێ كورد خەبات و تێكۆشانی و كوردایەتیێ دكەت، ئەڤرۆ ئەڤ وەرار و گەشەسەندن و پێشكەفتنا ل هەرێما كوردستانێ هەی ژ هەمی لایان ڤە، هەروەسا ئەڤ سەقامگێری و ئازادیا هاتی یە ئارایێ كو كوردستان كریە پەناگەهەكا ئارامیێ هەم بۆ كوردستانیا هەم ژی بۆ ئاواران، میناكەكا زێندی یە، گرۆڤە و بەلگەیەكا بەرجەستەیە ل سەر ڤەخواندن، شرۆڤەكرن، هەلسەنگاندنا راست و دروست ژ لایێ پارتی ڤە بۆ هەر پێشهات رویدانەكێ، یان ژی باشترە ببێژین ئەڤە هەمی دزڤریتەڤە بۆ رۆلێ كاریگەر یێ لێڤەگەر و سەرۆك و پێشمەرگێ هێژا و بەرێز (مسعود بارزانی) خوەدی سەربۆر و ئەزمۆن و كارێزما، خوە دی بریارێن بنەجه. ئەڤجا گشت كوردستانی پێ شانازن كو هەرێما كوردستانێ گەهاندیە ڤێ پیشكەفتن و كنارێ ئارامیێ، هەروەسا پاراستنا دەستكەفتێن هەرێما كوردستانی كو هزاران لاو و گەنجین كوردستانێ خوین و گیان و روح پێ بەخشی یە، ئەركێ هەر تاك و لایەنەكی یە.
