ڤـەكێشانـا هێزێن ئـەمریکی و دوبـارەبـوونـا تـیرۆرێ
شەیما مستەفا
ڤەكێشانا هێزێن سەربازیێن ویلایەتێن ئێكگرتیێن ئەمریكا ل دویڤ گرێبەستا د ناڤبەرا كۆمارا ئیراقا فیدرال و ویلایەتێن ئێكگرتیێن ئەمریكایە، دویماهی هاتنا ئەركێ هێزێن سەربازی ل ئیراقێ بێگومان دێ كاریگەریێن خوە هەبن، هەبوونا گرۆپێن ڕادیكال و تیرۆرست ئێك ژ هەڕە مەترسیێن مەزنە ل سەر دەڤەرێ، هەر چەندە د نوكە دا شیانێن ڤان گڕۆپان سنووردارن و گەلەك لاواز بووینە، بەلێ شانێن وان یێن نڤستی ماینە ئانكو شینوارێن وان ماینە ل دەڤەرێ و دبیت نەبوونا هێزێن سەربازی یێن نیڤدەولەتی ببیت ئەگەرێ دوبارە ئەكتیڤبوونا ڤان گڕۆپان و بەرمایكێن وان، هەروەسا ڤەگوهاستنا هێزێن سەربازی یێن ویلایەتێن ئێكگرتیێن ئەمریكا ژ بەغدا پایتەخێ ئیراقێ بۆ پایتەختێ هەرێما كوردستانێ، ئانكو هەڤلێرێ ئاماژەیە ب وێ چەندێ كو ئەمریكا گرنگیەكا مەزن ددەت هەرێما كوردستانێ و هەرێما كوردستانێ وەك هەڤپشكەك ستراتیژی دبینیت، ئەڤە ژی ڕۆلێ هەرێمێ ل دەڤەرێ بهێزتر دكەت و دیار دكەت كو هەرێما كوردستانێ چەند گرنگییەك مەزن هەیە ل رۆژهەلاتا ناڤین، ژ لایێ دی ڤە هێرشێن ئیسرائیلێ ل وەلاتێن سووریا و لبنان و جار جارا وەلاتێن دی رۆژهەلاتا ناڤین كریە د ڕەوشەكا نە سەقامگیر دا، هەروەسا قەیرانا ئابووری و سیاسی یا توركیا و شەڕێ ڕۆسیا و ئوكراینا ژی رۆژهەلاتا ناڤەڕاست كریە د ڕەوشەكا نە دیار دا، ئەڤە نە بتنێ ژ لایێ سیاسی و ئابووری ڤە بەلكی جیهان ب شێوەیەكێ گشتی نە سەقامگیرە و مەترسیا شەڕێ جیهانیێ سیێ ژی جارجار دهێتە باسكرن، ئەڤ نە سەقامگیریە دبیت دەلیڤە بۆ گرۆپێن ڕادیكال و توندڕەو و ڤالاهیێ ب دەلیڤەیەك زێڕین دبینن كو هێرش و تاوانێن خوە بهێزتر لێ بكەن و نە سەقامگیریێ زێدەتر لێ بكن و ترسێ پەیدا بكەن، د ڕەوشا تایبەت یا ئیراقێ دا وەلاتێ ئیراقێ نە ژمێژە ژ گرۆپێن تیرۆرستی رزگار بوویە و ئەڤ گرۆپە هاتینە، بەلێ وەكی مە ل سەری گۆتی ب تەمامی نەهاتینە ژناڤبرن، ئەڤە ژی نیشانا وێ چەندێ یە هەر دەمێ دەلیڤە هەبیت دشێن خوە كاڕا بكەن و دەست ب چالاكیێن خوە یێن تیرۆری بكەن، ئەڤجا ڤەكێشانا هێزێن سەربازی یێن ئەمریكی دێ مەترسیەك مەزن ل سەر دەڤەرێ پەیدا كەت نە بتنێ بۆ ئیراقێ بەلكی بۆ وەلاتێن هەڤسنوور ژی.
