ڤه‌كرنا په‌یمانگه‌ها هونه‌رێن جوان ل زاخۆ ب پێدڤی دزانیت
زاخۆ، عه‌لی حاجی:
حسێن پیرۆ، مۆزیكژه‌نه‌كێ باژێرێ زاخۆیه، ده‌رچوویێ كولیژا هونه‌رێن جوانه ل هه‌ولێرێ، د دیداره‌كێ دا بۆ رۆژناما ئه‌ڤرۆ دیار كر كو پێدڤی یه په‌یمانگه‌ها هونه‌رێن جوان ل زاخۆ بهێته ڤه‌كرن و دروستكرنا گرۆپێن مۆزیكێ دێ بیته رێیه‌ك خه‌لك ژ نێزیك ڤه گوهداریا سترانێ بكه‌ت.
زێده‌تر گۆت: دنوكه دا باژێرێ زاخۆ پێدڤیه‌كا زێده ب ڤه‌كرنا په‌یمانگه‌ها هونه‌رێن جوان هه‌یه، نه‌خاسمه كو پشتی بوویه ئیداره‌یا سه‌ربه‌خۆ، ژبه‌ر هندێ پێدڤی یه زێده‌تر هزر د ڤه‌كرنا وێ دا بكه‌ن و ل په‌روه‌رده‌یا زاخۆ ژی ماموستایێن وانه‌یا هونه‌ری گه‌له‌ك دكێمن و گرنگی پێ ناهێته دان، دروستكرنا گرۆپێن مۆزیكێ ل زاخۆ دێ بیته رێیه‌كا باش كو سترانبێژ و مۆزیكژه‌ن زێده‌تر نێزیكی خه‌لكی ببن و خه‌لكی ب خوه ژی حه‌ز ل سه‌ر ڤان جۆره گرۆپان هه‌یه و مه نمونه‌یێن زیندی ژی ل باژێرێ زاخۆ هه‌نه، گه‌له‌ك تیپ هاتینه دروستكرن به‌لێ ده‌مێ وان یێ كورته ئه‌و ژی ڤه‌دگه‌ریت بۆ نه‌بوونا پشته‌ڤانیێ ل وان تیپان و هه‌كه سازیه‌كا ب هێز ل زاخۆ هه‌بایه و پشته‌ڤانی ل وان تیپا هاتباكرن بێ گۆمان دا خزمه‌ته‌كا باش بۆ هونه‌ری هێته‌كرن و نوكه دا به‌ره‌لاییه‌كا زێده ژی دناڤ هونه‌ری دا هه‌یه و پێدڤی یه نه‌مینیت، و بۆ ڤێ قوناغێ پشته‌ڤانیا لایه‌نێن په‌یوه‌ندیدار بۆ گرۆپێن هونه‌ری گرنگه به‌لێ هه‌كه ئه‌و ژی پشته‌ڤانیێ نه‌كه‌ن باشتره سپۆنسه‌ر هه‌بن و پشته‌ڤانیێ بكه‌ن، ژبه‌ركو سپۆنسه‌ر و گرۆپێن هونه‌ری ژی دێ مفایی ژ وێ چه‌ندێ وه‌رگرن و ئه‌ڤ كاره ژی پێدڤی ب پێنگاڤێن رژد هه‌یه هه‌تا كو ب سه‌ر بگریت.
