ڤه‌كۆله‌ره‌كێ ناڤدارێ توركیا:ئیبراهیم ره‌ئیسی دووماهی شانسێ ده‌ستهه‌لاتا نها یا ئیرانێ یه
ئه‌ڤرۆ:
ڤه‌كۆله‌ره‌كێ ناڤدارێ توركیا دیار دكه‌ت كو ئیران د هه‌موو بیاڤه‌كێ دا تووشی قه‌یرانه‌كا گه‌له‌ك مه‌زن هاتیه، گه‌له‌ك ده‌ڤه‌رێن ئیرانێ تووشی قه‌یرانا ئاڤێ بووینه، خوه‌نیشادان ل دژی ده‌ستهه‌لاتێ به‌رفره‌هتر دبن و ل ئالیێ دی په‌یوه‌ندیێن ئیرانێ ل گه‌ل جیهانا ده‌رڤه ژی گه‌له‌ك د خرابن، ژ به‌ر هندێ ژی ره‌ئیسی دووماهی شانسێ ده‌ستهه‌لاتا نها یا ئیرانێ یه.
فه‌هیم تاشته‌كین ڤه‌كۆله‌رێ كاروبارێن رۆژهه‌لاتا ناڤین دیار دكه‌ت كو ئیبراهیم ره‌ئیسی د ده‌مه‌كێ دا بوویه سه‌رۆك كۆمارێ ئیرانێ كو ئیران د ناڤخوه دا تووشی گه‌له‌ك قه‌یرانێن مه‌زن هاتیه، رێژا بێكاریێ گه‌له‌ك زێده بوویه، ژ به‌ر ڤایرۆسێ كۆرۆنایێ رۆژانه نێزیكی هزار كه‌س ل ئیرانێ دمرن و هه‌تا نها ژی ده‌ستهه‌لاتێ نه‌شیایه وه‌كو پێدڤی هاریكاریا خه‌لكی بكه‌ت، ل ئالیێ دی ژ به‌ر دۆرپێچێن ل سه‌ر ئیرانێ قه‌یرانا ئابووری یا ئیرانێ ژی گه‌له‌ك دژوارتر لێ هاتیه و خه‌لك ژ سیسته‌مێ نها گه‌له‌ك تووره نه، هه‌كه ره‌ئیسی بشێت ره‌وشا ئیرانێ باش بكه‌ت ره‌نگه ده‌ستهه‌لاتا نها بشێت هه‌ناسه‌كا دی وه‌ربگریت لێ هه‌كه ره‌وش وه‌كو نها به‌رده‌وام بیت دێ خوه‌نیشادان ل هه‌موو ئیرانێ ده‌ستپێكه‌ن و گۆت: (ژ به‌ر هندێ ژی ئه‌ز دبێژم كو هه‌لبژارتنا ئیبراهیم ره‌ئیسی وه‌كو سه‌رۆك كۆمارێ ئیرانێ شانێ دووماهیێ یێ ده‌ستهه‌لاتا نها یا ئیرانێ یه و هه‌كه ره‌ئیسی هنده‌ك تشتێن باش د به‌رژه‌وه‌ندیا وه‌لاتیان دا نه‌كه‌ت دێ ره‌وشا ناڤخوه‌یی یا ئیرانێ گه‌له‌ك خرابتر لێ هێت، چونكو بێكاری گه‌له‌ك زێده بوویه خه‌لك برسی نه و ژ سیسته‌مێ نها بێزار بووینه، ژ به‌ر هندێ ژی هه‌كه ره‌ئیسی هنده‌ك تشتان نه‌كه‌ت دێ ئه‌و یه‌ك بیته ده‌ستپێكا گوهۆرینێن گه‌له‌ك مه‌زن ل ئیرانێ).
ڤه‌كۆله‌رێ ناڤدارێ توركیا هه‌روه‌سا دیار ژی دكه‌ت كو ئێك ژ كارێن هه‌ری گرنگ ل پێشیا ره‌ئیسی بابه‌تێ به‌رنامێ ئه‌تۆمی یه، دڤێت ره‌ئیسی چاره‌سه‌ریه‌كێ بۆ به‌رنامێ ئه‌تۆمی یێ ئیرانێ په‌یدا بكه‌ت، چونكو هه‌تا رێككه‌فتنه‌كا نوو ل گه‌ل ئه‌مریكا د بیاڤێ به‌رنامێ ئه‌تۆمی و پرسێن دی ل گه‌ل ئیرانێ دا نه‌هێته كرن سزایێن ئابووری یێن ل سه‌ر ئیرانێ دێ وه‌كو خوه مینن و ره‌نگه دژوارتر ژی ببن، ژ به‌ر هندێ ژی هه‌كه سزایێن ل سه‌ر ئیرانێ وه‌كو خوه بمینن خه‌لك دێ نه‌رازیبوونا خوه ل دژی سیسته‌می دیار كه‌ن و ده‌ست ب خوه‌نیشادانان كه‌ن و گۆت: (ل گۆر تشتێ ئه‌ز دزانم پرانیا خه‌لكێ ئیرانێ گه‌هشتنه ڤێ باوه‌ریێ كو دڤێت به‌رپرسێن نها یێن ئیرانێ ب رێیا دانوستاندنان ئاریشێن هه‌ی ل گه‌ل ئه‌مریكا چاره‌سه‌ر بكه‌ن، خه‌لكێ ئیرانێ ژ گه‌له‌ك روودانێن نها ئاگه‌هدارن و ئه‌و ژی باش دزانن كو ده‌ستهه‌لاتێ دڤێت ب رێیا دروستكرنا قه‌یرانان ژیێ خوه درێژ بكه‌ت، لێ قه‌یرانێن كو ده‌ستهه‌لات دروست دكه‌ت هه‌موو بووینه بارگرانی و خه‌لك باجا سیاسه‌تا شاش یا به‌رپرسێن نها دده‌ت، ژ به‌ر هندێ ژی ئه‌ز دبێژم هه‌لبژارتنا ئیبراهیم ره‌ئیسی وه‌كو سه‌رۆك كۆمارێ ئیرانێ دووماهی شانسێ ده‌ستهه‌لاتا نها یه و هه‌كه ره‌ئیسی د كارێ خوه دا سه‌ركه‌فتی نه‌بیت دێ ئیران تووشی قه‌یرانه‌كا گه‌له‌ك مه‌زنتر ژ یا نها بیت).
ناڤهاتی د دووماهیا ئاخڤتنا خوه دا ئه‌و یه‌ك ژی دیار كر كو دڤێت ره‌ئیسی بزاڤا هندێ بكه‌ت كو په‌یوه‌ندیێن ئیرانێ ل گه‌ل وه‌لاتێن عه‌ره‌بی ئاسایی بكه‌ت، هه‌كه ره‌ئیسی وه‌كو سه‌رۆك كۆمارێ به‌ری نها ب ره‌نگه‌كێ توند سه‌ره‌ده‌ریێ ل گه‌ل روودانان بكه‌ت و سیاسه‌ته‌كا نه‌رم برێڤه نه‌به‌ت دێ ئیران تووشی ئالۆزیێن گه‌له‌ك مه‌زن بیت، چونكو ئه‌مریكا، ئیسرائیل و وه‌لاتێن رۆژئاڤایی پشتی هێرشا ڤێ دووماهیێ یا ل سه‌ر گه‌میا ئیسرائیلێ دخوازن به‌رسڤا ئیرانێ بده‌ن، بێگومان هه‌كه په‌یوه‌ندیێن ئیرانێ ل گه‌ل وه‌لاتێن رۆژئاڤایی پتر ئالۆز ببن دێ قه‌یرانا ئابووری ل ئیرانێ دژوارتر لێ هێت و خه‌لك دێ ل دژی سیسته‌مێ نها ده‌ست ب خوه‌نیشادانێن مه‌زن كه‌ن.
