ڤه‌هێل دخوازیت سترانه‌كا دوقۆلی ل گه‌ل هونه‌رمه‌ند (ئیسماعیل جومعه)ی بێژیت
ئه‌ڤرۆ، شاهۆ فه‌رید:
سترانبێژی گه‌نج (ڤه‌هێل شه‌وكه‌ت) د دیداره‌كێ دا بۆ رۆژناما ئه‌ڤرۆ دیار كر كو هه‌ر ژ ده‌سپێكا من یا كارێ ستران گوتنێ من ستایلێ فلكلۆرێ هه‌ڤچه‌رخ هه‌لبژارتیه كو قوتابخانا ماموستایێن به‌ره‌بابێ زێرین وه‌كو (سه‌میر زاخۆیی و ئه‌یازی و ئه‌رده‌وان و……هتد) و ده‌نگێ من ژی ئه‌و ستایله و یێ ب ڤێ چه‌ندێ دلخوه‌شم و تشتێ نه‌خوه‌ش ژی ده‌مێ سترانبێژه‌ك ده‌ستكاریێ د سترانه‌كا فلكلۆری دا دكه‌ت د په‌یڤان دا یان وێ سترانێ بۆ سه‌رده‌میانه ب گوهۆڕیت، ژ به‌ر كو ئه‌ڤ چه‌نده تام و خوه‌شیا سترانێ دبه‌ت.
ناڤهاتی گۆت: هه‌كه سترانبێژ نه‌بام دا هونه‌ردوست بم ژ به‌ر كو حه‌زا من گه‌له‌كه بۆ هونه‌ری و نوكه ژی چ كار و به‌رهه‌م د ده‌ستێن من دا نینه و من دڤێت به‌هرا پتر د ناڤ خه‌لكی و سوشالێ دا باش بهێمه نیاسین، دووڤ دا هزرێ د چێكرنا كلیپه‌كێ دا بكه‌م و هه‌كه ده‌لیڤه ژی هه‌بیت حه‌ز دكه‌م سترانه‌كا دوقۆلی دگه‌ل هونه‌رمه‌ند (ئیسماعیل جومعه)ی بێژم، ژ به‌ر كو ده‌نگێن مه گه‌له‌ك نێزیكی ئێكن.
ل دووماهیێ ڤه‌هێلی خویا كر كو ئه‌گه‌رێ بێده‌نگیا وی بۆ كاودانێن ژیانا گشتی تێدا دبووریت ڤه‌دگه‌ڕیت، ئه‌ڤه دده‌مه‌كی دایه كو هه‌تا نوكه د ناڤ هونه‌ری ژی دا یێ پێنگاڤێت ده‌سپێكێ د هاڤێژیت و یێ بزاڤان دكه‌ت په‌یڤ و ئاوازێن باش ب ده‌ستخوه‌ڤه بینیت و كارێن جوان یێن هونه‌ری پێشكێشی حه‌ز ژێكه‌رێن ده‌نگێ خوه بكه‌ت.
