ڤه‌ڕێژا كوردێت ئاقل ده‌وله‌ت نه‌ڤێت!
ده‌مێ سه‌رۆكێ هه‌رێما كوردستانێ پارسال به‌حسێ ئاڤاكرنا ده‌وله‌تێ كری، ئاخڤتنكه‌را وه‌زاره‌تا ده‌رڤه‌یا ئیرانێ و هه‌روه‌سا جێگرێ وه‌زیرێ كاروبارێت ده‌رڤه‌یێ ئیرانێ عه‌بدولاهیان، هه‌ردوك لسه‌ر هندێ د رژدبوون كو كوردێت ب ئاقل چ ده‌وله‌ت نه‌ڤێن. رۆژا سێشه‌مبی به‌رپرسێ ئێكێ یێ قونسلخانه‌یا كۆمارا ئیسلامیا ئیرانێ، دۆژمنا ده‌وله‌تا كوردا یا هژماره ئێك، ل كوچكا په‌رله‌مانێ كوردستانێ به‌رهه‌ڤبوو و كوردێت ب ئاقل مشێورا خۆ پێدكر كانێ دێ چاوا شێن سه‌رۆكێ هه‌لبژارتیێ كوردستانێ ژ جهێ بڕیارێ دویرئێخن ئان لێوازكه‌ن.
ئیرانێ باوه‌رنه‌دكر هوسا بساناهی دێ كوردێت (ب ئاقل!) ده‌ست وێڤه چن و سه‌ركه‌تنێت ملله‌تێ خۆ قوربانی به‌رژه‌وه‌ندێت وێ كه‌ن. ب ڤێ پێنگاڤێ ئیران شیا تبلا خۆ د به‌ر شویتكا ته‌ڤنێ ئێكگرتنا به‌رۆكێ كوردستانێ دا ببه‌ته‌خار و ژ نوكه پێڤه هه‌كه ئێكێ وه‌كی سه‌رۆك بارزانی شه‌هره‌زا سه‌ركێشیا وێ نه‌كه‌ت دێ هه‌رێم د پێله‌كا دژواریا سیاسی تشقلیت و وه‌كی ده‌ڤه‌رێت ئیراقێ ڤێ جارێ بۆ كوردا بیته جه‌هنه‌م و كورد دێ كه‌ڤنه به‌ر حنگێت (دلۆڤانیا!) قاسمێ سلێمانی و هه‌ڤگورێت وی ژ عامریا و خوراسانیا.. . هتد، ئه‌وێت ده‌ڤێ خۆ د بای دوه‌رینن به‌س دا كورده‌ك بكه‌ڤیته ده‌ستا.
ئه‌و تشتێ ل په‌رله‌مانێ كوردستانێ هاتیه‌كرن، هه‌كه ئانكویه‌ك ژ بۆ هه‌بیت، ژ وێ چه‌ندێ ناده‌ركه‌ڤیت كو پێنگاڤا ئێكێ بوو بۆ سستكرنا به‌رپێڕهێ كوردا ل ده‌رڤه و نه‌هێلانا وێ باوه‌ریا بۆ خه‌لكێ بیانی چێبووی، ل ژۆریێ ئیراقێ (ژێریا كوردستانێ) ره‌نگه خۆسه‌ریه‌كا هه‌ی یا كێنجا مه‌زنا ئیرانێ تێدا نه‌بیت و نه‌بوونا ده‌ستهه‌لاتا ئیرانێ ل كوردستانێ پێكه‌رێ سه‌رپشكێ كێمیا كریارێت خۆكوژیێ و په‌قاندنا ترومبێلا بوو و ل رۆژا سێشه‌مبی به‌رپرسێ قونسلخانه‌یا ئیرانێ ده‌رگه‌هێ تێكشێلانێ ل كوردستانێ ڤه‌كر و دیت تێدا یێ ب هێزه و ئێدی ژ نهۆ پێڤه باوه‌رناكه‌م باژێڕێت ده‌ستێ ئیرانێ لێ درێژ ته‌نا بمینن و خۆشیێ بخۆ ببه‌ن و كه‌ركویكا ل ژێر رێڤه‌به‌ریا ئێكه‌تیێ و گۆڕانێ باشترین میناكه بۆ ڤێ ئاخڤتنێ. چنكی هندی مالكیێ دۆستێ وان حوكم ل كه‌ركویكێ دكر رۆژ نه‌دبووری سێچار ترومبێل ل پایته‌ختا پێترۆلێ نه‌په‌قیبان و ب ده‌ها كه‌س نه شاتانه‌ببانه عه‌ردی. نۆكه دۆستێت ئیرانێ، كوردێت ب ئاقل، دێ كارێ خۆ كه‌ن دا هه‌ولێرێ ژ بن ده‌ستێ پارتی بیننه ده‌رێ و بكه‌نه به‌رۆكێ شه‌ڕی و شه‌ڕی ژ باژێڕێ خۆ، سلێمانیێ، دویركه‌ن حه‌تا كه‌لا كوردینیێ دكه‌ڤیت و پاشی دێ ئیرانا ئاقل نیشا وان دای گوهێ وان گریت و تبلێت وان ژێ ستینیت و ب ئیمزایێت وان دۆستێت بۆ كوردا چێبووین ژ كوردستانێ ده‌رێخیت.
بۆ ئیرانێ چ سه‌ركه‌تن ژ وێ مه‌زنتر نینن پێ ئه‌مریكا و ئه‌وروپا ژ كوردستانێ بینته ده‌رێ و رێگرێ چێبوونا ئیمپه‌راتۆریێ نه‌هێلیت و ژبه‌ر ده‌ست و پێت خۆ راكه‌ت. ئیران باش دزانیت ژبلی بارزانی كه‌س نینه رێبازا ملله‌تینیێ به‌ره‌ڤ سه‌ركه‌تنێ ببه‌ت و دزانیت دێ شێت ساناهی ده‌ستێ خۆ ب سه‌رێ كوردێت ئاقلدا ئینیته‌خارێ و عیدكا وان كه‌ت، ژبه‌ر هندێ به‌رده‌وام ته‌پك بۆ پارتی ڤه‌ددان.
كوردێت ئاقل و (ره‌وشه‌نبیر!) تێندایێ ئیران ل یه‌مه‌نێ یا به‌رقولوپۆكبووی و ل سوریێ ژیێ ئه‌سه‌دی یێ كورت بووی و حه‌سه‌نێ نه‌سرولاهی ژی یێ به‌ر ب حه‌سه‌نێ سه‌رشۆڕكریڤه دچیت رابوون كومپلۆتا په‌رله‌مانی كر دا پارتی ژ رێیا خۆ ڤه‌ده‌ن.
ئه‌مێ دبینین جهێت نۆكه هه‌ڤسۆزێت ئیرانێ لێ، كورد و تركومان لێ دهێنه ره‌زیلكرن و ژ سه‌ر جه و وارێت وان دهێنه ده‌رێخستن وه‌كی تۆزخورماتۆ، پشتی پێشمه‌رگه‌ی ب خوینا خۆ وێرێ ژ داعشیا ستاندی مێرخاسێت ئیرانێ و مالكی خوراسانی و عامری و حه‌ره‌س سه‌وری ل سه‌ر سه‌را و سه‌ر چاڤا ئینان به‌ردانێ.
دیاره ئه‌و تشتێ پارتی، نه‌خاسمه سه‌رۆك بارزانی كری و بوویه ستری د بنێ پێ پلانا ئیرانێڕا، یا ده‌ست دانانه‌سه‌را هه‌می ژێریا كوردستانێ، ناگه‌هیته ئارمانجا خۆ هندی سه‌رۆك بارزانی لسه‌ر كورسیا سه‌رۆكیێ بیت.
ئه‌وروپی و ئه‌مریكی باش دزانن هه‌كه پارتی شكه‌ست، ده‌رسا شیعێت ئیراقێ دێ ل كوردستانێ ژی ب سه‌رێ وان هێت و كوردێت ب (ئاقل!) دێ ده‌ستهاڤێژنێ خه‌لكێ نه لدویڤ كه‌یس و مه‌یلا ئیرانێ ژ هۆلێ راكه‌ن و یا ب سه‌رێ عه‌ره‌بێت سوننه هاتی ئیننه سه‌رێ وان و هوسا ئه‌و پیچكا سیناهیا خۆ تێڕا ددیت هێته ڤه‌شارتن و ل دویماهیێ زێده‌باری قوربانیێت وان ژ سه‌رخاترا ملله‌تێ كورد داین كوردستان بیته تارستان و ئه‌و دێ ده‌ست ژ پیا درێژتر و گونه‌هبار ژ ده‌ڤه‌رێ ده‌ركه‌ڤن.
سێره‌یا پارتیا كۆمۆنیستا كوردستانێ و به‌رهه‌ڤیا په‌رله‌مانته‌رێ وێ ل روینشتنا په‌رله‌مانی ژبیرڤه‌كرنا قه‌سابخانێت ئێكه‌تیێ ب سه‌رێ وان ئیناین بوو و جزایێ هندێ بوو هه‌كو پارتی ئه‌و ژ به‌عسیا و ئێكه‌تیێ هه‌ردوكا پێكڤه پاراستین.
كۆمه‌لا ئیسلامی ژی ڤیا زرنگێنا زنجیرێت سه‌رۆك بارزانی ژ پێت سكرتێرێ وان ڤه‌كرین د گوهادا نه‌مینیت و حه‌قێ قه‌نجیێ دایێ.
ئێكگرتوو ژی وه دیاره یا خۆ ل به‌ر ئیرانێ شریندكه‌ت و دڤێت به‌رپێكه‌كێ بده‌ته به‌ر پارتی دیمۆكرات و به‌رپێڕهێ خۆ فره‌تر لێ بكه‌ت.
ئه‌ڤه به‌رێ دارا كوردێت ئاقل ده‌وله‌ت نه‌ڤێته. هه‌كه تڤیابا وان پارتیا داخاز ژ بارزانی كربا ببیته سه‌رۆك و سه‌ركێشیا كاروانێ چێكرنا ده‌وله‌تێ بكه‌ت.
