ڤه‌ڕێژا چیرۆكا (ره‌ڤینا دووماهیێ)
ژ نڤیسینا: ئه‌لفرید هیچكۆك
وه‌رگێران ژ ئینگلیزی: شه‌مال ئاكره‌یی
مه‌لیۆنێره‌ك ژ به‌ر كوشتنا كه‌سه‌كی ل گزیرته‌یه‌كا ڤه‌ده‌ر و دووره‌ده‌ست هاتبوو زیندانیكرن.. ژ به‌ر كو كه‌سه‌كێ مه‌لیۆنێر بوو، بریارا به‌رتیلكرنا زێره‌ڤانه‌كێ زیندانێ دا داكو ب هه‌ر به‌هایه‌كی هه‌بیت، وی ژ وێ زیندانێ رزگار بكه‌ت!.
زێره‌ڤانی ئه‌و ئاگه‌هدار كر كو رێكارێن زێره‌ڤانیێ گه‌له‌ك د توندن و كه‌س نه‌شێت ژ گزیرته‌یێ بره‌ڤیت ب تنێ ب ئێك حاله‌ت نه‌بیت ئه‌و ژی ب مرنێ!. لێ چونكی به‌رتیلێن ب مه‌لیۆنان ل گه‌ل زێره‌ڤانی گۆتبوو، و خوه‌یا یه “پاره به‌ری دحه‌لینیت”، ئه‌ڤێ چه‌ندێ زێره‌ڤان هاندا كو هزرێ د بیرۆكه‌یه‌كا سه‌یر دا بكه‌ت، داكو مه‌لیۆنێر پێ بره‌ڤیت و رزگار ببیت.. زێره‌ڤانی پلانا رزگاربوونێ گۆته مه‌لیۆنێری كو ب ڤی ره‌نگی بوو، ” گوه بده من، ب تنێ ئه‌و تشتێ ژ زیندانا ڤێ گزیرته‌یێ بێ زێره‌ڤانیه‌كا توند ده‌ردكه‌ڤیت تابووتێن مریانه.. تابووتێن كه‌سێن د 24 ده‌مژمێران دا مرین ل جهه‌كی كۆم دكه‌ن و پاشان دبه‌نه سه‌ر كه‌شتیه‌كێ و ب هاریكاریا چه‌ند زێره‌ڤانان دهێنه ڤه‌گوهاستن بۆ سه‌ر ئه‌ردی، داكو د گۆڕستانێ دا بهێنه ڤه‌شارتن، و هه‌ر ب له‌ز چه‌ند رێوره‌سمێن ساكار بۆ دهێنه كرن و زێره‌ڤان دزڤرنه‌ڤه!
هه‌كه مری هه‌بوون، رۆژانه ل ده‌مژمێر 10ی سپێدێ تابووت دهێنه ڤه‌گوهاستن.. له‌وڕا ب تنێ رێك ژ بۆ رزگاربوونا ته ئه‌وه تو خوه بهاڤێژیه د ناڤ تابووته‌كێ دا، داكو ل گه‌ل ته‌رمێ مری ته ببه‌ن.. و ده‌ما دگه‌هنه سه‌ر ئه‌ردی و ڤه‌شارتن ته‌مام دبیت. ل وێ رۆژێ ئه‌ز دێ مۆله‌ته‌كا ته‌نگاڤ وه‌رگرم .. و پشتی نیڤ ده‌مژمێرێ دێ گه‌همه جهێ گۆڕێ و دێ ته ژ گۆڕێ ده‌رئێخم.. و تو وی پاره‌یێ مه رێككه‌فتن ل سه‌ر كری دێ ده‌یه من. پشتی هنگی ئه‌ز دێ زڤرمه‌ڤه سه‌ر كارێ خوه ل زیندانێ و تو دێ خوه به‌رزه‌كه‌ی. به‌زه‌بوونا ته دێ بیته نهێنیه‌كا هه‌تا هه‌تایی .. ته چ گۆت؟”.
هه‌لبه‌ت مه‌لیۆنێری هزرا.. خوه د ڤێ پلانێ دا كر و زانی كو سه‌ركێشی و موغامه‌ره‌یه‌كا دیناتیه.. لێ باشتره ژ كوشتنا ب كورسیكا كاره‌بێ!. مه‌لیۆنێرێ زیندانی رازیبوو.. هه‌ردو رێككه‌فتن كو سوبه‌هی مه‌لیۆنێر ب دزیكیڤه بچیته جهێ تابووتان و خوه بكه‌ته د ناڤ ئێكه‌مین تابووتا ل سه‌ر ده‌ستێ چه‌پێدا.. ئه‌ڤه هه‌كه یێ ب شانس بوو و مرن هه‌بوو!.
ل رۆژا پاشتر، و ل ده‌مێ بێهنڤه‌دان و ده‌ركه‌فتنا زیندانیان ژ كونجێن زیندانێ ژ بۆ به‌ر هه‌تاڤێ.. مه‌لیۆنێر به‌ر ب ژوورا تابووتان چۆ.. ب خوه‌شحالیڤه دو تابووت دیتن.. ترسێ خوه لێدا، چاوا بۆ نزیكی ده‌مژمێره‌كێ دێ ل گه‌ل مرۆڤه‌كێ مری د تابووتێ دا یێ درێژكری بیت؟!. لێ حه‌زا مانێ هانا وی دا كو سه‌رێ تابووتێ ڤه‌كه‌ت و ب چاڤێن نقاندیڤه، داكو ژ ترس و سه‌همێ نه بزدیێت، خوه پاڤێته د ناڤ تابووتێ دا.. سه‌رێ تابووتێ باش قه‌پاتكر و خوه گرت هه‌تا كو ده‌نگێ زێره‌ڤانان هاتی كو یێ خوه به‌رهه‌ڤ دكه‌ن ژ بۆ ڤه‌گوهاستنا تابووتان بۆ سه‌ر بانێ كه‌شتیێ.. د تابووتێ دا بێهنا ده‌ریایێ كر و هه‌ست ب لڤینا كه‌شتیێ ل سه‌ر ئاڤێ كر.. هه‌تا گه‌هشتینه ئه‌ردی..
پاشت ڕا، هه‌ست ب لڤینا تابووتێ كر و ئاخڤتنا ئێك ژ زیره‌ڤانان گوهلیبوو ده‌ما گۆتی، “سه‌نگێ ئه‌ڤی ته‌رمی چه‌ندێ گرانه!”. هه‌ست ب دلته‌نگیێ كر و ترسیا كو ئه‌و زێره‌ڤان گومانێ ببه‌ت و ده‌رێ تابووتی ڤه‌كه‌ت.. دلته‌نگیا وی هه‌تا راده‌یه‌كێ نه‌ما ده‌ما گوه ل زێره‌ڤانه‌كێ دی بووی، “كێشه‌یا ڤان زیندانیێن گه‌له‌ك قه‌له‌و چه‌ند د گرانن”. مه‌لیۆنێر هنده‌كێ ئارام بوو نه‌مازه ده‌ما هه‌ست كری كو تابووت هاته داهێلان بۆ ناڤ گۆڕی.. و ده‌نگێ ئاخێ و خیزی هاتیه گوهێن وی، و ده‌ما ئاخ و خیز كه‌فتیه سه‌ر قه‌پاغێ تابووتێ.. ده‌نگێ ئاخڤتنا زێره‌ڤانان هێدی هێدی كێم بوو.. نها ئه‌و لگه‌ل ته‌رمێ وی زه‌لامێ بیانێ ب كووراتیا سێ مه‌تران یێ ڤه‌شارتیه و یێ دتاریه‌كا ره‌ش دا و هه‌ر خوله‌كه‌كا د بۆریت هه‌ناسا وی یا ب زه‌حمه‌تتر دكه‌ڤیت..
هه‌ر چه‌نده وی باوه‌ری ب وی زێره‌ڤانی نه‌بوو.. لێ ئه‌و ل وێ باوه‌رێ بوو كو حه‌زا زێره‌ڤانی ژ بۆ ب ده‌ستڤه‌ئینان مه‌لایینێن رێككه‌فتن ل سه‌ر هاتیه كرن، ڤێ چه‌ندێ ئه‌و پشتراستكر كو زێره‌ڤان دێ سۆزا خوه بجهئینیت.. بزاڤكرن كو كونترۆلا ئۆكسجینێ بكه‌ت و زوو بكارنه‌ئینیت.. چونكی وی ب تنێ نزیكی نیڤ ده‌مژمێرێ هه‌یه، پشتی ره‌وش بێده‌نگ دبیت و زێره‌ڤان بهێت و وی ژ گۆڕێ ده‌ربینیت و رزگار بكه‌ت. پشتی بیست خوله‌كان هه‌ناسا وی ب له‌ز كه‌فت و بێهنا وی ته‌نگ بوو.. گه‌رمی ژی یا بێ سنوور بوو.. چو نینه ده‌ه خوله‌ك یێن ماین.. پشتی هنگی دێ هه‌ناسه‌یه‌كا درێژ یا سه‌ربه‌ستیێ هه‌لكێشیت و جاره‌كا دی، دێ رۆناهیێ بینیته‌ڤه..
پشتی بێهنه‌كا دی بۆری، ده‌ست ب كوخینێ كر و 10 خوله‌كین دی ژی بۆرین.. ئۆكسجین به‌ر ب نه‌مانێڤه دچۆ.. و ئه‌و زێره‌ڤانێ گێژ هێشتا نه‌هاتیه.. ده‌نگه‌كێ ژ دوور گوهـلێبوو.. لێدانا دلێ وی زێده بوو.. ل دووماهیێ، دڤێت ئه‌و زێره‌ڤان بیت…
لێ ئه‌و ده‌نگ هه‌ر زوو به‌رزه‌بوو و نه‌ما.. هه‌ستكر كو جۆره‌كێ هیستیریایێ خوه ب سه‌رداگرت.. ئه‌رێ ما ئه‌و ته‌رم ل جهێ خوه لڤی یه.. خه‌یالا وی بۆ وی وه‌سا خوه‌یا كر كو ته‌رم بۆ وی یێ دبشكوڕیت، ل بیرا وی هات كو وی شخارته‌یه‌كا ڤێ هه‌ی.. ره‌نگه هێشتا ده‌م نه‌هات بیت لێ ترس و له‌رزا وی، وه لێكر كو ده‌م ب له‌ز چۆ.. شخارته ژ به‌ریكا خوه ئیناده‌ر داكو ل ده‌مژمێرا ده‌ستی خوه بنێڕیت و ده‌می بزانیت، دڤێت هێشتا ده‌نگ ما بیت!.. ل سه‌ر كێمیا ئۆكسجینێ زلكه‌ك هه‌لكر و نیزیكی ده‌مژمێرێ كر.. چل و پێنج خوله‌ك یێن بۆرێن!. لڤێره ترس و له‌رزا ب راستی ده‌ستپێكر.. ژ نشكه‌كێڤه و ل به‌ر رۆناهیا زلكی شخارتێ دێمێ وی كه‌سێ مری هاته پێش چاڤان.. و ئاڤڕی ڤه‌دا و به‌رێ خوه دده‌تێ.. داكو دووماهی تشت ئه‌و پێشبینیێ بكه‌ت د ژیانێ دا ببینیت.. دیت كو دێمێ زێره‌ڤانی ب خوه یه!.
تێبینی:
خوانده‌ڤان دكارن، درێژاهیا ڤێ چیرۆكی ب (كلیپ فیلم) ل سه‌ر ڤی لینكێ خواری ببینن:
