ڤيديۆ: ب داهاتێ فرۆتنا دارێن گۆرستانا گۆندى هاريكاريا هه‌ژاران دكه‌ن
ئەڤرۆ نیوز، نەوزاد ھلۆری:
وەلاتیێن گوندێ ملێ مەیدانێ ل سنوورێ ناحیا شێلادزێ یا سەر ب قەزا ئامێدیێ ، ھەموو سالان یان چەند سالان جارەکێ ب شێوەیێ زووبارە دارێن سرۆشتیێن گورستانا گوندێ خوە د کەزێخن و ب بھایەکێ کێمتر ژ بازاری دفروشن و داھاتیێ وێ ژی ل سەر ھەژار و کێم دەرامەتان دھێتە دابەشکرن و ھندەک جاران ژی پێدڤیێن مزگەفت و گورستانێ دکرن.
کوڤان حەجی وەلاتیەکێ گوندێ ملێ مەیدانێ یە دیارکر کو ئەو بو پاراستنا داران ، دارێن گورستانێ د کەزێخن و گۆت: (ھەموو ئەو دارێن کەڤنار و تایێن زێدە ب دارێ ڤە و چەند سالان نەھاتینە برین و کەزاختن ، ئەم دبرین و پاشان ئەو دارێن کود ھێنە لێڤەکرن دفروشین و داھاتیێ وان ژی لسەر ھەژار و کێم دەرامەت دا دابەش دکەین و ھندەک جاران ژی پێدڤیێن مزگەفت و گورستانێ پێ دکرین ، و ل بازاری ب بھایەکێ کێمتر دفروشن و ھەموو خەلکێ گوندی ژبلی پێشمەرگە و قوتابیان پشکداریێ د برین و کەزاختنا داران دا دکەن).
شڤان محەمەد گۆت: (ئەم ھەموو گوندی پێکڤە دارێن گورستانێ د برین و دکەزێخین ، و کەلوپەێن مزگەفتا خوە و مزگەفتێن دن ژی پێ دکرین).
موحسن عەبدولرەحمان وەلاتیەکێ دانعەمرێ گوندی یە ، دیارکر کو ژیێ گورستانا ملێ مەیدانێ ژ ھزار سالان بوری یە و گۆت: (ئەڤە نێزیکێ 60 سالایە ھەر جار جار ئەم گورستانا خوە دکەزێخین و ھەموو دارێن زێدە و کەڤنار دبرین و کو زێدەتری ھزار داران د گورستانێ دانە ، و برینا داران و کەزاختن ژیەکێ درێژتر ددەتن داران و نوێ دبن ڤە).
موشیر محەمەد ب ھەمان شێوە ئەو ژی وەلاتیەکێ دانعەمرێ گوندی یە دیارکر کو ئەو ب ئاگەھداریا ژینگەھێ گورستانا خوە دکەزێخن و ئەو ژی دخوازن کو دار بھێنە کەزاختن و پاراستن و گۆت: ( رۆژانە ل دەما کەزاختێ ب شێوەیێ زوبارە ھەتا 20 کەسان پشکداردبین و رۆژانە ژی ھەتا ٥٠ بارێن داران دبرن ، پشتی فروتنا وان داھاتیێ وێ بو مزگەفت و گورستانێ و کرینا پێدڤیێن وان دمەزێخین).
زێدەتر گۆت: (دا کو دار ژیەکێ درێژ ببەت، بەردەوام پێدڤی ب کەزاخێ یە ب شێوەیەک ھەر 10 سالان جارەکێ دڤێت بھێتە کەزاختن ژ بەرکو ھندەک دار دناڤ گورستانا مە ھەنە ھەتا 500 سالان عەمر بریە ، و ئەگەر نەھێنە کەزاختن ئەو ھەند عەمری نابەن بەلکو دێ کێمتر بەن و دارەکا بێ سەر و بەر و ھەلوەریایی بیت ، بەلێ برین و کەزاختنا وان ژی ب ھەموو کەسان ناھێتەکرن بەلکو دڤێت ھندەک کەسانێن شارەزابن و سەنگا وان کێم بیت و ب داس و بڤران بھێنە برین نەک ب ماتورێ ژ بەرکو ماتوور داران ھشک دکەت).
کەزاختن و سەخبێریکرنا دارێن کەڤنار ب تایبەتی ئەگەر عەمرێ وێ ژ 50 سالان ببوریت، جارەکا دی دێ عەمرەکێ نوو دەتن دارێ کو زێدەتر مفا بو ژینگە و وەلاتیان ھەبیت.
