ڤۆلی بۆلا سەنحاریب بۆ پاشایا ئیراقێ
بۆ جارا دویێ د دیرۆكا خوە دا تیما كچێن یانەیا سەنحاریب ب ناسناڤێ قارەمانییا وەرزێ ئەف سالە 2025ێ یا كۆپا ئیراقێ بۆ یارییا ڤۆلی بۆلێ هاتنە خەلاتكرن پشتی شیایین د قۆناغا دویێ و فینالێ دا بێ خوسارەتی سەرێ لیستێ بهێن و دووماهی یاری و یا ڤەبڕ دا ب سەركەڤن ل سەر مێڤانێن قارەمانیێ یانەیا ئەكاد عەنكاوە ب سێ گێمان بەرانبەر گێمەكێ ب (13-25) (25-22) (25-20) (25-19) خالان.
د هەڤڕكیێن قارەمانیێ دا ل سەر ئاستێ یانەیێن ئیراقێ هەولێرا پایتەخت مێڤاندارییا وێ كری شەش یانەیێن ل هۆلا گرتییا یانەیا عەینكاوە دهێتە كرن، یانەیا سەنحاریب پشتی دقۆناغا ئێكێ دا ژ سیستەمێ كۆمان دا شیابوو سەركەڤتنێ ل سەر پێنچ یانەیان بینت وەكو قارەمانا كۆما ئێكێ دەربازبوویە قۆناغا دویێ، ئەوا بەری مەهەكێ ل سلێمانیێ هاتییە كرن.
دقۆناغا دویێ دا كچێن سەنحاریب سەركەڤتن ل سەر یانەیێن، قەرەقووش(3-1) گێمان، بەرانبەر ئەمانەت بەغدا (3-چنە)، بەرانبەر دەربەندیخان (3-چنە)، بەرانبەر كچێن یانەیا ئەفرۆدێت (3-چنە)، ل دووماهیێ ل سەر هەڤڕكا خوە یانەیا ئەكاد عەنكاوە ب(3-1) گیمان ب سەركەڤت، سەرێ لیستێ پاراست ب كۆمكرنا 15 خالان و سەرجەكێ تۆماركرنا خالان گەهشتنە 425 خالێن كۆمڤەكری.
ل دۆر ڤێ دەستكەڤتێ كچێن یانەیا سەنحاریب، رۆژنامەیا ئەڤرۆ بۆچوونێن جودا وەرگرتینە ئەوێن ب كەیفخوەشی و دەستكەڤتەكێ گرنگ داینە زانین.
داود رەبەن سەرۆكێ یانەیا سەنحاریب گۆت: سۆپاس بۆ خودێ پشتی ماندیبوونەكا مەزن و بەرهەڤیێن زێدەتری چار هەیڤان ئەم گەهشتینە ئارمانجا خوە، ئەڤ دەستكەڤتە نە بتنێ یانەیا سەنحاریبە بەلكو یێ پارێزگەها دهۆكێ یە و وەرزشا كوردستانێ، هەستەكێ بێ وەسفكرنە، پشتی چەند سالێن دووركەڤتنێ دوبارە هێزا ڤۆلی بۆلا كچێن پارێزگەهێ و یانەیا سەنحاریب ڤەگەریا و ئەڤە ژی ژ ڤالاتیەكێ نە هاتییە، بەلكو ب كارەكێ كۆم و ڕژدی بوویە.
هەروەسان ناڤهاتی گۆت: ژبۆ پشتەڤانییا تیما مە وەكو كارگێری و پشتەڤانییا پارێزگارێ دهۆكێ، ژلایێ ماددی و مەعنەوی ڤە هەر تشتەكێ پێدڤی بۆ تیمێ هاتە تەرخانكری، دەستڤەئینانا ناسناڤێ ئیراقی دگەل یانەیەكا وەرزێ بۆری قارەمان بوو و دیسان دناڤ ئەردێ وێ دا ب سانەهی نەبوو، سۆپاسییا كارگێرییا یانەیا دهۆكێ ژی دكەین كو پشتەڤانێن وێ ل هۆلا یاریێ بەرهەڤبووین و ئێك ژ خالێن هێزا تیما مە بوون، دیاربوو ژی كو ناسناڤێ بۆ پارێزگەها دهۆكێ یە و كەیفخوەشین ل سەر دەستكەڤتێ یانەیا سەنحاریب.
ژلایێ خوەڤە د. هەكار برقی ڕاهێنەرێ تیما سەنحاریب گۆت: من باوەری ب تیما خوە هەبوو ئەم ب گەهینە ئارمانجا خوە، سەرباری ئاستەنگێن كەڤتینە د ڕێكا مە دا ژ هنگاڤتن و نە پشكدارییا چەند یاریزانان د ماوەیێ ڕاهێنان و هەڤڕكیان دا، یا گرنگ پشتی زەحمەتەكا درێژ ئەم شیاین ل دووڤ پلانێن مە، گیانێ ب كۆم و پێگێرییا یاریزانا دگەل پشتەڤانییا كارگێرییا یانەیێ ئەوا مە ڤیایی ئەم گەهشتینێ و ناسناڤەكێ دی ل سەر دەستكەڤتێن پارێزگەها دهۆكێ زێدەكەین، ئەز بەحسی سەركەڤتنان ناكەم ژبەركو فەستیڤالەكا درێژ یا هەڤڕكیێ بوو، بتنێ دێ د سەقایێ نوكە یێ كەیفخوەشیێ دا بەردەوامبین، سۆپاسییا جەماوەرێ یانەیا دهۆكێ ژی دكەین گەشت كری وهاتینە هەولێرێ و پشتەڤانیەكا مەزن كری.
دۆرین رۆمێل ستێرا یانەیا سەنحاریب گۆت: شانازیێ پێ دكەین وەكو كچێن یانەیا سەنحاریب مە دەستكەڤتەكێ دی بۆ پارێزگەها دهۆكێ ئینا، ئەڤ ناسناڤە یا ب سانەهی نەبوو، لێ كاركرن یا ب ڕژد بوو، سۆپاسیا یانەیا خۆ و كادرێ ڕاهێنانێ و یاریزانان دكەم كو وەكو ئێك خێزان مە كار كر و گەهشتینە ئارمانجا خۆ، ناسناڤێ دویێ ئیراقێ بۆ مە گەلەك گرنگ بوو و مە شیا ناسناڤەكێ دی بینن و هەیبەتا ڤۆلی بۆلا سەنحاریب و پارێزگەهێ ڤەگەرینن، پێخوەشحالبوویم وەكو باشترین یاریزان ژی هاتیمە دەستنیشانكرن بۆ داهاتی دێ ڕژدبن بەردەوامیێ بدەینە دەستكەڤتان.
پیرۆزباهییا یانەیا سەنحاریب هاتە كرن
پارێزگارێ دهۆكێ ژی بەیانامەیا پیرۆزباهیێ بۆ یانەیا سەنحاریب بەلاڤكر پشتی ناسناڤێ ئیراقێ و نڤێسابوو، پیرۆزباهیێ ل یانەیا سەنحاریب یا دهۆكی دكە مكو ئەڤرۆ د خولا یارییا ڤۆلی بۆلا ئیراقێ ل باژێرێ هەولێر ناسناڤێ قارەمانییا ئیراقێ ب دەستڤە ئینایی، پیرۆزە ل شێرە كچێن دهۆكێ.
ژلایێ خوەڤە لەقێ ئێك یا پارتی دیموكراتی كوردستان پیرۆزباهی ل دەستكەڤتێ یانەیا سەنحاریب كر و هاتیە بەلاڤكرن، پیرۆزباهیێ ل یانەیا سەنحاریب یا دهۆكێ دكەین پشتی شیای ل فینالێ قارەمانییا ئیراقێ یا ڤۆلی بۆلێ ل سەر ئاستێ كچان ب دەستڤە بینت ئەوا ل هەولێرێ هاتیە كرن، ئەڤ دەستكەڤتە جهێ ڕێز و شانازیا مەیە، هیڤیخوازین هەر ل سەر ئاستێ زێرین د بەردەوام بن، پشتەڤانیا خۆ بۆ هەوە یێن هێژا دوپا دكەین و هیڤییا سەركەڤتنین زێدەتر.
د. ئەحمەد قاسم سەرۆكێ لژنەیا ئۆلمپی لقێ دهۆكێ پیرۆزباهیێن خوە گەهاندن ب دەستكەڤتێ یانەیا سەنحاریب ئەوێ كەیفخوەشیا خوە دیاركری بڤێ دەستكەڤتێ پارێزگەهێ و هیڤی خواست هەموو یانەیێن پارێزگەهێ بەردەوامبن ل سەر سەركەڤتن و پێشئێخستنا هەموو وەرزشان.
ئێحسان حەسەن ڕێڤەبەرێ چالاكیێن وەرزشی و دیدەڤان ل پارێزگەها دهۆكێ پیرۆزباهییا خوە دا بەلاڤكرییە، ب هەلكەڤتا ب دەستڤەئینانا ناسناڤێ قارەمانیا ڤۆلی بۆلا ئیراقێ بۆ جارا دویێ د دیرۆكا خوە دا، گەرمترین پیرۆزباهییان ئاراستەیی یانەیا سەنحاریب دكەین، ڤێ دەستكەڤتێ ل خەلكێ پارێزگەها دهۆكێ پیرۆزدكەین هەر ساخ و سەرفەرازبن و نەخشە ل دەستكەڤتێن مەزنتر.
ژلایێ خوەڤە جەمال سلێمان ڕێڤەبەرێ وەرزشی ل پارێزگەها دهۆكێ ژ گۆت: دەستكەڤتێ یانەیا سەنحاریب درێژەپێدانا ب دەستكەڤتێن یانەیێن پارێزگەهێ و ئەم سەرفەرازین و كەیفخوەشین، پیرۆزباهیێ ل یانەیا سەنحاریب دكەین ب ناسناڤێ خوە یێ ژ هەژی ئینایی، جهێ سەربلندیێ نە و دەستخوەشیێ لێ دكەین.
