ڤێرێ كوردستانه نه مووسله نه به‌غدا!
ئه‌ڤه هه‌یامه‌ك بوو من ئه‌ڤ چیڕه نه‌نڤیسی، به‌لێپا به‌ری چه‌ند رۆژه‌كا ئه‌ز و هه‌ڤاله‌كێ خوه پێكڤه چووین دا تێنده‌ینه خانیه‌كێ كرێكرنێ، به‌ری بچین ب رێكا ده‌للالی ژڤانێ به‌رێخودانا خانی هاتبوو دیاركرن و ژڤان پشتی نیڤرۆ بوو. دروسته حه‌تا چه‌نده‌كێ د وه‌ختێ بێهنڤه‌دانێڕا بوو، به‌لێ ئه‌ز چ بكه‌م هه‌كه ئه‌وێ ب كرێ دخانیڤه ل به‌ربهێن.
ئه‌م ل ژڤانێ دیاركری چووین و ل جهه‌كێ نێزیك راوه‌ستاین حه‌تا ده‌للال هاتی و مه پاشی قه‌ستا خانیێ دێ تێنده‌ینێ كر. ده‌للالی ل زه‌نگلا ده‌رگه‌هی دا ئه‌م بێهنه‌كا خۆش ماین پاشی مه هند دیت زه‌لامه‌ك ده‌ركه‌ت. پسیاركر: وه خێره؟ مه به‌رسڤ دا، گۆت (ئه‌مین دڤێن تێنده‌نه خانی هه‌كه كه‌ته دلێ مه كرێدارێن پشتی ته‌ینه). ب عه‌ره‌بی گۆت: ما ڤی وه‌ختی، نوكه مالبات هه‌می یا حازره و وه‌ختێ بێهنڤه‌دانێیه؟ مه گۆتێ: ما تێله‌فۆن بۆ ته نه‌هاتیه كو هنده‌ك دێ د ڤی ده‌میدا هێن خانی بینن؟ گۆت: به‌لێ!!
كورت و كرمانج، گۆته مه: كانێ ل ڤێرێ راوه‌ستن. زێده‌تری پێنج ده‌قیقا چوون، پاشی زڤڕیڤه و ده‌رگه‌ه ڤه‌كر و ب عه‌ره‌بی گۆت: كه‌ره‌مكه‌ن.
ئه‌م ژۆركه‌تین. مه گۆتێ: ئه‌ڤه هه‌یامه‌كێ درێژه هوون هاتینه ڤێرێ، ما ئێكی دلێ وه هێلایه؟ كوردستان وه‌لاتێ ئاشتیێ و پێكڤه ژیانێیه”. به‌لكی لنك هنده‌كا تشته‌كێ چریسه‌ت بیت ل دنیا بسورمانا وه‌لاته‌ك و مرۆڤه‌كێ ئاشتیخاز و چ هزرا تولڤه‌كرنێ د سه‌ریدا نه‌هێنه ڤه‌حه‌واندن هه‌بیت.
پشتی دانوستاندنه‌كا پیچه‌كێ درێژ ژ مه پرسین: هوین فه‌له‌نه؟ مه گۆت: نا، ئه‌م بسورمانین. بێهنكه‌كا دی چوو جاره‌كا دی پرسیڤه: هوین فه‌له‌نه به‌رسڤ نا بوو. ئینا گۆت: یا ژمنڤه هوون فه‌له‌نه. نابیت ئه‌م ده‌رگه‌هی بۆ فه‌لا ڤه‌كه‌ین.
ئه‌ڤه یێن هاتینه كوردستانێ دا ب ئاشتی و ته‌ناهی بژین، سه‌ربێنێن (مبادئ) ئاشتیێ د سه‌ریدا نینن و هه‌ر وه‌كی وان مرۆڤان هزردكه‌ن یێن فه‌رق و جوداهیێ ژ ئه‌گه‌رێن دینی دئێخنه ناڤبه‌را مرۆڤان، دایی یێن خودێ، نه‌دویره ئه‌و كابرا ب چاڤه‌كێ كێم، هه‌ر چه‌نده ل مالا خوه ژی نینه و ڤه‌حه‌ویایێ هنده‌كێن دییه، كو خه‌لكه‌كێ تێكه‌له‌یه ژ دین و ملله‌تێن ژێكجودا پێكدهێن، ل وان كه‌سێن نه بسورمان دنێڕیت.
دڤیا هه‌ر كه‌سێ دهێنه ڤێرێ به‌ری هه‌می تشتان ده‌وره بۆ بهێنه ڤه‌كرن و بهێنه تێگه‌هاندن كو ڤێرێ كوردستانه و مووسل و به‌غدا نینه. ل ڤێرێ هه‌می مرۆڤ ب قیمه‌تن و هه‌می ئۆل ل گه‌ل ئێك دژین گه‌له‌ك ره‌نگێن مالێن خودێ ل ڤێرێ دهێنه‌ئاڤاكرن. ژ مزگه‌فتێ ڤێڕا وه‌ره و حه‌تا دگه‌هیه دێر و كنیشته و په‌رێسگه‌ها. هه‌ر ئاڤاهیه‌كی ژ وان خه‌لكێ باوه‌رپێكه‌رێ دینێ وان دچنێ و كه‌س ناچیته ته‌لبا كه‌سێ و خودێپه‌رێسی ل ڤێرێ یا بێ ترسه.
ل كوردستانێ، مرۆڤێ كورد باوه‌ری، هه‌ر كه‌س ب ئه‌زمان و ئه‌لفۆبێیا خوه بخوینیت و بنڤیسیت. ل وه‌لاتێ مشه‌ختا قه‌ستكریێ، مالخوه‌یێن وی ناخوازن مرۆڤێ ئازا ژ ده‌یك بووی و هه‌وارا خوه تێئێخستی بهێنه ته‌په‌سه‌ركرن. من دڤێن بێژمه وێ مالباتا ژبه‌ر كوته‌كیێ ره‌ڤی چاوا ئه‌و هزر د سه‌ریدایه، هه‌كه ئێكێ فه‌له بچیت و هه‌وارا خوه تێ بێخیت وه‌نه‌كه‌ت ژۆركه‌ڤیته ناڤ ئاڤاهی، هه‌ر چه‌نده چ رۆژ ناده‌ربازبن كو فه‌لێن وان نه‌دڤیا بچنه د مالا وانڤه هه‌كه هنده‌كا ژ مرنا مسۆگه‌ر، ژ ناڤ پێلێن ده‌ریا بێ پاسه‌پۆرت مرۆڤێن رۆژهه‌لاتی دادعویریت، خلاسنه‌كه‌ن و ئه‌و بخوه باش دزانیت ژی پێنریا كه‌سێن ژ ئاڤێ دئیننه‌ده‌رێ بسورمانن، سورینه، ئیراقینه، فه‌له‌ستینینه، مسرینه و لیبینه و هه‌روه‌سا خه‌لكێ ئه‌فریقیا ژینه.. .. هد.
پشتی ل مه بسته‌بووین و من گۆتیێ ئه‌ز ژ ئه‌لمانیا هاتیمه. چه‌ند جاران گۆت: خۆزی ئه‌م ژی گه‌هشتباینه ئه‌لمانیا، چنكی ل وێرێ ژیان و ئه‌مان یا هه‌ی و مرۆڤی بهایێ هه‌ی. ل ڤێرێ مامه حێبه‌تی. ئه‌ڤان نه‌دڤیا ده‌رگه‌هی ل مه ڤه‌كه‌ن و بۆ ئه‌لمانیا خریكێنێن ڤێ دكه‌ڤن و باش دزانن ئه‌و كه‌سێن ل وێرێ خه‌لكێ دحه‌وینن فه‌له‌نه ڤێجا چ كاسۆلیك، پرۆتسته‌نت ئان ئۆرسۆدۆكس بن. ئه‌رێ هه‌كه ئه‌ڤه گه‌هشته وێرێ دێ ب چاڤێ كێماسیێ ل وان نێڕیت و بێژیت ئه‌ز ژ خۆناگرم، ئه‌لمانه‌كێ ده‌نگدایه قانوونا پاراستنا حه‌قێن مرۆڤی، بهێنه د مالا منڤه!!
ئه‌ز دبینم، ژبه‌ر ده‌ستودانێن ل سه‌ری هاتینه نڤیسین، تڤیابا ئه‌وێن ژ جه و وارێن خوه كۆچه‌ربووین و قه‌ستا كوردستانێ كری، هه‌یامێ دو سالا ل كه‌مپان هاتبانه بنه‌جهكرن و ل وی هه‌یامی ده‌رسێن ئێكدو قه‌بیلكرنێ بۆ بهێنه گۆتن و كوردستان و كوردا پێ بده‌نه نیاسین. كا ئه‌خلاقێ كوردان هه‌ی چیه، كورد چاوا هزردكه‌ت و چه‌ند تۆخمێن مرۆڤان ل ڤێرێ هه‌نه و هه‌می ب ته‌ناهی پێكڤه دژین و بۆ بهێنه دیاركرن یێ بڤێن ل كوردستانێ بژیت دڤیا باوه‌ری ب سه‌ربێنێن كورده‌واریێ یێن مرۆڤاینی و پێكڤه‌ژیانێ هه‌بیت و بۆ پێشئێخستنا وان د پاشه‌ڕۆژێدا بخه‌بتیت و پاشی بێژنێ: (ڤێرێ كوردستانه نه مووسله نه به‌غدا) و وه‌كی هاتی پێ بده‌نه نیاسین. گه‌له‌كا فه‌ره ئه‌و كۆچه‌ر و مشه‌ختێن دهێنه كوردستانێ و كوردی نه‌زانن، ئه‌زمانێ كوردی نیشابده‌ن، دا د خانیان ڤه ب تنێ نه‌مینن و بشێن تێكه‌لی ژیارا رۆژانه ببن و بهێنه ناڤ خه‌لكێ.
مرۆڤی شیرێ خاڤێ خاری. چێدبیت یێن كۆچه‌ری كوردستانێ بووین، ل ڤێرێ تۆلێ ژ ئێك ڤه‌كه‌ن و پاشی ته‌ناهیا كوردستانێ ترس بكه‌ڤیته سه‌ر. ئه‌ڤ له‌هیا مشه‌ختا ب سه‌ر كوردستانێدا گرتی، دڤیا ژ ئالیێن ناڤده‌وله‌تی بهێنه خوازتن، پرۆگرامه‌كی دانن و پێشڤه‌برنا گیانێ پێكڤه‌ژیانێ و وه‌كئێكیا هه‌می مرۆڤان بۆ بهێنه گۆتن و ڤه‌گێڕان، چونكی ئه‌م هه‌می مرۆڤین و حه‌قێ ژیانێ ب ته‌ناهی و بسته ل ڤێ دونیا خودێ ئه‌م هاڤێنینه تێدا یێ هه‌ی.
