ڤێ حەفتیێ راپۆرتا پەرلەمانی ل دۆر هێرشا ل سەر هەولێرێ دێ ب دوماهی هێت
ئەندامەكێ لژنا ئاسایش و بەڕەڤانیێ ل پەرلەمانێ ئیراقێ ئاشكرا كر، لژنا بەڕەڤانیێ ڤێ حەفتیێ دێ دوماهیێ ب راپۆرتا خوە ئینیت ل دۆر هێرشا ئیرانێ ل سەر هەولێرێ و رادەستی دەستەیا سەرۆكایەتیا پەرلەمانێ ئیراقێ كەت.
سەگڤان یوسف، ئەندامێ لژنا ئاسایش و بەڕەڤانیێ بۆ رۆژناما ئەڤرۆ دیار كر، لژنەكا پەرلەمانێ كوردستانێ بۆ ڤەكۆلینێ ل دۆر هێرشا ئیرانێ ل سەر هەولێرێ سەرەدانا جهێ روودانێ كربوو، لیژنا پەرلەمانی راپۆرتەك ل دۆر هێرشێ بەرهەڤ كریە، كو تێدا مالا بازرگانەكی هاتیە بوردۆمانكرن و د ئەنجام دا وەلاتیێن سڤیل بووینە قوربانی، لیژنا پەرلەمانی ژ 10 ئەندامان پێكهاتیە و نوكە دوماهی كار ل سەر راپۆرتێ دكەت و بڕیارە ڤێ حەفتیێ دوماهیێ ب كارێ خوە بینیت و راپۆرتا خوە رادەستی دەستەیا سەرۆكایەتیا پەرلەمانی كەت.
سەگڤان یوسف گۆت: «راپۆرتا پەرلەمانی هەموو هووركاریێن هێرشا ئیرانێ تێدانە، ئێك ژ وان خالێن تەكەزی ل سەر هاتیە كرن گازیكرنا بەرپرسێن بلندێن ئەمنیە بۆ پەرلەمانێ ئیراقێ، پشتی پەسەندكرنا راپۆرتێ ژ لایێ لیژنا ئاسایش و بەڕەڤانیێ ڤە، دێ رادەستی سەرۆكایەتیا پەرلەمانی كەین و ئەو دێ بڕیارێ ل دۆر دەت، بزانین دێ چو رێكار هەبن بۆ رێگریێ ل ئەڤان هێرشان».
