ڤێ حەفتیێ مووچە دێ هێنە بەلاڤكرن
هەولێر، قائید میرۆ:
بریكارێ بەرێ یێ وەزارەتا داراییا ئیراقێ دیار كر، ڤێ حەفتیێ دێ 100 ملیار دینارێن دی دێ گەهنە هەرێما كوردستانێ و دەست ب بەلاڤكرنا مووچێ فەرمانبەران دێ هێتە كرن و دبێژیت: بەغدا پلان بۆ لاوازكرنا هەرێما كوردستانێ هەنە.
دكتۆر فازل نەبی، بریكارێ بەرێ یێ وەزارەتا دارایا ئیراقێ بۆ رۆژناما ئەڤرۆ دیار كر، ڤێ حەفتیێ دێ بەغدا 100 ملیار دینارێن دی بۆ هەرێما كوردستانێ دێ هنێریت و ڤێ حەفتیێ مووچە ل سەر فەرمانبەرێن هەرێما كوردستانێ دا دێ هێتە بەلاڤكرن و گۆت: «بەلێ ئەگەر بۆ هەیڤا داهاتی هەژمارا بانكی بۆ فەرمانبەران نەهێتە ڤەكرن، بەغدا ئیدی پارەی بۆ هەرێما كوردستانێ ناهنێریت، ب دیتنا من زەحمەتە ئیدی بەغدا بێی ڤەكرنا هەژمارا بانكی ل سەر هنارتنا مووچەی یا بەردەوامبیت».
دكتۆر فازل نەبی گۆتژی: «مەرجێ بەغدا بۆ هنارتنا مووچێ فەرمانبەران، ڤەكرنا هەژمارا بانكیە و ئەگەر هەرێم رازی بیت، ئەڤە ئاریشە دێ چارەسەر بیت، بەلێ ژبیر نەكەین بەغدا پلان بۆ چێكرنا ئاریشەیان بۆ هەرێما كوردستانێ هەنە و یا بزاڤێن لاوازكرنا قەوارەیێ هەرێما كوردستانێ دكەت».
