ڤێ حەفتیێ گەنمێ جۆتیاران ژ لایێ كەرتێ تایبەت ڤە دێ هێتە وەرگرتن
هەلێر، قائید میرۆ:
سەرۆكێ دەستەیا وەبەرهێنانێ دیاركر، ڤێ حەفتیێ پرۆسەیا وەرگرتنا گەنمێ جۆتیاران ژ لایێ كەرتێ تایبەت ڤە دێ هێتە دەستپێكرن و دبێژیت: ئەو گەنمێ ژ لایێ حوكمەتا ئیراقێ ڤە نەهاتیە وەرگرتن، جۆتیار دشێن رادەستی كۆمپانیێن ناڤخۆ بكەن.
دكتۆر محەمەد شوكری، سەرۆكێ دەستەیا وەبەرهێنانێ بۆ رۆژناما ئەڤرۆ دیاركر، ڤێ حەفتیێ پرۆسەیا وەرگرتنا گەنمێ جۆتیارێن هەرێما كوردستانێ ژ لایێ بازرگانیا ئیراقێ ڤە دێ ب دوماهی هێت و سالانە رێژەیەكا زۆرا گەنمی ناهێتە وەرگرتن و گۆت: «بۆ چارەكرنا ڤێ ئاریشەیێ، ئەڤە سێ سالە حوكمەتا هەرێما كوردستانێ ب رێیا دو كۆمپانیێن كەرتێ تایبەت گەنمێ جۆتیاران دكڕیت و بۆ ئەڤ سالە ژی دێ پرۆسەیا وەرگرتنا گەنمی یا بەردەوام بیت».
دكتۆر محەمەد شوكری گۆتژی: «ئەڤ سالە ژی گەنمێ نمرە ئێك؛ تەن ب 550 هزار دیناران و گەنمێ نمرە دو ب 500 هزار دیناران ژ لایێ دو كۆمپانیێن ناڤخۆ دێ هێتە وەرگرتن، ئەڤە ژی وەكی هاریكاری و پشتەڤانی بۆ جۆتیارێن هەرێما كوردستانێ، چونكی گەنمی ب بهایەكێ ئەرزان ددەنە بازاڕی و حوكمەتا هەرێمێ ژی دخوازیت بازاڕی بۆ گەنمێ جۆتیاران پەیدا بكەت».
