ڤەشارتنا نهێنیێن هەڤالان
سندس سالح سلێڤانەیی
نهێنی د ژیانا مرۆڤی دا وەكی گەنجینەیەكا گرانبهایە و ڤەشارتنا وان نهێنیان ئەركەكێ مەزنە و هەڤالینی پەیوەندییەكە ل سەر بنگەهێ باوەرییێ هاتیە ئاڤاكرن و هەر پەیوەندییەكا باش پێدڤی ب باوەرییەكا قایم هەیە، دەمێ هەڤالەك نهێنیێن خوە بۆ تە دبێژیت ئەڤە نیشانەكا مەزنا باوەرییێ یە، ئەو كەس یێ ب ڤێ چەندێ دزانیت كو تۆ یێ ژێهاتی ڤەشارتنا نهێنیان و تشتێن كو ئەو بۆ تە دبێژیت دێ ل ناڤبەرا مە دا مینیت.
دەمێ مەسەلێ پەیوەندی ب نهێنیێن كچان ڤە هەبیت، گرنگییا ڤەشارتنێ گەلەك زێدەترە، د جڤاكێ مە دا، كچ تووشی زەحمەتیێن مەزن دبن ئەگەر نهێنیێن وان بێنە بەلاڤكرن، نهێنیێن كچان ب تایبەت یێن هەستیارن ژبەر بارودۆخێن تایبەت یێن جڤاكی، چاندی و خێزانی. هەكە تۆ نهێنیێن هەڤالان بەلاڤ بكەی، دێ چەند تشت پەیدا بن: ئێك، تۆ دێ باوەرییا وان ژدەست دەی، دوو، دێ ناڤێ تە ب مرۆڤەكێ نەباوەر د ناڤ خەلكی ڤە بەلاڤ بیت، سێ، تۆ دێ ئەگەرێ ئێشاندنا وان بی.
ژبۆ هندێ تۆ ببیە كەسەكێ باوەرپێكری، پێدڤیە تۆ هزرێ ل وان پەیڤان بكەی یێن تۆ ب دەڤێ خۆ دبێژی، پێدڤیە تۆ ب ڤەشارتنا نهێنیان پابەند بی و نەهێلی هەست بدەی تە نهێنی ڤەشارتینە ژ وان كەسێن تایبەت، مرۆڤێ باوەرپێكری كەسەكە دگەل هندێ ب دەستهێلانا نهێنیان گەلەك زەحمەتە، بەلێ ئەو ب باشی دزانیت ڤەشارتنا نهێنیان چەندا گرنگە بۆ پاراستنا هەستێن هەڤالان، ئەو ب زانیت كو رەنگە نهێنی كلیلا ژیانا مرۆڤەكی بیت و بەلاڤكرنا وێ دێ كاریگەرییەكا نەرێنی ل سەر ژیانا ئەوی كەسی هەبیت.
ل دووماهیێ ڤەشارتنا نهێنیێن هەڤالان، ب تایبەت یێن كچان، نیشانا مرۆڤایەتیا راستەقینەیە، نەهێلە كەس تە بۆ بەلاڤكرنا نهێنیێن كەسێن دی هان بدەت، نهێنی یێن وەكی ئەمانەتێن پیرۆزن، و ڤەشارتنا وان نیشانا مەردایەتی، باوەری و هەڤالینییا راستەقینەیە.
