ڤەكرنا جاددەیا پێشمەرگە ل دلێ فرەنسا دەستكەفتەكا مێژوویی بوو
جیگر رەشید هەركی
ڤەكرنا جاددەیەكێ ل ناڤا پاریس بناڤێ ‹›جاددەیا پێشمەرگە›› ب پشكداریا جەنابێ سەرۆك بارزانی گرنگیەكا تایبەت هەیە نیشانا دۆستایەتیا مێژوویە د ناڤبەرا كوردستانێ و وەلاتێ فرەنسا دا و دەستكەفتەكا گرنگە بۆ كورد و كوردستانێ كو ب ڤی شێوەی ل ئەورۆپا كو ب دایكا دیمۆكراسیێ دهێتە زانین ڕێز ل خەبات و ماندیبوونا پێشمەرگەی بهێتەگرتن، ئەڤە ڤێ چەندێ دگەهینیت كو پێشمەرگە نەك تنێ پارێزەرێن كوردستانێ نە بەلكو پێشمەرگە پارێزەرێن ئاشتیێ و پێكڤەژیانێ نە ل هەمی جیهانێ، ڕولێ بەرچاڤێ پێشمەرگەی د شەرێن دژی تیرۆرستێن داعش بۆ جیهانێ هەمیێ سەلماند كو ئەڤ قەهرەمانیا پێشمەرگەی بەرامبەری ڤێ ڕێكخراوا تیرۆرستی هەژی ڕێزگرتن و دانپێدانانەكا مێژووییە
جەنابێ سەرۆك بارزانی ژی ئاماژە ب ڤێ یەكێ كر ‹›كو پەیوەندیەكا مێژووی هەیە د ناڤبەرا كوردستانێ و گەلێ فڕەنسا و ئەڤە ڕێزلێنانەكا مەزنە و هەتا ئێك كورد مایە سوپاسگوزارێ گەلێ فڕەنسایە›› ب درێژاهیا مێژوویێ و ل سالێن شێستێ هەتا ئەڤڕۆ پەیوەندیەكا گرنگ و تایبەت هەیە دناڤبەرا وەلاتێ فڕەنسا و گەلێ كوردستانێ د زوڕ وەختێن دژوار فڕەنسا پشتگیری ل گەلێ كوردستانێ كریە و كوردستان پاراستیە، بۆ نموونە فڕەنسا بوو پێشنیارا بڕیارا 986 یا ئەنجومەنێ ئاسایشا نێڤدەولەتی كری بۆ دانانا ناڤچەیا دژەفرینێ ل كوردستانێ، هەروەسا ل دەمێ ئاوارەییێ ل سالا 1991 دانیال میترانا فڕەنسی بۆ هاتە كوردستانێ و دەنگێ كوردان گەهاندیە جیهانێ، چەند جارەكا سەرۆكێ فڕەنسا هاتبیتە ئیراقێ سەرەدانا هەرێما كوردستانێ ژی كریە و بێ كوردستان نەڤەگەریایە هەر وەك ل سالا 2017 ل دەمێ شەڕێ دژی داعش فرانسوا ئولاند سەرۆكێ فڕەنسا هاتە كوردستانێ و دگەل جەنابێ سەرۆك بارزانی سەردانا میحوەرێن پێشمەرگەی كر و ئەڤ یێك ڕاگەهاند كو پالپشتێن هەرێما كوردستانێ و پێشمەرگەینە، چونكی پێشمەرگە پێش هەمی جیهانێ شەڕێ ژناڤبرنا تیرۆرێ دكەن، دوماهی جار ژی ل پشتی ڕیفراندومێ سەرۆكێ فرەنسا سەردانا هەرێما كوردستانێ كر و ئێكەم وەلات بوو پێشوازی ل هەرێما كوردستانێ كری.د ڤی بارودۆخێ نەخۆش و دژاوار كوردستان و جهیان پێدا دەرباس دبیت ڤەكرنا جادەیەكێ ل ناڤا وەلاتەكێ تەمام دیموكراسی وەك فرەنسا نیشانێ گەهاندنا لۆبیەكا ب هێزە بۆ كوردستانێ و پشتیوانیەكا گرنگە بۆ پێشمەرگا و پاراستنا ناڤێ پیرۆزێ پێشمەرگەی، ئەڤ ڕێزا ئەڤڕۆ ل پێشمەرگەی دهێتەگرتن ل ناڤا گەلێن جیهانێ دا پێشمەرگەی وەك هێمایێ خوڕاگریێ و بەرگریێ ل ئاسایش و ئاشتیا جیهانێ ددەتە نیاسین.
ئەڤ كارێ دیبلۆماسی و كولتووری د ناڤا وەلاتێ فرەنسا و كوردستانێ دا شاهەدیا هندێ ددەت كو دەنگێ كوردستانێ ل گەهاندنا بدەستخستنا مافێن كوردان ل ناڤ دەولەتێن جیهانێدا بهێزتر دبیت و گرەنتیەكە كو د داهاتیدا كورد ب سەركردایەتیا جەنابێ سەرۆك بارزانی ڕولەكێ بەڕچاڤ دێ هەبیت د گوڕانكاریاندا ل ڕۆژهەلاتا ناڤەڕاست دا.
