ڤەكرنا خولێن ڕاهێنانێ ژبەر ئەكادیمیكرنا كارێ وانە
شاهۆ فەرید:
د داخویانیەكێ دا سەرۆكێ فدراسیۆنا یارییا لەشجوانیێ ل پارێزگەها دهۆكێ دیار كر مەرەم ژ ڤەكرنا هەر خولەكا ڕاهێنانێ پێخەمە وەرگرتنا پێزانان و ئەكادیمیكرنا كارێن هەموو ڕاهێنەرانە و دێ بەردەوامبین ل سەر خولێن ڕاهێنانێ، ئەڤچەندە هات پشتی ل حەفتییا بۆری فدراسیۆنا ناڤهاتی ڕێورەسمێن بەلاڤكرنا باوەرنامەیێن نێڤدەولەتی ل سەر 105 ڕاهێنەرێن كوڕ و كچ ئەوێن د هۆلێن وەرزشی ژی دا كار دكەن كو یێن سنۆرێ پارێزگەهێ و ئیدارا سەربەخوەیا زاخۆ بووینە.
زێدەتر عەلی حسێن بۆ رۆژنامەیا ئەڤرۆ گۆت: ئەم یێ ل دووڤ پێشكەڤتن و دووماهی پێشهاتەیێن وەرزشا یارییا لەشجوانیێ یا جیهانی دچین پێخەمەت پێشئێخستنا ئاستێ ڕاهێنەرێن مە تایبەت ئەوێن دناڤا هۆلێن وەرزشی دا كار دكەت، لەوما ژی ژبەر گرنگییا ڤێ خولێ ئەڤجارە رێژەیەكا باش یا ڕاهێنەرا پشكداربوون، 71 راهێنەرێن كوڕ و 34 راهێنەرێن كچ بوون، ئەوا ب شێوەیێ تیۆری و پراكتیكی ژلایێ وانەبێژێن شارەزا و خودان باوەرنامەیێن نێڤدەولەتی ڤە هاتبوونە شرۆڤەكرن.
ژلایەكێ دووڤە ناڤهاتی ئەوچەندە ژی گۆت: هەموو پشكدار ب مۆرالەكا بلند و حەزا وەرگرتنا پێزانیان هاتبوون، دیاربوو ژی مفایەكێ گەلەك باش ژێ هاتبوو وەرگرتن هەموو پشكدار بووینە خودان هەلگرێن باوەرنامەیا جورێ بی و جورێ سی كو دهێتە زانین ئەڤ خولە بوویە مەزنترین ئاستێ باوەرنامەیێ ل سەر ئاستێ ئیراقێ، لەوما ژی ژبەرگرنیێ و مفا وەرگرتنێ ئەم ڕژدین بەردەوام خولا ڤەكەن پێخەمەت ئەڤ یارییە پێشكەڤیت و هەروەسان ڕاهێنەرێن مە ب شێوەكێ ئەكادیمی فێربن و بشێن ب گەهینە یاریزانێن خوە، ژبەركو ئەڤ یارییە یا هەستیارە و گرنگە و ب لەشی ڤە گرێدایە.
ل دووماهیێ عەلی حسێن گۆت: داخوازییا مە ژ جهێن پەیوەندیدار ئەوە پشتەڤانییا ڕاهێنەر و یاریزانێن ڤێ یاریێ بكەن، چونكۆ مە ل پارێزگەها دهۆكێ یاریزانێن هەلگرێن پلێتا پرۆنە یا جیهانی هەنە، مافێ پشكداریێ هەیە لسەر ستێجێن جیهانی و قارەمانیێن كێشوەری پشكداربن.
