ڤەكرنا قوتابخانا ل سەر دەمێ شۆرەشێ مە خەباتەكا مەدەنی دەستپێكر
دیدار، سالار محەمەد دۆسكی:
مامۆستایەكا ئافرەت یا سەر دەمێ شۆرەشا گولانا پێشكەفتنخواز دیار كر، سەركردایەتییا شۆرەشا گولانێ و بڕیارا جەنابێ سەرۆكی هزر و خەبات و بەرخودانەكا نووی ل شۆەرشێ سەرهلداڤە، وەك كارڤەدانەك بەرامبەر بڕیارا دوژمنی و دەمێ قوتابخانێن خوە ل دەڤەرێن ئازادكری ڤەكێشاین، دەست ب ڤەكرنا قوتابخانا كر و مە ب زانست و زانینێ خەباتەكا مەدەنی دەستپێكر.
مامۆستا كوردستان عەبدولرەحمان، مامۆستایا قوتابخانا گوندێ (هورە) ل دەڤەرا ڕێكانیا ل سەر دەمێ شۆرەشا گولانا پێشكەفتنخواز، د دیدارەكێ دا ل گەل رۆژناما ئەڤرۆ گۆت: ل دووماهی یا سالێت هەشتیان و پشتی حوكمەتا بەعس یا گور بە گور بڕیار دای قوتابخانە ل دەڤەرێن بن دەستهەلاتا پێشمەرگەیێ كوردستانێ بهێنە ڤەكێشان، ل سالا 1987 سەركردایەتی یا شۆرەشا 26ی گولانا پێشكەفتنخوزا و ب بڕیارا جەنابێ سەرۆك (مەسعود بارزانی) بڕیار هاتەدان، قوتابخانە ل دەڤەرێن ئازادكری بهێنە ڤەكرن، ب مەرەما ئەنجامدانا ڤی كاری چەند لژنێن بسپور هاتنە پێكئینان و سەرپەشتێ لژنێ مامۆستا (ئەحمەد قەرنی) بوو و لژنەك هاتە دروستكرن و سەرەدانا هەمی گوندێن دەڤەرێن ئازادكری هاتەكرن، و ئامارەكا زارۆكێن ژیێ وا شەش سالی هاتە وەرگرتن و رێككەفتی 4/9/1987ێ بڕیار ب دروستی هاتەدان، ئەو گوندێن قوتابخانە تێدا نە قوتابخانە تێدا بهێنە ڤەكرن، و هەر هەمان مێژوو قوتابخانە ل گوندێ (هورە) هاتە ڤەكرن، و من سەرپەرشتی دكر و مامۆستا ژی بووم و ئەز یا بتنێ بووم، و دووف دا مامۆستایەكێ دی بناڤێ (زەینل حسێن) هاتە قوتابخانا مە و هاریكاریا مە دكر، و مە دەست ب گۆتنا وانان بۆ زارۆكێن گوندێ ناڤبری كر، و زارۆكێن پێشمەرگەیێ كوردستانێ و دیسا مامۆستا (زولەیخا محەمەد یوسف) كچا شەهید بوویە ئەو ژی هاتە قوتابخانێ و مە دەست ب خواندنێ كر، وی دەمی شیانێن برێڤەبرنێ گەلەك كێم بوون، بەلێ سەركردایەتییا شۆرەشێ ئەو لژنا هاتیە دروستكرن پێدڤیێن برێڤەبرنا قوتابخانێ ل گور شیانێن وی سەردەمی یێن شۆرەشێ بوومە دابینكرن، و هاتنە پەیداكرن، ب وێ مەرەمێ دەست ژ خواندنێ بەرنەدین وبەردەوامیێ بدەینە خواندنێ.
مامۆستا قوتابخانا گوندێ هورە ل سەر دەمێ شۆرەشێ هەروەسا دیاركر، كو نێزیكی (55) قوتابیان مە ل گوندی هەبوون و خواندنا وی دەمی گەلەك مفا گەهاندنێ و نەهێلا ژ خواندنێ بهێنە دووركرن، و گەلەك ژ ئەوان قوتابیان دەرچوووێن قوناغێن ئامادەیی نە و گەلەك دەرچووێن پەیمانگەه و زانكویانە و هندەك ژ وان قوتابیان ئەڤرۆ ل فەرمانگەهێن حزبی و حوكمی خزمەتا مللەتی دكەن.
مامۆستا شۆرەشێ كوردستان عەبدولرەحمان گۆت: ئەگەر وی دەمی سەركردایەتییا شۆرەشێ هزر ل ڤەكرنا قوتابخانا نەكربا وی دەمی دا زارۆكێن پێشمەرگەی و تایبەت دەڤەرێن ئازادكری ژ خواندنێ بێ بەهر بن، لەوما گرنگە بێژین چ وەلات و مللەت پێشناكەڤن ئەگەر نە خوێندەواربن لەوما مە گەلەك مفا ژێ وەرگرت و زارۆكێن وی سەردەمی بووینە قوتابی ئەڤرۆ هەمی كەفتینە دخزمەتا مللەت و وەلاتی دا.
ل دور مەترسیێن بۆ مامۆستا و قوتابیان دروست بووین ل سەر دەمێ شۆرەشێ و دەمێ بەردەوامی دایە خواندنێ، مامۆستایا ناڤبری گۆت: ئەو جهێ مە قوتابخانا گوندی تێدا ڤەكری ئاڤاهیێ بەشەكێ نافخویێ قوتابیان بوو و گەلەكێ كەڤن بوو، و بەری دەست ب خواندنێ بكەین، پیچەك هاتە ب سەرۆبەركرن و بتنێ مە ئێك ژوور هەبوو، و قوتابی و مامۆستا و كارگێری هەر هەمی دناڤا وێ پولێ دابوون، و هەر قوتابیەكی ل گورەی شیانێن خوە ئەڤجا هندەكا جودەلیك و هندەك تەنكێن رووینی و هندەكا كودیێن دارا بخوە ئینان روینشتنە خوارێ، ل سەر و وانە هاتنە گۆتن، دیوارێ قوتابخانێ ب گێچێ هاتبوو دروستكرن و مە بخوە ژ دیواری ڤەدكر و تەختە رەشەكێ نە ل ئاست مە پەیدا كر، و مە دەست ب خواندنێ كر و مە دەست ژ خواندنێ بەرنەدا، دڤێت سوپاسیا سەركردایەتییا شۆرەشا گولانێ بكەین، چونكە ئەوان كاودانێن بەرتەنگ دا هزر ل وێ چەندێ كر ئەم وەك پێشمەرگە دەست ب خەبات و بەرخودانێ بكەین، و ب رێكا زانین و زانستی خزمەتا زارۆكێم پێشمەرگەیێ كوردستانێ بكەین، و ئەوا ب چەكێ خوە و مە ب پێنوس و زانینا خوە بەرخودان و بەرەڤانی ژ ئاخ و وەلاتێ خوە دكر.
مامۆستا كوردستانێ ئەو چەندە نە ڤەشارت و گۆت: وی دەمی ئەگەر مامۆستایەك خێزاندار با مووچێ وی 50 دینار بوو، و ئەگەر زگورد با 25 دینار بوو وی دەمی خێزاندار بووم بەلێ رۆژا دەواتا خوە ئەم رەڤی بووین، و ئەز زگورد دهاتمە هژمارتن مووچێ منێ هەیڤانە 25 دینار بوو.
مامۆستایا شۆرەشا گولانێ زێدەتر بەحسێ شەهیانا خوە كر و گۆت: ل سالا 1986ێ و شەڤا دەواتا خوە ئەم رەڤین و مە گرێبەستا هەڤژینێ دروست نەكربوو، و ئەم نەگەهشت بووین، وی دەمی ئەز بەرپرسا شانەكا بنەكی بووم سەر ب رێكخراوا (رۆناهی) ڤە و مە كارێ رێكخستنێن نهێنی دكر، و سەر ب لژنا ئاكرێ یا پارتی دیموكراتی كوردستان ڤە، وی دەمی هەڤژینێ من دختورێ شۆرەشێ بوو، و (25) وی ژی وەرگرتن و من ژی (25) دینار وەك مامۆستا وەردگرتن و مووچێ مە تێرا مە دكر، و هەر وەك وا لێ دهات ئەوێن خێزاندار.
مامۆستا كوردستانێ ئەو ژی گۆت: پشتی هەوا ئەنفالان ل سالا 1988ێ دەستپێكری، ئەم پەنابەری وەلاتێ توركیا بووین، و 28 رۆژا ل كەمپا موشێ ماین و دووف پەنابەری وەلاتێ ئیرانێ بووین و ئەوی وەلاتی قوتابخانە ڤەنەكرن.
ل دووماهیێ مامۆستا شۆرەشا 26ی گولانێ گۆت: دەست خوشیێ ل لقێ ئێكا خەباتكەر دكەم و ڤەكرنا چادرگەها 26ی گولانێ و داخواز دكەین ئەڤ پێنگاڤە دبەردەوام بن، ب وێ مەرەمێ گەنج و لاوێن نوكە بزانن ئەڤرۆ ب زەحمەت و خەبات و بەرخودان پەیدا بوویە، و ب ساناهی نەهاتیە و ئەڤە بەرهەمێ خوینا ب هزار شەهیدان و ماندیبوونا ب هزاران پێشمەرگەی بوویە، و سۆتن و كاڤلكرن و دەربەدەری یا سەدان گوندان و بەرهەمێ چەندین شۆرەش و بەرخودانێن مللەتێ مە بوویە، و ب هزار جاران مالێن مە وێران بووینە هەتا گەهشتینە ڤێ قوناغێ.
