ڤەكۆلەرەكێ سیاسیێ ئیراقی: دڤێت ئیراق هەڤپشكییا ئەمریكا یان هەڤپەیمانییا ئیرانێ هەلبژێریت
پشتی هێرشا ئیسرائیلێ ل سەر چەند سەركردەیێن (حەماس) ل قەتەرێ، بازنەیێ نەرازیبوونێ ل جادەیا عەرەبی بەفرەهتر بوو، ژبلی گرێدانا گۆپیتكا وەلاتێن عەرەبی ب ئارمانجا ئێكهەلوەستیێ دژی هێرشێن ئیسرائیلێ ل دەڤەرێ، بەلێ ئیراق جوداتر هزر دكەت و پشتەڤانیێ ل پێكئینانا هێزەكا ئەمنییا هەڤپشك بۆ بەرگریێ ژ سەروەریێن خوە دكەت، سەرۆكێ سەنتەرێ ئیراقی بۆ ڤەكۆلینێن ستراتیژی ژی دبێژیت دو رێ ل پێشبەری ئیراقێ هەنە یان هەڤپشكییا ئەمریكا یان ژی هەڤپەیمانییا ستراتیژییا ئیرانێ و هەكە بچیتە ل گەل ئیرانێ دێ باجەكا گران دەت.
محەمەد شیاع سوودانی، سەرۆك وەزیرێن ئیراقێ ل كارڤەدانێن هێرشا ئیسرائیلێ ل سەر قەتەرێ ب ئارمانجا ژناڤبرنا شاندێ دانوستاندكارێ (حەماس) ل وی وەلاتی، راگەهاند: ب ئارمانجگرتنا قەتەر ژ ئالیێ ئیسرائیلێڤە بنپێكرنا قانوونێن نێڤدەولەتییە و دوپاتی ژی ل سەر پێدڤییا پێكئینانا هەڤپەیمانییەكا سیاسی و ئەمنی و ئابۆرییا ئیسلامی بۆ روو ب رووبوونا گەفێن ئیسرائیلێ كریە، ئەڤە د دەمەكیدایە، ئالیێن ئەمنی، ئیراق ل هەر گرژییەكا مەترسیدار ل گەل ئیسرائیلێ ئاگەهداركریە.
ب گۆڕەی راپۆرتەكا رادیۆیا مۆنت كارلۆ، بۆ لژنەیا ئاسایش و بەرگریێ ل جڤاتا نوونەرێن ئیراقێ دیاربوویە كو ئیسرائیل ئیراقێ وەك كووراتییا ستراتیژییا نوویا حزبوللا پشتی ژ دەستدانا سووریێ دزانیت، ئەڤ پێشهاتە د دەمەكیدایە . گرۆپێن چەكدارێن لایەنگرێن ئیرانێ ل ئیراقێ پێشتر گەف ل بەرژەوەندیێن ئەمریكا و ئیسرائیلێ كربوو، ئەڤ چەندە ژی رەوشێ خرابتر دكەت.
سەبارەت ئەگەرێ ب ئارمانجگرتنا ئیراقێ پشتی قەتەرێ ژ ئالیێ ئیسرائیلێڤە، ئەحمەد یاسر، ڤەكۆلەرێ سیاسی دبێژیت: وەلاتێن عەرەبی ژ ئەگەرێ دووبارەبوونا هێرشا هەڤشێوەیێ دەوحە دلگرانن. مەترسی بۆ وان وەلاتایە یێن سنوورێ هشكاتی و ئاڤی ل گەل ئیسرائیلێ هەی ئەوژی مسر، سعودیە و ئوردنن. هەر چ ئیرانە خوە بۆ خولا دویێ ژ ب ئارمانجگرتنا ئیسرائیلێ بەرهەڤ دكەت، ئەڤە ژی وەدكەت دەستپێشخەریێن بەغدا ب گۆڕەی هەڤپشكییا عەرەبی و ئیسلامی بیت نەك وەك بەرسڤەكا تاكلایەنە، چونكە نەشێت ب تنێ روو ب روویێ رەوشێ ببیت.
ب باوەرییا غازی فەیسەل، رێڤەبەرێ سەنتەرێ ئیراقێ بۆ ڤەكۆلینێن ستراتیژی، پێدڤییە بەغدا سیاسەتا بێلایەنیێ پەیڕەو بكەت و نەچیتە دناڤ شەڕەكێ ئاشكرا ل گەل ئیسرائیلێ. ب چەسپاندنا هەڤپشكییا ستراتیژی ل گەل ئەمریكا دێ رێگریێ كەت ئیراق ببیتە مەیدانا شەڕێ گرۆپێن چەكدارێن دلسۆزێن تەهرانێ. ل دووڤ بۆچوونا غازی فەیسەلی، دو رێ یێن ل پێشبەری ئیراقێ یان دێ بیتە هەڤپشكا واشنتۆن یان هەڤپەیمانا ستراتیژییا ئیرانێ و هەكە بچیتە ل گەل ئیرانێ دێ باجەكا گران دەت.
