ڤەهین ئەحمەد: دانانا هۆلێن وەرزشی نە ب تنێ بۆ كێمكرنا كێشا لەشی یە
سندس سالح سلێڤانەی
د دیدارەكێ دا ڕاهێنەرا هۆلەكا وەرزشی ل باژێرێ دهۆكێ دۆپاتی ل سەر هەبوونا وەرزشا كچان كر وەكو ئێك ژ گرنگترین كارێن وان د ژیانێ دا و تایبەت بۆ ئەوا یاریزانێن دناڤ یانەیێن وەرزشی دا پێخەمەت بهێزكرنا ماسۆلینك بەری ئەنجامدانا هەر یارییەكێ.
زێدەتر ڤەهین ئەحمەد رەمەزان بۆ رۆژنامەیا ئەڤرۆ گۆت: وەكو ئێك ژ ئەوان ڕاهێنەرێن كچ یێن باوەرنامەیێن جودا یێن ڕاهێنانێ وەرگرتییە هەردەم بزاڤێ دكەم ب شێوەیێ ڕێكخستی و دانانا بەرنامە و پلان بۆ یاریزانێن خوە ئەوێن دهێنە هۆلا لەش جوانیێ، هەرچەندە ئەو كەسێن دهێنە وەرزشێ بۆ مەرەمێن جودا دهێن و پرانییا وان ژبەر چارەسەریێن سرۆشتی نە ژبەركو وەرزشا ئافرەتێ ل یانەیان زێدە كێمبوویە ژبلی یانەیا ئافرەتێن دهۆكێ چ یانەیێن دی نینن ب وەرزشا كچان یان چاڤدانا وان بكەن، لێ گەلەك كچ و ژن دهێنە هۆلا وەرزشی ژبۆ خوە پاراستنێ ژ قەلەویی یان ئەوێ، خودان ئێشێن جودا نموونە نەخوەشیا شەكرێ، پەستانا خوینێ، تەكەیسات، لاوازییا جەستەیی و غدە و چەندین ئێشێن دی.
هەروەسان ناڤهاتی گۆت: پێنەڤێت دڤێت ڕاهێنەر ب هووربینی دۆڤچوونا هەموو یاریزانێن خوە بكەت و هەرئێك ل دووڤ بەرنامەیێ وی ڕاهێنانان پێ بكەت، یا جهێ دلخوەشیێ ڕەوشەنبیرییا وەرزشی دناڤ تەخەیا ژنان گەلەك باشتر لێهاتییە و ئەڤە ژی نیشانەكە كو وەرزش هەردەم چارەسەرییا ئێكانەیە بۆ ساخلەمییا هەر تاكەكە كەسەكی، بۆ مە گرنگ ئەوە ئافرەت مفایی ژێ وەربگریت و ساخلەم بیت، لەوما ژی ئەم خوە ماندی دكەین و هەر تشتەكێ پێدڤی بۆ بەردەست دكەین.
ل دووماهیێ ناڤهاتی پەسنا پشتەڤانییا خێزانا خوە كر و گۆت: ب هەڤكاری و پشتەڤانییا بابێ خوە كو ئەو ژی دنوكە دا ڕاهێنەرێ لەشجوانیێ یە و ب هاریكارییا بابێ خوە من چەندین باوەرنامە ب دەستڤە ئیناینە و مەرەما مە ژی هەر بلندكرنا ئاستێ وەرزشا كچانە و پاراستنا ساخلەمیا وانە و شانازیێ ب بابێ خوە دبەم كو كارەكێ پیرۆز ب من ڕاسپاردی و ڕژدم یا باش و دروست بۆ سەرفەرازییا وەرزشا كچان بكەم.
